បន្ទាយមានជ័យ ៖ លោកវរសេនីយ៍ទោ សៅ សារឿន អធិការនគរបាលស្រុកថ្មពួក សហការ និងកម្លាំងប៉ុស្តិ៍នគរបាលបន្ទាយឆ្មារ ដឹកនាំកម្លាំងនគរបាល១ក្រុម ចុះប្រតិបត្តិការ បង្ក្រាបមុខសញ្ញា ជួញដូរនិងប្រើប្រាស់គ្រឿងញៀន នៅចំណុចខាងលិចទីស្នាក់ការក្រុមហ៊ុនជាតិអភិវឌ្ឍន៍ ចំងាយ ៥០០ម៉ែត្រ ស្ថិតភូមិ ថ្មរមៀលកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ បានឃាត់ខ្លួនអ្នកលក់ និងជក់គ្រឿងញៀនបានចំនួន ៣នាក់។
កម្លាំងនគរបាលបានធ្វើការដកហូតវត្ថុតាងរួមមាន ថ្នាំញៀន ចំនួន១៩៦គ្រាប់ និងទូរស័ព្ទចំនួន ៣ គ្រឿង នៅវេលាម៉ោង១១ថ្ងៃត្រង់ នៅថ្ងៃទី ១ខែកក្កដា ឆ្នាំ២០១៨។
លោកវរសេនីយ៍ទោ សៅ សារឿនបានប្រាប់អ្នកយកព័ត៌មានឲ្យដឹងថា ការចុះប្រតិបត្តិការចុះបង្ក្រាបករណីជួញដូរ និង ប្រើប្រាស់គ្រឿងញៀននេះ ដោយមានការទទួលព័ត៌មានពីមន្ត្រីជំនាញស៊ើបអង្កេតក្នុងករណីគ្រឿងញៀន ទើបកម្លាំងនគរបាលចុះឃាត់ខ្លួនបានជនសង្ស័យបានចំនួន៣នាក់ ១ មាន ឈ្មោះ ហេង វេ ភេទប្រុស អាយុ ៣៣ឆ្នាំប្តី ២មានឈ្មោះ ជួ ម៉ី ហៅលីតា ស្រីអាយុ ៣៣ឆ្នាំ ជាប្រពន្ធទាំង២នាក់ ប្តីប្រពន្ធ ជួញដូរ និងប្រើប្រាស់គ្រឿងញៀន ៣ មានឈ្មោះ វិត ជួ ភេទប្រុស អាយុ២២ឆ្នាំ អ្នកជក់គ្រឿងញៀនទាំង៣នាក់ រស់នៅភូមិថ្មរមៀលកើត ឃុំបន្ទាយឆ្មារស្រុកថ្មពួក ខេត្តបន្ទាយមានជ័យ។
លោកវរសេនីយ៍ទោ សៅ សារឿន បានបញ្ជាក់ឲ្យដឹងទៀតថា ជនសង្ស័យទាំង៣នាក់នេះត្រូវបានកម្លាំងជំនាញគ្រឿងញៀន នៃអធិការនគរបាលស្រុកថ្មពួក បានបញ្ជូនទៅការិយាល័យគ្រឿងញៀនស្នងការនៃស្នងការដ្ឋាននគរបាលខេត្តបន្ទាយមានជ័យ ហើយបន្តកសាងសំណុំរឿងទៅតុលាខេត្ត ដើម្បីចាត់ការទៅតាមផ្លូវច្បាប់បន្ត៕
Source: Kampuchea Thmey Daily
0 Comments