រដ្ឋាភិបាលក្រិកបាននិយាយកាលពីថ្ងៃព្រហស្បតិ៍ថា មានសញ្ញា “ច្បាស់លាស់” ដែលថា អគ្គិភ័យដែលសម្លាប់មនុស្សចំនួន៨២នាក់នៅក្នុងភ្លើងឆេះព្រៃដ៏អាក្រក់បំផុតរបស់ប្រទេសនេះគឺអាចត្រូវបានបង្កឡើងដោយចេតនា។
អនុរដ្ឋមន្ត្រីក្រសួងការពារប្រជាជនលោក Nikos Toskas បាននិយាយថា “ព័ត៌មានដ៏ធ្ងន់ធ្ងរមួយបាននាំឲ្យយើងបើកការស៊ើបអង្កេតមួយចូលទៅក្នុងអំពើព្រហ្មទណ្ឌនៅពីក្រោយអគ្គិភ័យកាលពីថ្ងៃចន្ទដែលបានបំផ្លិចបំផ្លាញតំបន់ឆ្នេរសមុទ្រ Mati ភាគខាងកើតទីក្រុងអាតែន”។
លោកបាននិយាយថា អាជ្ញាធរក៏កំពុងពិនិត្យមើលផងដែរថាតើអគ្គិភ័យផ្សេងទៀតដែលបានផ្ទុះឡើងកាលពីថ្ងៃចន្ទនៅជិតតំបន់ Kineta ភាគខាងលិចនៃរដ្ឋធានីក្រិកគឺត្រូវបានគេដុតដោយចេតនាដែរឬក៏អត់។ យ៉ាងណាក្តី គ្មាននរណាម្នាក់ស្លាប់ដោយសារអគ្គិភ័យនៅ Kineta ទេ។
លោក Toskas បាននិយាយក្នុងសន្និសីទសារព័ត៌មានមួយនៅទីក្រុងអាតែនថា “មានសាក្សីប៉ុន្តែខ្ញុំមិនអាចនិយាយអ្វីបានច្រើនទេនាពេលឥឡូវនេះ”។
មន្ត្រីដែលដកស្រង់ព័ត៌មានពីផែនទីផ្កាយរណបបាននិយាយថាអគ្គិភ័យចំនួន១៣បានផ្ទុះឡើងក្នុងពេលតែមួយនៅទូទាំងតំបន់ Attica ដែលរួមមានទាំងទីក្រុងអាតែនផងដែរកាលពីថ្ងៃចន្ទ។
ខណៈដែលសមាជិកគ្រួសារកំពុងជួយកំណត់អត្តសញ្ញាណសាកសពនៅថ្ងៃព្រហស្បតិ៍នោះ កំហឹងបានផ្ទុះឡើងលើរបៀបដែលអាជ្ញាធរបណ្តោយឲ្យគ្រោះមហន្តរាយនេះកើតឡើង។
ទោះបីជាយ៉ាងណាក៏ដោយ អ្នកនាំពាក្យរដ្ឋាភិបាលលោក Tzanakopoulos បានព្យាយាមដោះស្រាយការរិះគន់ដោយនិយាយថា “ការជម្លៀសប្រជាជននៅភូមិ Mati គឺមិនអាចទៅរួចនោះទេពីព្រោះបាតុភូតនេះកើតឡើងក្នុងរយៈពេលត្រឹមតែមួយម៉ោងកន្លះប៉ុណ្ណោះ”។
លោកបានបន្ថែមថា ខ្យល់ដែលមានល្បឿន១២០គីឡូម៉ែត្រក្នុងមួយម៉ោងគឺជាកំណត់ត្រាខ្លាំងបំផុតសម្រាប់រយៈពេលប្រាំបីឆ្នាំចុងក្រោយនេះ។ រដ្ឋាភិបាលក៏បានប្រកាសអំពីវិធានការដើម្បីទូទាត់សំណងដល់អ្នកដែលរងផលប៉ះពាល់ដោយអគ្គិភ័យផងដែរ។
គួរបញ្ជាក់ថា មនុស្សទី៨២ត្រូវបានប្រកាសថាស្លាប់កាលពីថ្ងៃព្រហស្បតិ៍ដោយអ្នកនាំពាក្យសេវាពន្លត់អគ្គិភ័យប៉ុន្តែមិនបញ្ជាក់ថាតើម្នាក់នោះត្រូវបានរកឃើញដោយអ្នកជួយសង្គ្រោះឬស្លាប់នៅក្នុងមន្ទីរពេទ្យនោះទេ។
មិនមានព័ត៌មានផ្លូវការណាមួយអំពីចំនួនមនុស្សដែលបាត់ខ្លួនទេបន្ទាប់ពីមានគ្រោះមហន្តរាយនេះប៉ុន្តែចំនួនអ្នកស្លាប់៨២នាក់បានធ្វើឲ្យវាក្លាយទៅជាអគ្គិភ័យសម្លាប់មនុស្សច្រើនបំផុតនៅអ៊ឺរ៉ុបក្នុងសតវត្សនេះ៕ AFP
Source: Kampuchea Thmey Daily
0 Comments