បុរសអាយុ២៩ឆ្នាំម្នាក់ ដែលបានបើកការបាញ់ប្រហារទៅលើអ្នកចូលភោជនីយដ្ឋាននិងអ្នកថ្មើរជើងនៅលើផ្លូវទីក្រុងតូរ៉ុនតូនាពេលយប់ដោយសម្លាប់មនុស្សចំនួន២នាក់ និងរងរបួស១៣នាក់គឺមានបញ្ហាសុខភាពផ្លូវចិត្តធ្ងន់ធ្ងរ។ នេះបើតាមការឲ្យដឹងពីគ្រួសាររបស់គាត់កាលពីថ្ងៃចន្ទ។
ប៉ូលិសបានកំណត់អត្តសញ្ញាណខ្មាន់កាំភ្លើងរូបនេះថាមានឈ្មោះ Faisal Hussain ដែលជាអ្នកក្រុងតូរ៉ុនតូ។ គាត់ត្រូវបានគេប្រទះឃើញស្លាប់នៅជិតកន្លែងកើតហេតុនៃការបាញ់ប្រហារនោះបន្ទាប់ពីការបាញ់តបតជាមួយប៉ូលិស។
មេប៉ូលិសក្រុងតូរ៉ុនតូលោក Mark Saunders បាននិយាយថា ស្ត្រីអាយុ១៨ឆ្នាំម្នាក់និងកុមារីអាយុ១០ឆ្នាំម្នាក់ត្រូវបានសម្លាប់នៅក្នុងការបាញ់ប្រហារនេះហើយមនុស្ស១៣នាក់ដែលមានអាយុពី១០ទៅ៥៩ឆ្នាំបានរងរបួសដោយមួយចំនួនរបួសធ្ងន់ធ្ងរ។
អាជ្ញាធរមិនទាន់កំណត់នៅឡើយទេអំពីការជំរុញចំពោះការវាយប្រហារនេះដែលបានកើតឡើងក្នុងសង្កាត់ Greektown នៃទីក្រុងតូរ៉ុនតូនៅវេលាម៉ោងប្រហែល១០យប់ថ្ងៃអាទិត្យ។
ក្នុងសេចក្តីថ្លែងការណ៍មួយទៅកាន់ទូរទស្សន៍ CBC News, ក្រុមគ្រួសាររបស់លោក Hussain បានថ្កោលទោសចំពោះសកម្មភាពគួរឲ្យរន្ធត់របស់គាត់ដោយនិយាយថា គាត់មានបញ្ហាផ្លូវចិត្ត។
សេចក្តីថ្លែងការណ៍របស់គ្រួសារនេះបាននិយាយថា “កូនប្រុសរបស់យើងមានបញ្ហាសុខភាពផ្លូវចិត្តធ្ងន់ធ្ងរ មានរោគចិត្តនិងមានជំងឺធ្លាក់ទឹកចិត្តពេញមួយជីវិតរបស់គាត់”។ គ្រួសារបាននិយាយថា “ខណៈដែលយើងខិតខំប្រឹងប្រែងដើម្បីជួយគាត់ពេញមួយជីវិតរបស់គាត់ឲ្យតស៊ូនិងយកឈ្នះការឈឺចាប់នោះ យើងមិនអាចស្រមៃដល់ការបំផ្លិចបំផ្លាញរបស់គាត់បែបនេះទេ”។
រូបភាពវីដេអូដែលបង្ហោះដោយបណ្តាញសារព័ត៌មានកាណាដាបានបង្ហាញថា លោក Hussain ដែលស្លៀកពាក់ពណ៌ខ្មៅបានដើរលើចិញ្ចើមផ្លូវហើយភ្លាមៗនោះគាត់បានទាញកាំភ្លើងនិងបាញ់ចូលទៅក្នុងភោជនីយដ្ឋានមួយ។
សាក្សីបាននិយាយថា ការបាញ់ប្រហារនេះមានរយៈពេលត្រឹមតែពីរបីនាទីប៉ុណ្ណោះហើយបានបង្កឲ្យមានការភ័យស្លន់ស្លោរនៅក្នុងសង្កាត់ដែលជាទីពេញនិយមជាមួយនឹងបារនិងភោជនីយដ្ឋានមួយនេះ។
ការបាញ់ប្រហារនេះបានកើតឡើងចំពេលមានការព្រួយបារម្ភអំពីការកើនឡើងនៃការបាញ់ប្រហារនៅក្នុងទីក្រុងដ៏ធំបំផុតរបស់ប្រទេសកាណាដាមួយនេះ។
ប្រទេសកាណាដាមានកម្រិតទាបនៃអំពើហិង្សាដោយកាំភ្លើងជាពិសេសបើប្រៀបធៀបទៅនឹងសហរដ្ឋអាមេរិកដែលនៅជិតខាង៕ AFP
Source: Kampuchea Thmey Daily
0 Comments