សមត្ថកិច្ចនគរបាលចរាចរណ៍ខេត្ត ចាប់រ៉ឺម៉កទ្រុងវែងដឹកអីវ៉ាន់សំពីងសំពោង២គ្រឿង ធ្វើការ ផាកពិន័យ

កំពង់ឆ្នាំង ៖ រ៉ឺម៉កដឹកពួកសំពីងសំពោងហួតហេតុ២គ្រឿង ត្រូវបានសមត្ថកិច្ចនគរបាលចរាចរណ៍ផ្លូវគោកខេត្ត ចាប់ឃាត់ផាកពិន័យតាមផ្លូវច្បាប់ ដោយតម្រូវឲ្យរើរុះអីវ៉ាន់សាងទៅមធ្យោបាយផ្សេងទៀតដើម្បីយករ៉ឺម៉កនោះ ប្រគល់ឲ្យមន្ទីរសាធារណការខេត្ត ធ្វើការកាត់ទ្រុងរ៉ឺម៉ក ដែលធ្វើវែងរហូតដល់ទៅ៦ម៉ែត្រែខុសបច្ចេកទេសចោល។

ការចាប់ឃាត់ខាងលើនេះ បានធ្វើឡើងកាលពីល្ងាចថ្ងៃទី០២ ខែកក្កដា ឆ្នាំ២០១៨ នៅតាមផ្លូវជាតិលេខ៥ ក្នុងភូមិទួលខ្សាច់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។

បុរស២នាក់ជាម្ចាស់រ៉ឺម៉កទាំង២គ្រឿងខាងលើនេះ បានអោយដឹងថា ៖ ពួកគាត់រស់នៅខេត្តតាកែវ បានដឹកពួកក្នុង១រ៉ឺម៉កៗចំនួន២០០ពួក ពីខេត្តបាត់ដំបងទៅលក់ដូរនៅតាមរោងចក្រក្នុងទីក្រុងភ្នំពេញ និងខេត្តកណ្តាល ដោយបានធ្វើដំណើរពីបាត់ដំបងមកដល់ស្រុករលាប្អៀរនេះ មានរយៈពេល៥ថ្ងៃ៥យប់ និងបន្តដំណើរទៅក្រុងភ្នំពេញ ប្រហែល៣ថ្ងៃទៀតទើបទៅដល់។ ការដឹកជញ្ជូនរបស់ពួកគាត់នេះនៅតាមផ្លូវក៏មាននគរបាលហៅសួរនាំដែរ តែគេចេះតែយោគយល់អធ្យាស្រ័យអោយហូរហែមក តែមកដល់ខេត្តកំពង់ឆ្នាំងក៏ត្រូវនគរបាលចរាចរណ៍ខេត្តចាប់ឃាត់មែនទែនផាកពិន័យតែម្តង។ ចំណែកការដឹកពួកច្រើនបែបនេះគាត់ឃើញគេដឹកបាន ក៏ចេះតែរកស៊ីដឹកដូចគេទៅ មិនដឹងថាវាជារឿងខុសច្បាប់នោះទេ។

លោកវរសេនីយ៍ទោ ឈឹម សារុន នាយការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំងបានអោយដឹងថា ៖ យោងតាមបទបញ្ជារបស់គណៈបញ្ជាការឯកភាពខេត្ត និងលោកស្នងការនគរបាលខេត្តបានបញ្ជាអោយសមត្ថកិច្ចរឹតបន្តឹង និងផាកពិន័យចំពោះរថយន្ត និងរ៉ឺម៉កដែលដឹកអីវ៉ាន់សំពីងសំពោងបែបនេះ ដើម្បីការពារ និងទប់ស្កាត់គ្រោះថ្នាក់ចរាចរណ៍អោយមកនៅកម្រិតទាប។ ចំពោះរ៉ឺម៉កទាំង២គ្រឿងនេះ បានដឹកអីវ៉ាន់សំពីងសំពោងហួសហេតុនេះ ដែលមានបណ្តោយរ៉ឺម៉កបូកទាំងម៉ូតូផងប្រវែង៨ម៉ែត្រ ទទឹង២ម៉ែត្រ និងកម្ពស់ជាង៣ម៉ែត្រ ចំណែកសាក់ស៊ីរ៉ឺម៉កធ្វើអំពីដែកតេដូចសាក់ស៊ីរថយន្តតែម្តង តាមផ្លូវច្បាប់ត្រូវផាកពិន័យប្រាក់ចំនួន៣០.០០០រៀល និងតាមគោលការណ៍ថ្នាក់លើអោយបញ្ជូនរ៉ឺម៉កនេះទៅមន្ទីរសាធារណការខេត្ត ធ្វើដើម្បីការកាត់ទ្រុងរ៉ឺម៉កវែងខុសបច្ចេកទេសចោល។ ព្រោះថាការបើកបររបស់រ៉ឺម៉កដែលវែងបែបនេះ គឺបង្កអោយមានគ្រោះថ្នាក់ដល់អ្នកដទៃទៀតដែលប្រើប្រាស់ផ្លូវថ្នល់ ព្រោះថាគេមិនអាចមើលកញ្ចក់ទៅក្រោយបានឡើយ និងពេលបើកបរមានខ្យល់បោកបក់ខ្លាំងអាចនឹងប៉ើងរ៉ឺម៉កនេះមានគ្រោះថ្នាក់ដល់អ្នកដទៃ។

សមត្ថកិច្ចសូមអំពាវនាវដល់អ្នករត់រ៉ឺម៉កទាំងអស់សូមកុំធ្វើទ្រុងរ៉ឺម៉កវែងហួសហេតុពេក ដែលតាមផ្លូវច្បាប់មិនតម្រូវអោយកន្ទុយរ៉ឺម៉កមានប្រវែងវែងបែបនេះឡើយ ការផលិតកន្ទុយរ៉ឺម៉កវែងខុសច្បាប់និងដឹកអីវ៉ាន់សំពីងសំពោងបែបនេះ ត្រូវប្រឈមការផាកពិន័យពីសមត្ថកិច្ច និងប្រឈមនឹងការកាត់ទ្រុងដែលវែងនោះចោលពីសមត្ថកិច្ចជំនាញផងដែរ ដូចករណីខាងលើនេះ ដែលនាំអោយខាតបង់ថវិកានៅក្នុងក្រុមគ្រួសារ៕