ក្រុម​ភ្នំពេញ​ក្រោ​ន ធ្វើដំណើរ​ទៅ​ចែករំលែក​បទពិសោធន៍​បាល់ទាត់​នៅ​ខេត្តកំពត​

ក្រុម​ភ្នំពេញ​ក្រោ​ន បានធ្វើ​ដំណើរ​ទៅ​ចែករំលែក​បទពិសោធន៍​បាល់ទាត់ (Football Clinic) នៅ​ទឹកដី​ខេត្តកំពត នៅ​ថ្ងៃ​ច័ន្ទ ទី​២៣ ខែកក្កដា ឆ្នាំ​២០១៨ មុន​បន្ត​បេសកម្ម​ក្នុង​ពានរង្វាន់​ជម្រើស​ជើងឯក​ជាតិ (Metfone Cambodian League 2018) នៅ​ថ្ងៃ​សុក្រ សប្ដាហ៍​នេះ​។

យោង​តាម​សេចក្តីជូនដំណឹង​របស់​ក្លិប​ជើងឯក​៦​សម័យកាល​មួយ​នេះ​បាន​បញ្ជាក់ថា ​ក្រុម​​គ្រូបង្វឹក កីឡាករ ក៏ដូចជា​បុគ្គលិក​នៃ​ក្លឹប​បាល់ទាត់​ភ្នំពេញ​ក្រោ​ន បានធ្វើ​ដំណើរ​ទៅកាន់​ខេត្តកំពត ដើម្បី​ចូលរួម​កម្មវិធី Football Clinic ក្រោម​កិច្ចសហការ​ជាមួយនឹង​ក្រុមហ៊ុន SCG​។ ក្នុង​ដំណើរ​ឆ្ពោះទៅកាន់​ទឹកដី​ដ៏​ស្រស់ស្អាត​នេះ ក្រុម​កីឡាករ​របស់​ភ្នំពេញ​ក្រោ​ន រួម​ជា​មួយ​បុគ្គលិក​ទាំងអស់​បាន​ចូលរួម​ចែករំលែក​បទពិសោធន៍​ដល់​ក្រុម​កុមារ​តូចៗ​អំពី​មូលដ្ឋាន ក៏ដូចជា​បច្ចេកទេស​ខ្លះៗ​នៃ​កីឡាបាល់ទាត់​នៅ​រោងចក្រ​ក្រុមហ៊ុន SCG ផ្ទាល់​តែម្តង​។

ក្រុម​ភ្នំពេញ​ក្រោ​ន តែងតែ​ធ្វើដំណើរ​ទៅ​ធ្វើ Football Clinic នៅតាម​បណ្តា​ខេត្ត​នានា​ក្នុងពេល​កន្លងទៅ ខណៈ​នេះ​ជា​លើក​ទី​ពីរ​ហើយ​ ដែល​ក្លិប​នៅ​រាជធានី​ភ្នំពេញ មួយ​នេះ​បាន​ចូលរួម​ក្នុង​កម្មវិធី Football Clinic ក្នុង​ខេត្តកំពត ដែល​កាលពី​លើកទីមួយ​ធ្វើដំណើរ​ទៅ​អំឡុង​ខែសីហា ឆ្នាំ​២០១៧ កន្លងទៅ​ដោយមាន​អ្នកចូលរួម​ចំនួន​ប្រមាណ​ជាង ២០០​នាក់​។



​ក្រុម​ភ្នំពេញ​ក្រោ​ន ក្រោម​ការដឹកនាំ​របស់​លោក Sean Sainsbury ជា​គ្រូបង្វឹក​ជនជាតិ​អង់គ្លេស សំបូរ​ទៅ​ដោយ​កីឡាករ​វ័យក្មេង​ច្រើន​អមដោយ​កីឡាករ​បរទេស​ដែលមាន​សមត្ថភាព​។ ក្រុម​នេះ​នៅតែ​ជា​បេក្ខភាព​មួយ​ក្នុង​ការ​ប្រជែង​យកពាន​នៅ​រដូវ​កាល​នេះ​និង​ជា​ពាន​លើក​ទី​៧​ប្រចាំ​ក្លិប​របស់ខ្លួន​ផងដែរ​។ ប្រកួត​បាន​១៤​លើក​មកនេះ​ភ្នំពេញ​ក្រោ​ន ឈរ​ចំណាត់ថ្នាក់​លេខ​៥ មាន​២១​ពិន្ទុ​ក្រោយ​ឈ្នះ​បាន​៦​លើក ស្មើ​៣​លើក និង​ចាញ់​៤​លើក​។

ភ្នំពេញ​ក្រោ​ន នៅសល់​ពានរង្វាន់​លី​គ​កំពូល​កម្ពុជា និង​ពានរង្វាន់​សម្តេច​តេ​ជោ ហ៊ុន សែន ក្នុង​ដៃ​។ ភ្នំពេញ​ក្រោ​ន ត្រូវ​ប៉ះ​ក្រុម​ណាហ្គា​វើ​ល នៅ​សប្ដាហ៍​ទី​១៥ ប្រចាំ​ពានរង្វាន់​លី​គ​កំពូល​កម្ពុជា នៅ​ថ្ងៃទី​២៧ ខែកក្កដា ក្រោយ​លើក​ពេល​កាលពី​ចុង​សប្តាហ៍​កន្លងទៅ​។ ចំណែក​ក្នុង​ពានរង្វាន់​សម្តេច​តេ​ជោ ហ៊ុន សែន​ វគ្គ៨ក្រុម​ ចុងក្រោយ​វិញ​ភ្នំពេញក្រោន​ត្រូវ​ប៉ះ​ក្រុម​អង្គរថាយហ្គឺរ៕

 

Source: Kampuchea Thmey Daily