រតនគិរី ៖ លោក ថង សាវុន អភិបាលខេត្តរតនគិរី នៅព្រឹកថ្ងៃទី២៣ ខែកក្កដា ឆ្នាំ២០១៨នេះ បានប្រគល់ម៉ូតូចំនួន៥០គ្រឿង ដែលជាអំណោយរបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចែកជូននគរបាលប៉ុស្តិ៍រដ្ឋាបាលទាំង៥០ ឃុំ.សង្កាត់ ក្នុងក្រុង.ស្រុកទាំង៩ក្នុងខេត្ត ព្រមទាំងសៀវភៅផ្ទាំងធំ របស់ប៉ុស្ដិ៍នគរបាលរដ្ឋបាល ដែលផ្ដល់ជូនពីអគ្គស្នងការនគរបាលជាតិ និងប្រឡង់ដៃសន្តិសុខបោះឆ្នោត សម្រាប់ប្រជាការពារ ផ្ដល់ជូនគណៈបញ្ជាការសន្តិសុខអចិន្ត្រៃយ៍បោះឆ្នោត។
ថ្លែងក្នុងឱកាសនេះ លោកឧត្ដមសេនីយ៍ទោ ងួន គឿន ស្នងការនគរបាលខេត្តរតនគិរី បានណែនាំដល់កងកម្លាំងទាំងអស់ ត្រូវខិតខំប្រឹងប្រែងបង្ការ ទប់ស្កាត់ និងបង្ក្រាបបទល្មើស នៅក្នុងមូលដ្ឋានរបស់ខ្លួន បើទោះកន្លងមកកម្លាំងនគរបាលទាំងអស់ បានខិតខំប្រឹងប្រែងបំពេញភារកិច្ចរបស់ខ្លួនយ៉ាងណាក៏ដោយ។
ជាពិសេសត្រូវរក្សាការពារឲ្យបានដាច់ខាត ក្នុងអំឡុងពេលបោះឆ្នោត ជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។
ហើយលោកឧត្ដមសេនីយ៍ទោ ក៏បានផ្ដាំផ្ញើ ដល់អស់លោកជាមេប៉ុស្ដិ៍ ត្រូវចេះថែរក្សាម៉ូតូនេះឲ្យបានល្អ ដើម្បីប្រើប្រាស់បានយូរអង្វែង ក្នុងការធ្វើដំណើរចេញល្បាតភូមិសាស្ត្ររបស់ខ្លួន ដើម្បីគ្រប់គ្រង រក្សាបានសន្តិសុខ សណ្ដាប់ធ្នាប់ និងសុវត្ថិភាព ជូនបងប្អូនប្រជាពលរដ្ឋ ហើយកាត់បន្ថយចំណុចអសកម្ម ត្រូវយកចិត្តទុកដាក់ បម្រើសេវាជូនប្រជាពលរដ្ឋឲ្យកាន់តែល្អ។
ប្រធានគណៈបញ្ជាការឯកភាពខេត្ត លោក ថង សាវុន បានបានស្នើសុំឲ្យកងកម្លាំងប្រដាប់អាវុធទាំងអស់ យកចិត្តទុកដាក់ បំពេញការងារតាមតួនាទី ភារកិច្ចឲ្យបានល្អក្នុងការ បង្ការទប់ស្កាត់ ឲ្យបានរាល់បទល្មើសគ្រប់ប្រភេទ ពីសេសត្រូវត្រៀមទប់ស្កាត់រាល់សកម្មភាពល្មើសច្បាប់ទាំងឡាយណា ដែលនាំឲ្យរាំងស្ទះ ដល់ដំណើរការ នៃការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។
ឆ្លៀតក្នុងឱកាសដ៏មមាញឹកនេះដែរ លោក ក៏បានជួបសំណេះសំណាល និងផ្ដល់ថវិកា ចំនួន២៣៩លាន ៤២ម៉ឺន៥ពាន់រៀល ជូនដល់និវត្តជន ចំនួន៣៣នាក់ និងគ្រួសារមរណៈចំនួន៤នាក់ផងដែរ។
ហើយថវិកានេះ គឺជាថវិការបស់រាជរដ្ឋាភិបាល ផ្ដល់ជូនតាមរយៈ មន្ទីរសង្គមកិច្ចខេត្តរតនគិរី៕
Source: Kampuchea Thmey Daily
0 Comments