បាត់ដំបង ៖ រហូតមកដល់ពេលនេះ ក្រុមយុទ្ធនាការម្រាមដៃស្អាត ដែលគេស្គាល់ថា ជាអតីតសកម្មជនអតីតគណបក្សសង្គ្រោះជាតិ នៅខេត្តបាត់ដំបងបានទទួលរងបណ្តឹងចំនួន៥ បណ្តឹង ពីក្រុមប្រឹក្សាឃុំ និងភ្នាក់ងារគណបក្សប្រជាជនកម្ពុជា នៅខេត្តបាត់ដំបង បន្ទាប់ពីពួកគេបានដឹកនាំធ្វើយុទ្ធនាការម្រាមដៃស្អាត នៅក្នុងទឹកដីខេត្តបាត់ដំបង ដើម្បីប្រឆាំងចំពោះការបោះឆ្នោត នៅថ្ងៃទី២៩ ខែកក្កដា ឆ្នាំ២០១៨ ខាងមុខ នេះបើតាមការបញ្ជាក់ពីអគ្គលេខាធិការរង គ.ជ.ប។
លោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) បានប្រាប់កម្ពុជាថ្មី កាលពីរសៀលថ្ងៃទី២៣ ខែកក្កដា ឆ្នាំ២០១៨ថា នៅខេត្តបាត់ដំបង មានករណីក្រុមប្រឹក្សាឃុំប្តឹងអ្នកធ្វើយុទ្ធនាការម្រាមដៃស្អាត ដែលមាន៥បណ្តឹង ហើយឥឡូវនេះ ឃុំមានផ្សះផ្សាមិនសះជា ហើយបណ្តឹងបានមកដល់គណៈកម្មការរៀបចំការបោះឆ្នោតខេត្តបាត់ដំបង តែមិនទាន់មកដល់ គ.ជ.ប នៅឡើយទេ។
តាមឯកសារដែលកម្ពុជាថ្មីទទួលបានបញ្ជាក់ថា នៅខេត្តបាត់ដំបងមាន៥បណ្តឹង ក្នុងនោះគណបក្សប្រជាជនកម្ពុជា មាន២បណ្តឹង និងជំទប់ទី២ មាន៣បណ្តឹង។ នៅក្នុងចំណោមបណ្តឹងទាំងនោះ ឈ្មោះ ពីវ ហួយ ជាភ្នាក់ងារគណបក្សប្រជាជនកម្ពុជា បានប្តឹងឈ្មោះ ជា ជីវ ដោយហេតុថា កាលពីថ្ងៃទី១៩ ខែកក្កដា ឆ្នាំ២០១៨ វេលាម៉ោង១១ និង១០នាទីព្រឹក ឈ្មោះ ជា ជីវ ដែលជាអតីតប្រធានគណបក្សសសង្គ្រោះជាតិ នៅខេត្តបាត់ដំបង និងបក្សពួក ជួបជុំគ្នា នៅភូមិជំនីក ឃុំអន្លង់វិល ស្រុកសង្កែ ដែលជាផ្ទះរបស់ឈ្មោះ ជា ជីវ ដើម្បីអនុវត្តយុទ្ធនាការម្រាមដៃស្អាត របស់អតីតគណបក្សសង្គ្រោះជាតិ និងចលនាសង្គ្រោះជាតិ។
តាមឯកសារ មិនបានបញ្ជាក់ថា មានឈ្មោះអ្វីខ្លះទៀតទេ ដែលរងបណ្តឹង ប៉ុន្តែតាមអ្វីដែលការិយាល័យយើងទទួលបាន គឺមានអតីតតំណាងរាស្ត្រគណបក្សសង្គ្រោះជាតិខេត្តបាត់ដំបងមួយរូបផងដែរ ហើយអ្នកដែលសកម្មក្នុងការអនុវត្តយុទ្ធនាការម្រាមដៃស្អាតនេះ ត្រូវបានគេស្គាល់ថា ឈ្មោះ ស ចាន់ដេត។
យុទ្ធនាការម្រាមដៃស្អាត ត្រូវបានបានចាត់ទុកថា ជាការរារាំងដល់ការបោះឆ្នោត ដែលត្រូវទទួលការពិន័យជាប្រាក់ពី៥លាន ទៅ២០លានរៀល តាមមាត្រា១៤២ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ។
សូមបញ្ជាក់ថា នៅថ្ងៃទី២៣ ខែកក្កដា ឆ្នាំ២០១៨ តាមព័ត៌មានមួយចំនួនបានអះអាងថា ភ្នាក់ងារគណបក្សប្រជាជនកម្ពុជា នៅមូលដ្ឋានខេត្តបាត់ដំបង បានដាក់ពាក្យប្តឹងអតីតមន្ត្រីគណបក្សសង្គ្រោះជាតិ ប្រមាណ៣០នាក់ ពីបទធ្វើយុទ្ធនាការម្រាមដៃស្អាតនេះផងដែរ ប៉ុន្តែព័ត៌មាននេះ ត្រូវបានលោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា លោកនឹងពិនិត្យមើល៕
Source: Kampuchea Thmey Daily
0 Comments