ស្ទឹងត្រែង ៖ បុរសម្នាក់ជាអ្នកស៊ីឈ្នួលដឹកក្របីអោយគេ ខណៈដែលកំពុងដឹកៗ ស្រាប់តែក្របីឡើងកមួយក្បាលនេះ ហាក់បីដូចជាមានភាពកាចសាហាវណាស់ បានស្ទុះមកវ័ធទាំងកំរោលធ្វើអោយបុរសនោះស្លាប់ភ្លាមតែម្តង។
ហេតុការណ៍ក្របីវ័ធខាងលើនេះ បានកើតឡើងកាលពីវេលាម៉ោង១៥និង១០នាទីថ្ងៃទី២៣ ខែ០៧ឆ្នាំ២០១៨ នៅចំណុចភូមិសាម៉ ឃុំសេកុង ស្រុកសៀមប៉ាង ខេត្តស្ទឹងត្រែង។
លោកជឹម អេនអធិការស្រុកសៀមប៉ាងបានអោយដឹងថា ជនរងគ្រោះត្រូវក្របីវ័ធស្លាប់មានឈ្មោះផាន់ ធុយ ភេទ ប្រុស អាយុ ៣៤ ឆ្នាំ ជនជាតិ ខ្មែរ មុខរបរ កសិករ រស់នៅភូមិ ផាបាំង ឃុំថ្មកែវ ស្រុកសៀមប៉ាង ខេត្តស្ទឹងត្រែង។
លោកអធិការបន្តថា នៅថ្ងៃកើតហេតុ បុរសជាជនរងគ្រោះខាងលើ ជាអ្នកស៊ីឈ្នួលដឹកក្របីអោយគេគ្រាន់បានប្រាក់កម្រៃតិចតួចសម្រាប់ ដោះស្រាយជីវភាពក្នុងគ្រួសារ តែជាអកុសល ត្រូវបានក្របីមួយក្បាលនេះ វ័ធចំគល់ថ្គាមខាងឆ្វេង និងលើចិញ្ចើមខាងស្តាំបណ្តាលអោយស្លាប់ភ្លាមៗនៅនឹងកន្លែងតែម្តង។
ក្រោយកើតហេតុត្រូវបានប្រជាពលរដ្ឋរាយការណ៍ឲ្យសមត្ថកិច្ចចុះមកកន្លែងកើតហេតុ ពិនិត្យ និងធ្វើកោសល្យវិច័យរកមូលហេតុ ឃើញថាជនរងគ្រោះពិតជាស្លាប់ដោយសារក្របីវ័ធពិតប្រាកដមែន។
បច្ចុប្បន្ន សពជនរងគ្រោះ ត្រូវបានសមត្ថកិច្ចប្រគល់ទៅអោយក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments