អតីតជំនួយការសន្តិសុខជាន់ខ្ពស់របស់លោកប្រធានាធិបតីបារាំង Emmanuel Macron ត្រូវបានគេចោទប្រកាន់កាលពីថ្ងៃអាទិត្យរួមជាមួយបុគ្គលិកម្នាក់នៃគណបក្សកាន់អំណាចបន្ទាប់ពីពួកគេត្រូវបានថតជាប់ក្នុងវីដេអូ ខណៈពេលវាយដុំបាតុករអំឡុងទិវា May Day។ វីដេអូនោះបានបង្កភាពល្បីល្បាញក្នុងប្រព័ន្ធផ្សព្វផ្សាយសង្គម។
នៅក្នុងរឿងអាស្រូវដ៏បំផ្លិចបំផ្លាញបំផុតដែលបានបង្កបញ្ហាដល់លោក Macron ចាប់តាំងពីគាត់ ឡើងកាន់តំណែងកាលពីឆ្នាំមុនមក, រដ្ឋអាជ្ញាក្រុងប៉ារីសបាននិយាយថា លោក Alexandre Benalla និងលោក Vincent Crase ត្រូវបានចោទប្រកាន់ពីបទ “អំពើហឹង្សាជាក្រុម”។
ចំណែក មន្ត្រីប៉ូលិសជាន់ខ្ពស់៣នាក់ដែលត្រូវបានបញ្ឈរជើងរួចទៅហើយដោយសារសង្ស័យថាពួកគេបានផ្តល់វីដេអូទៅឲ្យលោក Benalla ដោយខុសច្បាប់ដើម្បីជួយគាត់ឲ្យបិទបាំងរឿងនេះនោះគឺត្រូវបានចោទប្រកាន់ពីបទក្លែងបន្លំរូបភាពនិងរំលោភបំពានការសម្ងាត់វិជ្ជាជីវៈ។
ទោះបីជាយ៉ាងណាក៏ដោយ លោកប្រធានាធិបតីមិនទាន់បានធ្វើអត្ថាធិប្បាយជាសាធារណៈអំពីរឿងអាស្រូវនេះនៅឡើយទេ។ ប៉ុន្តែបន្ទាប់ពីកិច្ចប្រជុំមួយនៃរដ្ឋមន្ត្រីកំពូលៗក្នុងវិមាន Elysee កាលពីល្ងាចថ្ងៃអាទិត្យ ជំនួយការជិតស្និទ្ធមួយរូបបាននិយាយថា លោក Macron បានចាត់ទុក ការពិតនៅក្នុងករណីរបស់លោក Benalla ថាជា “រឿងមិនអាចទទួលយកបាន”។ ប្រភពនេះបានបន្ថែមថា លោក Macron នឹងនិយាយអំពីបញ្ហានេះនៅពេលដែលគាត់គិតថាវាចាំបាច់។
ការិយាល័យរបស់លោកប្រធានាធិបតីបាននិយាយថា លោក Benalla ត្រូវបានដាក់ទណ្ឌកម្មនៅក្នុងខែឧសភាដោយព្យួរការងារសកម្មរយៈពេលពីរសប្តាហ៍។ យ៉ាងណាក្តី លោក Benalla នៅតែបន្តលេចមុខនៅក្នុងព័ត៌មានលម្អិតអំពីសន្តិសុខរបស់លោក Macron ។
គណបក្សប្រឆាំងបានចោទប្រកាន់លោក Macron ថា បានបិទបាំងរឿងរបស់លោក Benalla ។
គួរបញ្ជាក់ជាថ្មីថា លោក Benalla អាយុ២៦ឆ្នាំត្រូវបានបញ្ចប់តួនាទីកាលពីថ្ងៃសុក្របន្ទាប់ពីវីដេអូបានបង្ហាញថា គាត់បានវាយបុរសម្នាក់យ៉ាងហោចណាស់២ដងខណៈពេលដែលប៉ូលិសបង្ក្រាបកុបកម្មកំពុងបំបែកបាតុកម្មទិវា May Day នៅក្នុងទីក្រុងប៉ារីស៕ AFP
Source: Kampuchea Thmey Daily
0 Comments