សូត្រ ខេ​វិ​ន ជួប ណា​ម ម៉ូ​រ៉ា​ក់ ខ​ណៈ​លី ភា ជួប ពុទ្ធ សំបូរ ក្នុង​ជម្រុះ​លើក​ទី​៥​នៅ​TV5

ការប្រកួត​ប្រដាល់​ដណ្តើមពាន​រង្វាន់​ជើងឯក​TV5 Knock Out Series by K.cement ទម្ងន់​៦០ គីឡូក្រាម លើស​ង្វៀន​TV5 ព្រែកកំពឹស នៅ​ថ្ងៃ​សៅ​រ៍ទី​០៧ ខែ​​កក្កដា​ ឆ្នាំ​២០១៨​នេះ ជាការ​ប្រកួត​លើក​ទី​៥ ក្នុង​ជម្រុះ​ដំណាក់កាល​ទី​១ ដែលមាន​អ្នក​ប្រដាល់ ៤ រូប ដើម្បី​ប្រជែង​យក​កៅអី​សម្រាប់​ដំណាក់កាល​ទី​២​បន្តទៀត​នោះ។

សម្រាប់​ការប្រកួត​ជម្រុះ​លើក​ទី​៥​នេះ សូត្រ ខេ​វិ​ន អ្នក​ប្រដាល់​ក្លិប​បក្សី​ស្លាប​ដែក នឹង​ជួប​ប្រកួត​ជាមួយ​ណា​ម ម៉ូ​រ៉ា​ក់ អ្នក​ប្រដាល់​ក្លិប​ពន្លឺ​សាមគ្គី ខេត្តបាត់ដំបង ។ ការប្រកួត​ក្នុង​ដំណាក់​ទី​១​នេះ គឺ​ប្រកួត​តែ​បី​ទឹក​ទេ ដោយ​ក្នុង​មួយ​ទឹក​មាន​៣​នាទី សម្រាក​២​នាទី ហើយ​អ្នក​ដែល​ឈ្នះ​បាន​ឡើង និង​អ្នក​ដែល​ចាញ់​ត្រូវ​ជ្រុះ​ធ្លាក់​ត្រឹមនេះ។

ការជួបគ្នា​រវាង​សូត្រ ខេ​វិ​ន និង ណា​ម ម៉ូ​រ៉ា​ក់ នេះ តាម​ក្រុមអ្នកវិភាគ​ប្រដាល់​អះអាង​នោះ​ថា សូត្រ ខេ​វិ​ន ទំនងជា​មិន​ឈ្នះ​ណា​ម ម៉ូ​រ៉ា​ក់ នោះឡើយ។ ព្រោះ​ណា​ម ម៉ូ​រ៉ា​ក់ គេ​ជា​អ្នក​ប្រដាល់​ជើងចាស់ និង​បទពិសោធន៍​ច្រើន​ក្នុង​ការប្រកួត។ ឯ សូត្រ ខេ​វិ​ន ថ្វិ​ត្បិតតែ​បាន​កម្ពស់ តែ​គេ​នៅ​ខ្ចី បទពិសោធន៍ ហើយ​មួយទៀត កម្លាំង​ស៊ុ​ហ្វ​របស់គេ​នៅ​មិនទាន់​រឹងមាំ​នៅឡើយ។ ចាំមើល តើ​រវាង​ណា​ម ម៉ូ​រ៉ា​ក់ និង សូត្រ ខេ​វិ​ន តើន​រណា​ឈ្នះ​នោះ ?។

ចំពោះ​ការប្រកួត​មួយគូ​ទៀត​នោះ ជាការ​ជួបគ្នា​រវាង លី ភា អ្នក​ប្រដាល់​ក្លិប​សំរោង​កោង​មកពី​ខេត្តបាត់ដំបង និង ពុទ្ធ សំបូរ អ្នក​ប្រដាល់​ក្លិប​ពុទ្ធ​សេរី​វង្ស​កីឡា ។ ពីរ​នាក់​នេះ មិន​ធ្លាប់​ប៉ះគ្នា​ទេ​កន្លងមក ដោយសារ​ពួកគេ​ទាំងពីរ មាន​កម្រិត​ទីតាំង​សមត្ថភាព​ខុសគ្នា គឺ​ពុទ្ធ សំបូរ ជា​អ្នក​ប្រដាល់​ស្រករ​ក្រោយ ឯ លី ភា ជា​អ្នក​ប្រដាល់​ស្រករ​មុន។

ទោះជា​យ៉ាងនេះ​ក្តី សម្រាប់​ការជួបគ្នា​លើក​នេះ មិនដឹងថា លី ភា អាច​យកឈ្នះ​ពុទ្ធ សំបូរ បាន​ឬ​អត់​នោះទេ ? ព្រោះថា ពុទ្ធ សំបូរ គេ​មាន​កម្ពស់​ខ្ពស់ ស្នៀត​ប្រដាល់​ល្អ និង​មាន​កម្លាំង​កាយសម្បទា​រឹងមាំ ហើយ​ណាមួយ​លើក​នេះ ជាការ​ប្រកួត​ដែល​មិនអាច​ធ្វេសប្រហែស​បាន គឺ​ត្រូវ​មានការ​ប្រយ័ត្ន​រៀងៗ​ខ្លួន ។ យ៉ាងណា ការប្រកួត​រវាង​អ្នក​ប្រដាល់​ទាំងពីរ ពុំ​ដឹងថា នរណា​ជា​អ្នកមាន​សំណាង​បាន​ឡើងទៅ​ប្រកួត​បន្តទៀត​នោះទេ ?​។​

ព្រឹត្តិការណ៍​ប្រកួត​ប្រដាល់​ដណ្តើមពាន​រង្វាន់​ជើងឯក TV5 Knock Out Series by K.cement ទម្ងន់​៦០​គីឡូក្រាម មាន​អ្នក​ប្រដាល់​ចំនួន ៣២ នាក់​ចូលរួម ហើយ​ចែកចេញជា ៤ ដំណាក់កាល និង​មាន​រូបមន្ត​ប្រកួត គឺ​ដំណាក់​ទី​១​ជាការ​ប្រកួត​ជម្រុះ​ក្នុងចំណោម​៣២​នាក់ ទុក​តែ​១៦​នាក់ ។​ដំណាក់​ទី​២ ជាការ​ជម្រុះ​ក្នុងចំណោម​១៦​នាក់ ទុក​៨​នាក់ ហើយ​ដំណាក់កាល​ទី​៣ គឺ​ជម្រុះ​ក្នុង​៨​នាក់​ទុក​៤​នាក់ និង​ដំណាក់កាល​ទី​៤ ជាការ​ប្រកួត​ដំណាក់កាល​ផ្តាច់ព្រ័ត្រ គឺ​ពាក់កណ្តាល​ផ្តាច់ព្រ័ត្រ​និង​ផ្តាច់ព្រ័ត្រ។​

ឆ្លងកាត់​ការប្រកួត​ជម្រុះ​៤​សប្តាហ៍​កន្លងមក​នោះ គឺ​រកឃើញ​អ្នក​ប្រដាល់​ខ្លាំង​ចំនួន ៨ រូប​ហើយ រួមមាន គឺ​ម៉ន ព្រហ្ម​ម៉ាញ ក្លិប​ការិយាល័យ​ទី​៥ កងទ័ពជើងគោក​, លាភ រដ្ឋា ក្លិប​ដី​ឡូ​តិ៍​មាន​រិ​ទ្ធ​ខេត្តបន្ទាយមានជ័យ , សេក ចៅ​ជូត​ក្លិប​អង្គរ​មានជ័យ​ខេត្តសៀមរាប​, កំពែង ខ្មៅ សមាគម​កីឡាប្រដាល់​ក្រសួងកសិកម្ម , តាំង តាក់ ក្លិប​រស្មី​ភូមិ​គាប​ខេត្តបន្ទាយមានជ័យ , វុត្ថា លាន់​លិញ ក្លិប​អង្គរ​ធំគុន​ខ្មែរ ,​ឈាន រស្មី ក្លិប​រាជសីហ៍​ខេត្តរតនគិរី និង ឡុង រ៉ា​មី ក្លិប​ខ្លារខិន​មាន​រិ​ទ្ធ៕ ​



Source: Kampuchea Thmey Daily