លោក Mike Pompeo រដ្ឋមន្ត្រីក្រសួងការបរទេសសហរដ្ឋអាមេរិកបាននិយាយកាលពីថ្ងៃអាទិត្យថា សហរដ្ឋអាមេរិកមិនខ្លាចដាក់ទណ្ឌកម្មមេដឹកនាំជាន់ខ្ពស់នៃរបបរបស់ប្រទេសអ៊ីរ៉ង់នោះទេ។ នេះគឺជាការបន្តយុទ្ធសាស្ត្រមួយដែលមានគោលបំណងឲ្យអ៊ីរ៉ង់ធ្វើតាមការទាមទាររបស់សហរដ្ឋអាមេរិក។
បន្ទាប់ពីការដកខ្លួនរបស់ទីក្រុងវ៉ាស៊ីនតោនចេញពីកិច្ចព្រមព្រៀងនុយក្លេអ៊ែរអ៊ីរ៉ង់បានធ្វើឲ្យក្រុមសម្ព័ន្ធមិត្តអឺរ៉ុបជិតស្និទ្ធបំផុតរបស់អាមេរិកមានការភ្ញាក់ផ្អើលនោះ លោក Pompeo កាលពីថ្ងៃទី២១ខែឧសភាបានបញ្ចេញ “យុទ្ធសាស្ដ្រថ្មី” ដើម្បីបង្ខំឲ្យអ៊ីរ៉ង់បំពេញតាមតម្រូវការជាច្រើន។
លោក Pompeo បាននិយាយក្នុងសុន្ទរកថាទៅកាន់ជនជនជាតិជ្វីហ្វអ៊ីរ៉ង់នៅរដ្ឋកាលីហ្វ័រនីញ៉ាថា “យើងមិនខ្លាចក្នុងការដោះស្រាយជាមួយរបបនេះក្នុងកម្រិតខ្ពស់របស់ខ្លួននោះទេ”។ លោកបាននិយាយបែបនេះដោយសំដៅទៅលើការដាក់ទណ្ឌកម្មស្តីពីការរំលោភសិទ្ធិមនុស្សកាលពីខែមករាប្រឆាំងលោក Sadeq Larijani ដែលជាប្រធានតុលាការរបស់ប្រទេសអ៊ីរ៉ង់។
លោក Pompeo ក៏បានបញ្ជាក់ផងដែរថា ទីក្រុងវ៉ាស៊ីនតោនចង់ឲ្យប្រទេសទាំងអស់កាត់បន្ថយការនាំចូលប្រេងរបស់អ៊ីរ៉ង់ឲ្យបានទាបបំផុតតាមដែលអាចធ្វើទៅបានត្រឹមថ្ងៃទី៤ខែវិច្ឆកាបើមិនដូច្នោះទេនឹងត្រូវប្រឈមមុខនឹងការដាក់ទណ្ឌកម្មរបស់អាមេរិក។
លោក Pompeo បាននិយាយអំពីការពិន័យផ្នែកហិរញ្ញវត្ថុរបស់សហរដ្ឋអាមេរិកថា “មានអ្វីជាច្រើនទៀតដែលនឹងកើតឡើង”។
លោក Pompeo បាននិយាយថា “បណ្តាមេដឹកនាំរបស់រដ្ឋាភិបាលជាពិសេសអ្នកដែលស្ថិតនៅកំពូលនៃឆ្មាំបដិវត្តន៍អ៊ីរ៉ង់ដូចជាលោក Qasem Soleimani ជាដើមគឺត្រូវតែធ្វើឲ្យមានផលវិបាកដ៏ឈឺចាប់ដោយសារតែការសម្រេចចិត្តដ៏អាក្រក់របស់ពួកគេ”។
កាលពីថ្ងៃទី៨ខែឧសភា ប្រធានាធិបតីសហរដ្ឋអាមេរិកលោក Donald Trump បានសម្រេចចិត្តដាក់ទណ្ឌកម្មទាំងអស់ឡើងវិញដែលត្រូវបានដកជាផ្នែកមួយនៃកិច្ចព្រមព្រៀងពហុភាគីដែលត្រូវបានចុះហត្ថលេខាដោយរដ្ឋបាលរបស់អតីតប្រធានាធិបតី Barack Obama ជាថ្នូរនឹងការទប់ស្កាត់កម្មវិធីនុយក្លេអ៊ែររបស់អ៊ីរ៉ង់។
កិច្ចព្រមព្រៀងឆ្នាំ២០១៥គឺជាការឆ្លើយតបទៅនឹងភាពភ័យខ្លាចថា អ៊ីរ៉ង់កំពុងបង្កើតគ្រាប់បែកនុយក្លេអ៊ែរមួយ៕ AFP
Source: Kampuchea Thmey Daily
0 Comments