ភ្នំពេញ ៖ លោកឃួង ស្រេង អភិបាលរាជធានីភ្នំពេញ បានបញ្ជាក់ថា រាជធានីភ្នំពេញ ក្រោមការចង្អុលបង្ហាញរបស់រាជរដ្ឋាភិបាល និងក្រសួងមហាផ្ទៃ បានខិតខំប្រឹងប្រែងការពារ គ្រប់គណបក្សនយោបាយទាំង២០ ក្នុងការប្រកួតប្រជែងយុទ្ធនាការឃោសនាបោះឆ្នោតនេះ ដោយមិនរើសអើងឡើយ។
ការបញ្ជាក់ពីការខិតខំប្រឹងប្រែងនេះ របស់លោកឃួង ស្រេង បានធ្វើឡើង ខណៈដែលលោកដឹកនាំអាជ្ញាធរខណ្ឌ និង មន្ទីរពាក់ព័ន្ធចុះពិនិត្យមើលស្ថានភាពទឹកលិចនៅក្នុងភូមិដ្ឋានមួយចំនួន នៃអាណាចក្រខណ្ឌពោធិ៍សែនជ័យ កាលពីថ្ងៃទី២០ ខែកក្កដា ឆ្នាំ២០១៨។
លោកអភិបាលបានបន្តថា រយៈពេលជាង១០ថ្ងៃហើយ ដែលអាជ្ញាធររាជធានីភ្នំពេញ បានការពារសន្តិសុខសុវត្ថិភាពសម្រាប់គណបក្សនយោបាយទាំង២០ ក៏ដូចជាប្រជាពលរដ្ឋ ឲ្យបានល្អប្រសើរ។ នៅក្នុងនោះយើងបានត្រៀមលក្ខណៈរួមជាស្រេច ប្រសិនបើគណបក្សនយោបាយស្នើសុំមកកងកម្លាំងប៉ូលិស ធ្វើការបើកផ្លូវសម្រាប់ហែក្បូនឃោសនានោះ អាជ្ញាធររាជធានីភ្នំពេញ នឹងធ្វើការផ្តល់ម៉ូតូ ឬរថយន្តស៊ឺរ៉ែនជូនផងដែរ។ ប៉ុន្តែនាពេលកន្លងមកនេះ អត់ទាន់ឃើញមានគណបក្សនយោបាយណាមួយ ត្រូវការ ម៉ូតូ ឬរថយន្តស៊ឺរ៉ែនសម្រាប់ហែក្បូនទេ។ ប៉ុន្តែអាជ្ញាធរមានកងកម្លាំង ជាពិសេស ម៉ូតូប៉ូលិសសម្រាប់បើកផ្លូវហែក្បូនទោះបីជាពួកគាត់សុំ ឬមិនសុំក្តី ហើយកងកម្លាំងត្រូវតែការពារតាមដងផ្លូវដែលពួកគាត់ហែក្បូន បានល្អប្រសើរ។ កុំឲ្យមានការលើកឡើងថា អាជ្ញាធរក៏ដូចជាកងកម្លាំងមានសមត្ថកិច្ចយើង មានការរើសអើង។
ក្នុងនាមអាជ្ញាធរ យើងមិនដែលរើសអើងអ្វីនោះទេ យើងមានការប្រុងប្រយ័ត្ន ដោយទី១ យើងដាក់កម្លាំងការពារ ប៉ុន្តែកងកម្លាំងនេះមិនអនុញ្ញាតឲ្យទៅជិតពួកគាត់ទេ ព្រោះកាលណាទៅជិត ខ្លាចមានបញ្ហាអ្វីមួយកើតឡើងថា អាជ្ញាធរដែនដីក៏ដូចជាកងកម្លាំងសមត្ថកិច្ចមានការគំរាមកំហែងទៅលើ គណបក្សនយោបាយ។
ដូច្នេះហើយបានជាយើងអត់ហ៊ានទៅជិតពួកគាត់ពេលកំពុងហែក្បូន។ ប៉ុន្តែនៅពេលដែលគណបក្សនយោបាយសុំកងកម្លាំងអន្តរាគមន៍ យើងនឹងផ្តល់ជូនភ្លាមៗ ដោយរាប់ទាំងផ្នែកសុខាភិបាលផងដែរ ដោយយើងបានដាក់នៅតាមដងផ្លូវ ពោលគឺ ប្រសិនបើពួកគាត់ ជួបនូវឧប្បត្តិហេតុផ្សេងៗ ឬក៏ប្រជាពលរដ្ឋដែលចូលដង្ហែក្បូនមានបញ្ហាសុខភាព យើងអាចជួយសង្គ្រោះពួកគាត់បានភ្លាមៗ ដោយមិនមានការរើសអើងឡើយទោះបីបក្សណាក៏ដោយ។
លោកអភិបាល ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ ក៏ដូចជាអ្នកសារព័ត៌មានជាតិ អន្តរជាតិ ត្រូវយល់ឲ្យបានជ្រួតជ្រាបថា អាជ្ញាធររាជធានីភ្នំពេញ មិនមានការរើសអើង ជុំវិញការហែក្បូនរបស់គណបក្សនយោបាយនោះឡើយ៕
Source: Kampuchea Thmey Daily
0 Comments