រដ្ឋាភិបាលសហរដ្ឋអាមេរិកបាននិយាយកាលពីថ្ងៃព្រហស្បតិ៍ថា គ្រួសាររាប់រយដែលត្រូវបានបំបែកបំបាក់នៅព្រំដែនជាប់ប្រទេសម៉ិកស៊ិកគឺមិនត្រូវបានបង្រួបបង្រួមឡើងវិញឡើយ ខណៈ ថ្ងៃកំណត់ដែលបង្គាប់ដោយតុលាការឲ្យកុមារទាំងអស់ត្រូវជួបជុំជាមួយឪពុកម្តាយរបស់ពួកគេវិញបានកន្លងផុតទៅ។
ចៅក្រមសហព័ន្ធនៅរដ្ឋកាលីហ្វ័រនីញ៉ាបានបញ្ជាឲ្យគ្រួសារអន្តោប្រវេសន៍ដែលមានសិទ្ធិទាំងអស់ត្រូវជួបជុំគ្នាវិញត្រឹមម៉ោង៦ល្ងាចហើយក្រុមមន្ត្រីបាននិយាយនៅក្នុងសាលដីកាតុលាការថា កុមារ១.៤៤២នាក់ដែលមានអាយុប្រាំឆ្នាំឡើងបានជួបជុំជាមួយឪពុកម្តាយរបស់ពួកគេវិញ។
រដ្ឋាភិបាលបាននិយាយថា “ផែនការបង្រួបបង្រួមដែលផ្តល់ទៅឲ្យតុលាការគឺកំពុងដំណើរការហើយត្រូវបានគេរំពឹងថានឹងទទួលលទ្ធផលបាននូវការបង្រួបបង្រួមឡើងវិញទាំងអស់នៃអ្នកដែលត្រូវបានរកឃើញថាមានសិទ្ធិទទួលបានការបង្រួបបង្រួមឡើងវិញត្រឹមកាលកំណត់របស់តុលាការនៅថ្ងៃទី២៦ខែកក្កដាឆ្នាំ២០១៨”។
ឯកសារតុលាការបានបន្ថែមថា កុមារចំនួន៣៧៨នាក់បន្ថែមទៀតត្រូវបានដោះលែងរួចទៅហើយនៅក្រោម “កាលៈទេសៈសមស្រប” ផ្សេងទៀតប៉ុន្តែកុមារជាង៧០០នាក់នៅតែស្ថិតក្នុងមន្ទីរឃុំឃាំងនៅឡើយ។
គួរបញ្ជាក់ជាថ្មីថា ការបំបែកបំបាក់ដ៏ចម្រូងចម្រាសបានចាប់ផ្តើមក្នុងខែឧសភានៅពេលដែលជនអន្តោប្រវេសន៍ដែលបានចូលដោយខុសច្បាប់ត្រូវបានឃាត់ខ្លួនហើយកូនៗរបស់ពួកគេត្រូវបានបញ្ជូនទៅមណ្ឌលឃុំឃាំងនិងជម្រកនានា។
សហភាពសេរីភាពស៊ីវិលអាមេរិកដែលបានដាក់ពាក្យបណ្តឹងឲ្យបង្រួបបង្រួមក្រុមគ្រួសារបាននិយាយកាលពីថ្ងៃព្រហស្បតិ៍ថា រដ្ឋាភិបាលកំពុងក្លែងបន្លំតួរលេខដើម្បីផ្តល់នូវភាពជោគជ័យមិនពិត។
ការបំបែកបំបាក់នេះបានធ្វើឲ្យមានកំហឹងនៅសហរដ្ឋអាមេរិកនិងនៅបរទេសជាពិសេសបន្ទាប់ពីការបញ្ចេញនៃសំឡេងក្មេងតូចៗនៅក្នុងជម្រកយំស្រែករកឪពុកម្តាយរបស់ពួកគេ។
សម្ពាធនេះបាននាំឲ្យប្រធានាធិបតីគណបក្សសាធារណរដ្ឋទាមទារឲ្យបញ្ចប់ការបំបែកគ្នាក្នុងរយៈពេល៦សប្តាហ៍ក្រោយ។ ចៅក្រម Dana Sabraw នៅទីក្រុង San Diego បានបញ្ជាឲ្យមានការបង្រួបបង្រួមគ្នាវិញដោយយកថ្ងៃព្រហស្បតិ៍ជាថ្ងៃកំណត់៕ AFP
Source: Kampuchea Thmey Daily
0 Comments