កណ្តាល ៖ កាលពីថ្ងៃសុក្រ ១៥កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៧ ខែកក្កដា ឆ្នាំ២០១៨ លោក ស៊ុន ចាន់ថុល សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈអចិន្ត្រៃយ៍គណៈពង្រឹងមូលដ្ឋានស្រុកកោះធំ បានអញ្ជើញដឹកនាំក្បួនដង្ហែទ្រង់ទ្រាយធំក្នុងពិធីបិទបញ្ចប់យុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៦ ប្រមូលផ្ដុំ និងចេញដំណើរហែរក្បួននៅកីឡាដ្ឋានស្រុកកោះធំ ស្ថិតក្នុងភូមិព្រែកថ្មី ឃុំព្រែកថ្មី ស្រុកកោះធំ។
សមាសភាពដែលអញ្ជើញចូលរួមនាឱកាសនោះរួមមាន សមាជិកសមាជិកាគណៈកម្មាធិការគណបក្សស្រុក គណៈពង្រឹងមូលដ្ឋានស្រុក ឃុំ ភូមិ គណៈកម្មាធិការគណបក្សឃុំ សាខាបក្សភូមិ សមាជិកសមាជិកាគណបក្សមូលដ្ឋានសរុបប្រមាណ១០៥០០ នាក់។
មធ្យោបាយធ្វើដំណើរចូលរួមក្បួនដង្ហែរួមមានរថយន្តចំនួន ១២៤គ្រឿង ម៉ូតូមានចំនួន ៣.៧៣៥ម៉ូតូ រថយន្តគណៈពង្រឹង ១៥៨គ្រឿង និងកង់សណ្តោងស្លាកគណបក្ស ចំនួន ១០០គ្រឿង។
បន្ទាប់ពីស្តាប់សាររបស់សម្តេចអគ្គមហាសេនាបតីតេជោប្រធានគណបក្សរួច លោកប្រធានគណៈអចិន្ត្រៃយ៍ បានផ្តាំផ្ញើដល់សមាជិកសមាជិកាបក្សដែលបានចូលរួមហែក្បួន សូមរក្សាសណ្តាប់ធ្នាប់ សេចក្តីថ្លៃថ្នូរ មានភាពចាស់ទុំនយោបាយ គោរពច្បាប់ចរាចរណ៍ មិនប្រើប្រាស់អំពើហិង្សា មានការអធ្យាស្រ័យខ្ពស់ និងមានភាពអត់ធ្មត់ខ្ពស់។
លោកប្រធានគណៈអចិន្ត្រៃយ៍ បានបន្ថែមទៀតថា យើងទាំងអស់គ្នាជាសមាជិក សមាជិកាគណបក្សប្រជាជនកម្ពុជាត្រូវការពារសុខសន្តិភាព ឲ្យខាងតែបានលុះក្នុងតម្លៃណាក៏ដោយ ពីព្រោះសុខសន្តិភាព និង ការអភិវឌ្ឍដែលកើតឡើងនៅលើទឹកដីកម្ពុជាយើងនេះ គឺបានមកពីពលិកម្មដ៏ធំធេង មិនអាចកាត់ថ្លៃបានរបស់គណបក្សប្រជាជននៅគ្រប់ដំណាក់កាល។
ជាមួយគ្នានេះផងដែរ លោក ស៊ុន ចាន់ថុល បានគូសបញ្ជាក់ថា រាជរដ្ឋាភិបាលនឹងបន្តកិច្ចខិតខំប្រឹងប្រែងអភិវឌ្ឍវិស័យដឹកជញ្ជូនផ្លូវគោក វិស័យដឹកជញ្ជូនតាមផ្លូវទឹក និងវិស័យដឹកជញ្ជូនតាមផ្លូវដែកឲ្យមានការរីកចម្រើនថែមទៀត ដើម្បីជំរុញកំណើនសេដ្ឋកិច្ចប្រកបដោយចីរភាព និងលើកកម្ពស់កំរិតជីវភាពរបស់ប្រជាពលរដ្ឋឲ្យមានភាពរុងរឿង។
សូមបញ្ជាក់ថា ពិធីបិទយុទ្ធនាការឃោសនាបោះឆ្នោតនៅថ្ងៃនេះ បានបង្ហាញថាកម្ពុជាបាននឹងកំពុងការពារបានយ៉ាងរឹងមាំរាល់សមិទ្ធផលនៃសង្គមជាតិ ការពារឯករាជ្យជាតិ និងអធិបតេយ្យជាតិ ការពារឆន្ទៈ និងផលប្រយោជន៍របស់ប្រជាជនបានយ៉ាងរឹងមាំ ដែលប្រការនេះបានបញ្ជាក់យ៉ាងច្បាស់ថា កម្ពុជាមានសុខសន្តិភាព សន្តិសុខសណ្ដាប់ធ្នាប់ និងសុវត្ថិភាពសង្គម និងបានលើកកម្ពស់លទ្ធិប្រជាធិបតេយ្យសេរីពហុបក្សដ៏ត្រឹមត្រូវនៅកម្ពុជា។
លោកប្រធានគណៈអចិន្ត្រៃយ៍ ក៏បានជំរុញឲ្យមហាគ្រួសារបក្ស ខិតខំប្រឹងប្រែងផ្សព្វផ្សាយគោលនយោបាយ ក៏ដូចជាសមិទ្ធផលសម្រេចបានរបស់គណបក្សប្រជាជនកម្ពុជាជូនប្រជាពលរដ្ឋឲ្យបានជ្រាបច្បាស់ និងផ្ដាំផ្ញើឲ្យពួកគាត់អញ្ជើញទៅបោះឆ្នោតឲ្យបានគ្រប់ៗគ្នា និងបោះឆ្នោតជូនគណបក្សប្រជាជនកម្ពុជាដែលមានលេខរៀងទី២០ មានរូបទេវត្តាបាចផ្កាជាសម្គាល់ ដើម្បីឲ្យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាអាចបន្តការដឹកនាំប្រទេសឲ្យកាន់តែមានការរីកច្រើនថែមទៀត៕
Source: Kampuchea Thmey Daily
0 Comments