យោងតាមឯកសាររួមមួយដែលដាក់ដោយរដ្ឋាភិបាលសហព័ន្ធនិងសហភាពសេរីភាពស៊ីវិលអាមេរិក (ACLU) កាលពីថ្ងៃចន្ទបានឲ្យដឹងថា ឪពុកម្តាយជនអន្តោប្រវេសន៍ជាង៤៥០នាក់ដែលត្រូវបានបំបែកចេញពីកូនរបស់ពួកគេនៅពេលពួកគេចូលសហរដ្ឋអាមេរិកដោយខុសច្បាប់គឺលែងស្ថិតនៅក្នុងប្រទេសនេះទៀតហើយថ្វីបើកូនៗរបស់ពួកគេស្ថិតនៅក៏ដោយ។
អវត្តមានរបស់ឪពុកម្តាយចំនួន៤៦៣នាក់ដែលមេធាវីរដ្ឋាភិបាលសហរដ្ឋអាមេរិកនិយាយថា “កំពុងស្ថិតក្រោមការពិនិត្យឡើងវិញ” នោះគឺអាចរាំងស្ទះដល់កិច្ចខិតខំប្រឹងប្រែងរបស់រដ្ឋាភិបាលក្នុងការបង្រួបបង្រួមក្រុមគ្រួសារដែលបែកបាក់គ្នាត្រឹមថ្ងៃព្រហស្បតិ៍ដែលជាថ្ងៃកំណត់ដាក់បញ្ជាដោយចៅក្រមសហព័ន្ធ។
ឯ
កសារនេះមិនបាននិយាយពីមូលហេតុដែលឪពុកម្តាយ៤៦៣នាក់ត្រូវចាកចេញពីប្រទេសនោះទេប៉ុន្តែមន្ត្រីរដ្ឋាភិបាលធ្លាប់បានទទួលស្គាល់ថា ឪពុកម្តាយខ្លះអាចត្រូវបាននិរទេសដោយគ្មានកូនរបស់ពួកគេ។
យោងតាមឯកសារនេះបានឲ្យដឹងថា គិតមកដល់ថ្ងៃចន្ទ ឪពុកម្តាយចំនួន៨៧៩នាក់បានជួបជុំគ្នាឡើងវិញជាមួយកូនៗរបស់ពួកគេ។
កុមារប្រហែល២,៥០០នាក់ត្រូវបានបំបែកពីឪពុកម្តាយរបស់ពួកគេបន្ទាប់ពីរដ្ឋបាលលោក Trump បានប្រកាសគោលនយោបាយ “គ្មានការអត់ឱន” កាលពីខែមេសាក្នុងគោលបំណងបំបាត់ទឹកចិត្តការធ្វើអន្តោប្រវេសន៍ខុសច្បាប់។ គោលនយោបាយនេះត្រូវបានបញ្ចប់នៅខែមិថុនាចំពេលមានការរិះគន់ជាអន្តរជាតិអំពីឥរិយាបទរបស់រដ្ឋាភិបាលចំពោះកុមារអន្តោប្រវេសន៍។
ចៅក្រមអាមេរិកលោក Dana Sabraw នៅទីក្រុង San Diego បានចេញបញ្ជាកាលពីខែមុនថា រដ្ឋាភិបាលត្រូវតែបង្រួបបង្រួមកូនៗជាមួយឪពុកម្តាយរបស់ពួកគេវិញនៅក្នុងករណីមួយដែលនាំមកដោយ ACLU ។
កាលពីថ្ងៃចន្ទរដ្ឋាភិបាលក៏បាននិយាយផងដែរថា ឪពុកម្តាយចំនួន៩១៧នាក់គឺមិនមានសិទ្ធិទទួលបានការជួបជុំឬមិនទាន់ត្រូវបានគេដឹងថាមានសិទ្ធិអាចជួបជុំជាមួយកូនរបស់ពួកគេបានឬក៏អត់នោះទេ។ ចំនួននេះរាប់បញ្ចូលទាំងឪពុកម្តាយដែលលែងស្ថិតនៅក្នុងប្រទេសក៏ដូចជាអ្នកដែលសន្មតថាមិនសមស្របដោយសារតែបទល្មើសព្រហ្មទណ្ឌឬសម្រាប់មូលហេតុផ្សេងទៀតផងដែរ៕ REUTERS
Source: Kampuchea Thmey Daily
0 Comments