ភ្នំពេញ ៖ បុរសម្នាក់បានសន្លប់ស្ដូកស្តឹង ចំណែកនារីម្នាក់ទៀតដែលគេអះអាងថា ជាសង្សារបានរងរបួសបែកមុខបែកមាត់ឈាមហូរជោកខ្លួនផងដែរ ក្រោយពីមានហេតុការណ៍គ្រោះថ្នាក់ចរាចរណ៍ ដោយបើកបរម៉ូតូឌុបគ្នាក្នុងល្បឿនលឿន ហើយដោយខ្វះការប្រុងប្រយ័ត្ន និងមិនពាក់មួកសុវត្ថិភាព ជិះឡើងទួលរេចង្កូតរអិលដួលបោកទៅនឹងថ្នល់ អូសជិត១០ម៉ែត្រនោះ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង១២យប់រំលងអធ្រាត្រឈានចូលថ្ងៃទី២៨ ខែកក្កដា ឆ្នាំ២០១៨ ស្ថិតនៅតាមបណ្ដោយផ្លូវមុនីរ៉េត មុខធនាគារមេគង្គ (ជិតស្តុប Intercon) ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
ជនរងគ្រោះទាំង២នាក់ជិះម៉ូតូម៉ាក Suzuki Nex ពណ៌ស ពាក់ស្លាកលេខភ្នំពេញ 1CT-9954។ ក្រោយកើតហេតុភ្លាមនោះ បុរសដែលរបួសធ្ងន់សន្លប់ស្ដូកស្ដឹងក្នុងថ្លុកឈាមរួមទាំងនារី ដែលរបួសបែកមុខ ត្រូវបានរថយន្តគិលានសង្គ្រោះគ្លីនិកឯកជនដឹកយកទៅសង្គ្រោះភ្លាមៗ។ ចំណែកឯម៉ូតូរបស់ជនរងគ្រោះត្រូវបានសមត្ថកិច្ចចុះមកយកទៅរក្សាទុកនៅប៉ុស្តិ៍ដើម្បីរង់ចាំម្ចាស់មកយកពេលក្រោយ៕
Source: Kampuchea Thmey Daily
0 Comments