ភ្នំពេញ ៖ ក្នុងអំឡុងពេលនៃការការឃោសនារកសំឡេងឆ្នោតរបស់គណបក្សនយោបាយ ដែលមានរយៈពេល២១ថ្ងៃ ដោយចាប់ពីថ្ងៃទី០៧ ខែកក្កដា ដល់ថ្ងៃទី២៧ ខែកក្កដា ឆ្នាំ២០១៨ គណៈកម្មាធិការជាតិរៀបចំការបោះឆ្នោត (គ.ជ.ប) ទទួលបានពាក្យបណ្ដឹងសរុបចំនួន៣០ ហើយចំណោមបណ្តឹងទាំងនោះ ដោះស្រាយចប់ខ្លះ នៅសល់ខ្លះ កំពុងដោះស្រាយបន្ត នេះបើតាមការបញ្ជាក់ពី គ.ជ.ប។
សេចក្តីជូនដំណឹង ចុះថ្ងៃទី២៧ ខែកក្កដា ឆ្នាំ២០១៨ គ.ជ.ប បានបញ្ជាក់ថា សម្រាប់ដំណាក់កាលឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦នេះ គ.ជ.ប បានទទួលពាក្យបណ្ដឹងសរុបចំនួន៣០បណ្ដឹង ក្នុងនោះបណ្ដឹងនៅគណៈកម្មការឃុំសង្កាត់រៀបចំការបោះឆ្នោត (គឃ-សប) មានចំនួន២៩ បណ្ដឹង និងដើមបណ្ដឹង ប្ដឹងផ្ទាល់មកគណៈកម្មការរាជធានីខេត្តរៀបចំការបោះឆ្នោត (គធ-ខប) ចំនួន១បណ្តឹង (គិតត្រឹមថ្ងៃទី២៦ ខែកក្កដា ឆ្នាំ២០១៨)។
តាម គ.ជ.ប ក្នុងចំណោមពាក្យបណ្ដឹងទាំង២៩ នៅ គឃ-សប នោះ មានបណ្ដឹងរបស់គណបក្សប្រជាជនកម្ពុជាចំនួន៨បណ្ដឹង, គណបក្សសម្ព័ន្ធដើម្បីប្រជាធិបតេយ្យចំនួន១៤បណ្ដឹង,អាជ្ញាធរចំនួន៦បណ្ដឹង និងប្រជាពលរដ្ឋចំនួន១បណ្ដឹង ហើយបណ្តឹងទាំងនោះ ត្រូវបានផ្សះផ្សាសះជាចំនួន១៥បណ្ដឹង, ផ្សះផ្សាមិនសះជាចំនួន៩បណ្ដឹង, ធ្វើលិខិតជូនដំណឹងចំនួន២ បណ្ដឹង, ដើមបណ្ដឹងសុំដកពាក្យបណ្ដឹងចំនួន១បណ្ដឹង និងកំពុងដោះស្រាយចំនួន២បណ្ដឹង។
បន្ទាប់ពីផ្សះផ្សាមិនសះជានៅថ្នាក់ គឃ-សប ដើមបណ្ដឹងបានប្ដឹងបន្តមកថ្នាក់ គធ-ខប ចំនួន ៧បណ្ដឹង និងចំនួន១បណ្ដឹង ដាក់ផ្ទាល់មក គធ-ខប ដែលសរុបនៅថ្នាក់ គធ-ខប មានចំនួន៨ បណ្ដឹង ហើយបណ្ដឹងទាំងនោះ មកពីគណបក្សប្រជាជនកម្ពុជាចំនួន២បណ្ដឹង, គណបក្សសម្ព័ន្ធដើម្បីប្រជាធិបតេយ្យចំនួន៣បណ្ដឹង និងអាជ្ញាធរចំនួន៣បណ្ដឹង។ បណ្តឹងទាំងនោះ កំពុងដោះស្រាយចំនួន១បណ្ដឹង, ធ្វើលិខិតជូនដំណឹងចំនួន១បណ្ដឹង, ដើមបណ្ដឹងសុំដកពាក្យចំនួន១បណ្ដឹង និងយល់ព្រមតាមពាក្យបណ្ដឹងផាកពិន័យជាប្រាក់១០លានរៀលចំនួន៥បណ្ដឹង។
សូមបញ្ជាក់ថា ប្រសិនបើភាគីណាមួយមិនពេញចិត្តទៅនឹងសេចក្តីសម្រេចរបស់ គធ-ខប ភាគីនោះ មានសិទ្ធិប្ដឹងបន្តមកកាន់ គ.ជ.ប និងតាមនីតិវិធីជាបន្តបន្ទាប់៕
Source: Kampuchea Thmey Daily
0 Comments