TV5 ​ចាប់ផ្តើម​ប្រកួត​ដណ្តើមពាន​រង្វាន់​រដូវ​កាល​ថ្មី​ ៖​ ម៉ន ព្រហ្ម​ម៉ាញ ជួប សេក ចៅ​ជូត , លាភ រដ្ឋា ជួប ធា រិទ្ធី​

TV5 នឹង​ចាប់ផ្តើម​បើក​ការប្រកួត​ប្រដាល់​ដណ្តើមពាន​រង្វាន់​ជើងឯក​“ TV5 Boxing Knock Out Series By K.cement ” លើ​ប្រភេទ​ទម្ងន់​៦០​គីឡូក្រាម​បន្តទៀត លើស​ង្វៀន TV5 ព្រែកកំពឹស បន្ទាប់​បានបញ្ចប់​ការប្រកួត​រដូវ​កាល​ចាស់ ទម្ងន់​៥៧​គីឡូក្រាម កាលពី​ថ្ងៃទី​២៦​ ខែឧសភា ​ឆ្នាំ​២០១៨ ហើយ​ជើងឯក​បាន​ទៅលើ​កីឡាករ ធន មករា សមាគម​កីឡាប្រដាល់​ក្រសួងការពារជាតិ​នោះ។

ការប្រកួត​ប្រដាល់​ដណ្តើមពាន​រង្វាន់​ជើងឯក​“ TV5 Boxing Knock Out Series By K.cement ” រដូវ​កាល​ថ្មី លើ​ប្រភេទ​ទម្ងន់​៦០​គីឡូក្រាម មាន​អ្នក​ប្រដាល់​ចាស់​-​ថ្មី ចំនួន​៣២​រូប នឹងត្រូវ​ចូលរួម​ក្នុង​ព្រឹត្តិការណ៍​នេះ ដែល​រូបមន្ត​ប្រកួត គឺ​ចាញ់​ជ្រុះ​ធ្លាក់​តែម្តង ។ ​
​
សម្រាប់​ការប្រកួត​ជម្រុះ​លើក​ទី​១ ក្នុងដំណាក់កាល​ទី​១ នៅ​ថ្ងៃ​ដំបូង​ថ្ងៃទី​០២​ខែមិថុនា​ឆ្នាំ​២០១៨​នេះ ដែលមាន​ពីរ​គូ​នោះ គឺជា​ការជួបគ្នា​រវាង ម៉ន ព្រហ្ម​ម៉ាញ អ្នក​ប្រដាល់​ជើងចាស់​ក្លិប​ការិយាល័យ​ទី​៥ កងទ័ពជើងគោក នឹង​ជួប​ប្រកួត​ជាមួយ​អ្នក​ប្រដាល់​ស្រករ​ក្រោយ សេក ចៅ​ជូត ក្លិប​អង្គរ​មានជ័យ​ខេត្តសៀមរាប ហើយ​មួយគូ​ទៀត​នោះ គឺ លាភ រដ្ឋា ជើងចាស់​ក្លិប​ដី​ឡូ​តិ៍​មាន​រិ​ទ្ធ​ខេត្តបន្ទាយមានជ័យ ជួប​ប្រកួត​ជាមួយ​អ្នក​ប្រដាល់​ជើងចាស់​ដែរ គឺ ធា រិទ្ធី ក្លិប​អេ​ភូ​ថង​កីឡា ។​

ការប្រកួត​ក្នុង​ដំណាក់​ទី​១​នេះ គឺ​ប្រកួត​តែ​បី​ទឹក ដោយ​ក្នុង​មួយ​ទឹក​មាន​៣​នាទី ហើយ​អ្នក​ដែល​ឈ្នះ​បាន​ឡើង និង​អ្នក​ដែល​ចាញ់​ត្រូវ​ជ្រុះ​ធ្លាក់​ត្រឹមនេះ ។​
​
រវាង​ម៉ន ព្រហ្ម​ម៉ាញ និង សេក ចៅ​ជូត នេះ ពួកគេ​មិន​ធ្លាប់​ជួបគ្នា​ទេ​កន្លងមក ព្រោះ​ពួកគេ​ទាំងពីរ​នាក់ ម្នាក់​ជា​អ្នក​ប្រដាល់​ស្រករ​ក្រោយ​គឺ​សេក ចៅ​ជូត ឯ​ម៉ន ព្រហ្ម​ម៉ាញ ជា​អ្នក​ប្រដាល់​ជើងចាស់​ស្រករ​មុន ។ ទោះជា​យ៉ាងណា សេក ចៅ​ជូត ប្រហែលជា​មិនអាច​ឈ្នះ​ម៉ន ព្រហ្ម​ម៉ាញ បាន​នោះឡើយ ។ ម៉ន ព្រហ្ម​ម៉ាញ គេ​មានប្រៀប​ឈ្នះ​លើ​សេក ចៅ​ជូត ត្រង់​បទពិសោធន៍ និង​ល្បិចកល ព្រមទាំង​ផ្លែ​ល្អ​ថែមទៀត ។​
​
ចំពោះ​ការប្រកួត​មួយគូ​ទៀត​នោះ ជាការ​ជួបគ្នា​រវាង​អ្នក​ប្រដាល់​លាភ រដ្ឋា ក្លិប​ដី​ឡូ​តិ៍​មាន​រិ​ទ្ធ​ខេត្តបន្ទាយមានជ័យ និង អ្នក​ប្រដាល់​ជើងចាស់ ធា រិទ្ធី ក្លិប​អេ​ភូ​ថង​កីឡា ។ ពីរ​នាក់​នេះ មិន​ធ្លាប់​ជួបគ្នា​ដែរ​កន្លងមក​។
​
លាភ រដ្ឋា ជា​លើក​ទី​២​របស់គេ​ហើយ ដែល​ចូលរួម​ការប្រកួត​ដណ្តើមពាន​រង្វាន់ TV5 Boxing Knock Out Series By K.cement នេះ ។​កាលពី​ចូលរួម​ក្នុង​ទម្ងន់​៥៧​គ​.​ក្រ ដែល​ទើប​បញ្ចប់ទៅ​ថ្មីៗ​កន្លងមកនេះ រដ្ឋា ជ្រុះ​ធ្លាក់​ត្រឹម​វគ្គ​ជម្រុះ​លើក​ទី​២ (១៦​នាក់​ចុងក្រោយ​) ។ សម្រាប់​ការចូលរួម​លើក​នេះ​ពុំ​ដឹងថា​លាភ រដ្ឋា ឆ្លង​ផុត​ដំណាក់កាល​ប៉ុន្មាន​នោះទេ។
​
ចំពោះ​ការជួបគ្នា​ជាមួយ​ធា រិទ្ធី លើក​នេះ មិនដឹងថា​នរណា ជា​អ្នក​មានសំណាង​បាន​ឡើងទៅ​ប្រកួត​បន្តទៀត​នោះទេ ? តែ​យ៉ាងណា លាភ រដ្ឋា គេ​ជា​អ្នក​ប្រដាល់​មានឈ្មោះ​បោះ​សម្លេង ធ្លាប់ ជួប​ជើង​ខ្លាំង ៗ​ជាច្រើន​នាក់​មកហើយ និង​ពិសេស គេ​មាន​កលល្បិច​និង​បទពិសោធន៍​លើ​រេញ​ច្រើនជាង ធា រិទ្ធី ។ ប៉ុន្តែ​លាភ រដ្ឋា ក៏​មិនអាច​ធ្វេសប្រហែស​ឬ​មើលស្រាល​ធា រិទ្ធី​បានដែរ ព្រោះ រិទ្ធី នេះ គេ​ក៏​វាយ​ខ្លាំង​និង​ល្អ​ដែរ និយាយ​រួម​ពីរ​នាក់​នេះ គឺ​ត្រូវ​មានការ​ប្រយ័ត្ន​រៀងៗ​ខ្លួន ។ យ៉ាងណា ការប្រកួត​រវាង​អ្នក​ប្រដាល់​ទាំងពីរ ទោះជា​អ្នកណា​ឈ្នះ ក៏​ឈ្នះ​ដោយ​វេទនា​ដែរ ។ ចាំមើល ក្នុងដំណាក់កាល​ទី​១ រវាង​លាភ រដ្ឋា និង ធា រិទ្ធី តើន​រណា​នៅ នរណា​ដើរ​ចេញពី​ការប្រកួត​នេះ​។

ព្រឹត្តិការណ៍​ប្រកួត​ដណ្តើមពាន​រង្វាន់​ជើងឯក​“ TV5 Boxing Knock Out Series By K.cement ” រដូវ​កាល​ថ្មី​លើ​ប្រភេទ​ទម្ងន់​៦០​គីឡូក្រាម​នេះ មាន​អ្នក​ប្រដាល់​ចំនួន ៣២ នាក់​ចូលរួម ហើយ​ចែកចេញជា ៤ ដំណាក់កាល និង​មាន​រូបមន្ត​ប្រកួត គឺ​ដំណាក់​ទី​១​ជាការ​ប្រកួត​ជម្រុះ​ក្នុងចំណោម​៣២​នាក់ ទុក​តែ​១៦​នាក់ ។ ដំណាក់ ទី​២ ជាការ​ជម្រុះ​ក្នុងចំណោម​១៦​នាក់ ទុក​៨​នាក់ ហើយ​ដំណាក់កាល​ទី​៣ គឺ​ជម្រុះ​ក្នុង​៨​នាក់​ទុក​៤​នាក់ និង​ដំណាក់កាល​ទី​៤​និង​ទី​៥ ជាការ​ប្រកួត​ដំណាក់កាល​ផ្តាច់ព្រ័ត្រ គឺ​ពាក់កណ្តាល​ផ្តាច់ព្រ័ត្រ​និង​ផ្តាច់ព្រ័ត្រ។​

ដោយឡែក សម្រាប់​ការប្រកួត​លក្ខ​ណះ​មិត្តភាព​អន្តរជាតិ​វិញ ផាន់ គ្រាន់ អ្នក​ប្រដាល់​ក្លិប​ពុទ្ធ​សេរី​វង្ស​កីឡា នឹងត្រូវ​ជួប​ប្រកួត​ជាមួយ​ថៃ Pic Ka ដោយ​ប្រកួត​ក្នុង​ទម្ងន់​៦៥​គីឡូក្រាម ។​
​ជា​លើកដំបូង​ហើយ ដែល​ផាន់ គ្រាន់ ឡើង​ប្រកួត​ក្រោយពី​រូបគេ​ដណ្តើមបាន​ខ្សែក្រវាត់​ទម្ងន់​៦៣,៥០០​គីឡូក្រាម កាលពី​ថ្ងៃទី​២៩​ឧសភា​២០១៨ ដោយ​វាយ​ឈ្នះ​Loom Leng អ្នក​ប្រដាល់​ថៃ​ក្នុង​វគ្គ​ផ្តាច់ព្រ័ត្រ​នោះ។

Pic Ka ជា​អ្នក​ប្រដាល់​ចំណូល​ថ្មី ពុំ​ធ្លាប់​ដែល​មក​ប្រកួត​នៅ​ស្រុក​ខ្មែរ​ទេ​កន្លងមក ។ យ៉ាងណា មកជួប​ម្ចាស់​ខ្សែក្រវាត់​ផាន់ គ្រាន់ Pic Ka ប្រហែលជា​លំបាក​ហើយ ។​ចាំមើល តើ​រវាង​ផាន់ ផាន់ និង Pic Ka នរណា​ឈ្នះ​? ៕ ​

Source: Kampuchea Thmey Daily