អ្នកប្រដាល់សម ភក្តី ក្លិបរ៉ាហាប់ស្វាយប៉ាក បានវាយឈ្នះអ្នកប្រដាល់ផង់ សាម៉ាឡេ ក្លិបនាគរាជមានជ័យដោយពិន្ទុ ក្នុងការប្រកួតជម្រុះសប្តាហ៍ទី៧ នៃការប្រកួតដណ្តើមកំពូលជើងឯកTV5 Knock Out Series ទម្ងន់៦០គីឡូក្រាម កាលពីយប់ថ្ងៃសៅរ៍ទី២១ ខែកក្កដា ឆ្នាំ២០១៨ នៅសង្វៀន TV5 ព្រែកកំពឹស។
ផង់ សាម៉ាឡេ គេចាញ់សម ភក្តី ដាច់តែម្តងក្នុងការប្រកួតបីទឹកនោះ ដោយសារតែគេវាយចេញខុសគោលដៅច្រើនពេក ហើយមួយទៀតសាម៉ាឡេរាងចាញ់កម្លាំងកាយសម្បទាសម ភក្តីថែមទៀត ។ ដូច្នេះ ផង់ សាម៉ាឡេ គេត្រូវជ្រុះធ្លាក់ចេញពីការប្រកួតដណ្តើមកំពូលជើងឯក TV5 Knock Out Series ទម្ងន់៦០គ.ក្រត្រឹមដំណាក់កាលទី១នេះ ។ឯ សម ភក្តីគេត្រូវនៅបន្តការប្រកួតក្នុងដំណាក់កាលទី២ទៀត។
ចំណែក ម៉ឺន មេឃា អ្នកប្រដាល់ក្លិបអេភូថងកីឡា គេបានយកឈ្នះកុយ ចាន់តូ អ្នកប្រដាល់ក្លិបគីសែមានរិទ្ធក្នុងទឹកទី២ ក្នុងការប្រកួតជម្រុះដំណាក់កាលទី១នេះដែរ ។ចាន់តូ ត្រូវម៉ឺន មេឃា ចាប់អុកជង្គង់ចូលចុងដង្ហើម បណ្តាលឲ្យសន្លប់លើរេញ។ដូច្នេះម៉ឺនមេឃាគេនៅបន្តការប្រកួតនៅក្នុងដំណាក់កាលទី២បន្តទៀត ឯកុយ ចាន់តូ ត្រូវជ្រុះធ្លាក់ត្រឹមនេះ។
មកទល់ពេលនេះក្នុងចំណោមអ្នកប្រដាល់៣២រូបដែលចូលប្រកួតវគ្គជម្រុះដំណាក់កាលទី១ មាន១៤រូបហើយ ដែលបានកក់កៅអីដើម្បីប្រកួតជម្រុះនៅជុំទី២ រួមមានគឺ ម៉ន ព្រហ្មម៉ាញ ក្លិបការិយាល័យទី៥ កងទ័ពជើងគោក, លាភ រដ្ឋា ក្លិបដីឡូតិ៍មានរិទ្ធខេត្តបន្ទាយមានជ័យ , សេក ចៅជូតក្លិបអង្គរមានជ័យខេត្តសៀមរាប, កំពែង ខ្មៅ សមាគមកីឡាប្រដាល់ក្រសួងកសិកម្ម , តាំង តាក់ ក្លិបរស្មីភូមិគាបខេត្តបន្ទាយមានជ័យ , វុត្ថា លាន់លិញ ក្លិបអង្គរធំគុនខ្មែរ ,ឈាន រស្មី ក្លិបរាជសីហ៍ខេត្តរតនគិរី , ឡុង រ៉ាមី ក្លិបខ្លារខិនមានរិទ្ធ,ណាម ម៉ូរ៉ាក់ ក្លិបពន្លឺសាមគ្គីខេត្តបាត់ដំបង , ពុទ្ធ សំបូរ ក្លិបពុទ្ធសេរីវង្សកីឡា ,លិញ ភារម្យ ក្លិបភារម្យគុនខ្មែរ, កូយ ឡាយ ក្លិបកងពលតូចទ័ពឆ័ត្រយោង៩១១ ,សម ភក្តី ក្លិបរ៉ាហាប់ស្វាយប៉ាក និង ម៉ឺន មេឃា ក្លិបអេភូថងកីឡា ។ ហើយជាមួយនេះ ក៏មាន១៤រូបដែរ ដែលខ្ទាតចេញពីការប្រកួត។
ចំពោះការប្រកួតជាមិត្តភាពជាមួយថៃ អ្នកប្រដាល់ពុយ វណ្ណះ វាយឈ្នះអ្នកប្រដាល់ថៃ Phich Ka ដោយពិន្ទុ ។ ពុយ វណ្ណះ គេជាជើងឯកTV5 Knosk Out Series by K.Cement ទម្ងន់៦៥គីឡូក្រាម។
នេះជាលើកទី៣ហើយ ដែលពុយ វណ្ណះ វាយឈ្នះថៃនោះ ។អ្នកប្រដាល់រូបនេះ គេល្អទាំងកណ្តាប់ដៃ ជង្គង់ និង កែង ដែលធ្វើអោយ Phich Ka ដួលជាច្រើនដងថែមទៀត។
ចំពោះការប្រកួតរវាងអ្នកប្រដាល់រួមជាតិវិញនោះ សួរ ចាន់រាជ អ្នកប្រដាល់ក្លិបតាព្រហ្មមានជ័យ ប្រកួតចាញ់អ្នកប្រដាល់អ៊ុង កុសល ក្លិបយុវវាលស្បូវខណ្ឌច្បារអំពៅក្នុងទឹកទី៣៕
Source: Kampuchea Thmey Daily
0 Comments