ភ្នំពេញ ៖ ជាការពិតណាស់ ស្ត្រីដែលធ្លាប់សម្រាលកូនដោយការវះកាត់ពិតជាមានចម្ងល់ពីការសម្រាលកូននៅពេលមានផ្ទៃពោះលើកក្រោយ ព្រោះស្ត្រីមួយចំនួនយល់ថា គាត់ពុំអាចសម្រាលបានទេ ហើយត្រូវតែធ្វើការវះកាត់ម្តងទៀតនៅពេលមានផ្ទៃពោះលើកក្រោយនោះ។
បើយោងតាមការសិក្សាបង្ហាញឲ្យឃើញថា ៥០% នៃស្ត្រីដែលមានស្បូនធ្លាប់ធ្វើការវះកាត់ និងមានអាងត្រគាកប្រហាក់ប្រហែលធម្មតា អាចសម្រាលកូនតាមផ្លូវធម្មជាតិដោយគ្មានផលវិបាក ប៉ុន្តែត្រូវស្ថិតនៅក្រោមការតាមដាន និងវាយតម្លៃហ្មត់ចត់ពីគ្រូពេទ្យជំនាញផ្នែកសម្ភព។
កត្តាដែលកំណត់ថា ស្ត្រីអាចសម្រាលកូនតាមផ្លូវធម្មជាតិបាន គឺផ្អែកទៅលើ ប្រវត្តិវះកាត់ពីមុន (វះដោយការបញ្ហាអ្វី ផ្ទៃពោះគ្រប់ខែឬទេ? ប្រភេទវះកាត់ ការវិវត្តន៍ជំងឺក្រោយការវះកាត់)និងប្រវត្តិផ្នែកសម្ភព និងរោគស្ត្រី (ឧ. វះកាត់ស្បូន) ការវាយតម្លៃទម្ងន់ទារ ការវាយតម្លៃទៅលើអាងត្រគាក ការវាយតម្លៃមាត់ស្បូន (ការបើកនៃមាត់ស្បូន និងកម្ពស់ទម្ងន់កូន)។
ស្ត្រីអាចប្រឈមមុខនឹងការរហែកស្បូន ក្នុងពេលកំពុងពរពោះ និងក្នុងពេលឈឺពោះសម្រាល ដែលអាចបង្កគ្រោះថ្នាក់ដល់ម្តាយ និងទារកក្នុងផ្ទៃ (អត្រាស្លាប់ទារកមានប្រហែល ៥.៥% ក្នុងករណីរហែកស្បូន)។ក្នុងពេលពរពោះអត្រានៃការរហែកស្បូនដោយឯកឯង គឺជួបដោយកម្រ និងមានកម្រិតទាប។
ក្នុងពេលឈឺពោះសម្រាលអត្រានៃការរហែកស្បូនមានខ្ពស់ ដែលតម្រូវឲ្យមានការតាមដានទៅលើការតាមដានចង្វាក់បេះដូងកូន ការធ្លាក់ឈាម ការឈឺចាប់ត្រង់ថ្នេរវះ ការកន្ត្រាក់ស្បូនរាល់ការប្រែប្រួលចង្វាក់បេះដូងកូន (ញាប់ពេក យឺតពេក ចង្វាក់រាបស្មើ) លាយឡំការធ្លាក់ឈាម។
ការឈឺចាប់ខ្លាំងនៅត្រង់ថ្នេរវះ ការកន្ត្រាក់នៃស្បូនញាប់ហើយខ្លាំងៗ ឬបាត់ការកន្ត្រាក់នៃស្បូន គឺជាសញ្ញានៃការត្រៀមនឹងរហែក ឬរហែកស្បូន។
ស្ត្រីដែលស្បូនធ្លាប់វះកាត់ហើយ និងកំពុងតែពរពោះ បើសិនជាមានការឈឺពោះ ត្រូវតែសម្រាកពេទ្យដូច្នេះហើយ គប្បីមកពិគ្រោះផ្ទៃពោះជាមួយគ្រូពេទ្យជំនាញដើម្បីពិភាក្សាពីការសម្រាលកូនលើកក្រោយ ការប្រើប្រាស់ថ្នាំមួយចំនួនត្រូវបានហាមឃាត់ ក្នុងពេលតាមដានការសម្រាល។ ប្រសិនបើស្ត្រី ស្នើសុំធ្វើការវះកាត់ម្តងទៀត ក្រោយពីការខ្វល់ពីផលចំណេញ ដែលប៉ះពាល់ពីគ្រូពេទ្យជំនាញ ការវះកាត់នឹងត្រូវបានធ្វើដោយគ្រូពេទ្យជំនាញ។
ករណីពិសេសមួយចំនួនការវះកាត់ត្រូវធ្វើដោយជៀសមិនបានដូចជាស្បូនដែលធ្លាប់ឆ្លងកាត់ការវះកាត់ ២ដងរួចហើយកូនបញ្ច្រាស កូនថ្លោស កូនភ្លោះឬច្រើន។
ស្ត្រីគ្រប់រូបអាចមកពិគ្រោះជាមួយវេជ្ជបណ្ឌិតជំនាញផ្នែកសម្ភពនៃមន្ទីរពេទ្យជំនាញដើម្បីទទួលការប្រឹក្សាយោបល់ដ៏ល្អ ដែលធានានូវសុខមាលភាព សុវត្ថិភាព នៅមុន និងក្រោយសម្រាល ជាពិសេសអំឡុងពេលសម្រាល៕
Source: Kampuchea Thmey Daily
0 Comments