ភ្នំពេញ៖ ស្របពេលដែលយុទ្ធនាការឃោសនាបោះឆ្នោត ត្រូវបានបញ្ចប់ដោយជោគជ័យគេឃើញបងប្អូនប្រជាពលរដ្ឋខ្មែរ បានសម្រុកចេញពីក្រុងដើម្បីទៅស្រុកកំណើតយ៉ាងច្រើនកុះករ ព្រោះឱកាសប្រាំឆ្នាំមានម្តងក្នុងការសម្រេចជោគវាសនាប្រទេសជាតិ ក៏ដូចជាជ្រើសរើសមេដឹកនាំតាមឆន្ទៈ និង តាមការគិតគូរដ៏ល្អិតល្អន់ របស់ប្រជាពលរដ្ឋខ្មែរ។
ស្របពេលនោះដែរ ពួកក្រុមរកស៊ីត្រីងៀតឆ្លៀតពង បានកាប់ឆៅៗតែម្តង ដោយក្រុមត្រីងៀតឆ្លៀតពងទាំងនោះ ត្រូវបានគេស្គាល់ថា ក្រុមហ៊ុនរថយន្តក្រុង និងក្រុមអ្នករត់តាក់ស៊ី ដែលល្បីខាងកាប់ឆៅ។ គេសង្កេតឃើញនៅគ្រប់ទីកន្លែងក៏ដូចជានៅតាមបេនឡានក្រុង នីមួយៗមានមនុស្សច្រើនស្អេកស្កះដណ្ដើមគ្នាជិះរថយន្ត តាំងពីល្ងាចថ្ងៃទី ២៧មកម្ល៉េះរហូតដល់ព្រឹកថ្ងៃទី ២៨កក្កដានេះ។ ដោយសារតែមានមនុស្សច្រើនបែបនេះហើយ ទើបជាឱកាសល្អសម្រាប់ក្រុមត្រីងៀតឆ្លៀតពងទាំងនោះ។
ការធ្វើដំណើរភាគច្រើនគឺប្រជាពលរដ្ឋខ្មែរ ដែលគ្រប់អាយុបោះឆ្នោត មានទាំងសិស្ស និស្សិត បុគ្គលិកបម្រើការងារតាមបណ្តាក្រុមហ៊ុន នានារួមនឹង កម្មករ កម្មការិនី ជាដើម។
ជាមួយគ្នានៅតាមបណ្តាផ្លូវមួយចំនួន ដែលមានចរាចរណ៍មមាញឹកខ្លាំងនោះ គេសង្កេតឃើញមានកម្លាំងសមត្ថកិច្ចជាច្រើនបាននាំគ្នាចេញជួយអន្តរាគមន៍ សម្រួលចរាចរណ៍ឲ្យរថយន្តបានធ្វើដំណើរចេញទៅតាមបណ្ដាខេត្ត បានឆាប់រហ័ស និងទាន់ពេលវេលា។
បងស្រីម្នាក់ឈ្មោះ ប្រាក់ សាវឿន អាយុជាង ៣០ឆ្នាំ មានស្រុកកំណើតនៅស្រុកបាណន់ ខេត្តបាត់ដំបង បានឱ្យដឹងថា គាត់បានតាំងចិត្តរួចជាស្រេច ថានឹងទៅបោះឆ្នោត នឹងគេ ដោយគ្មានចិត្តរារែកនោះទេ ព្រោះរយៈពេល ៥ឆ្នាំមានម្តង ហើយបានឮរដ្ឋាភិបាល ប្រកាសថាមិនឱ្យរថយន្តក្រុង និងរថយន្តរត់តាក់ស៊ីដំឡើងថ្លៃទេ ខណៈពេលប្រជាពលរដ្ឋបានច្បាប់ ឈប់សម្រាក ៣ថ្ងៃក្នុងការទៅបោះឆ្នោតនេះ តែផ្ទុយទៅវិញគាត់ត្រូវខកចិត្តយ៉ាងខ្លាំង ពេលថ្លៃសំបុត្ររថយន្តក្រុងឡើងថ្លៃកប់ពពក ទ្វេមួយជា២ ពេលនោះគាត់បម្រុងមិនទៅទេ តែដោយសារឆន្ទៈ និងដួងចិត្ត ស្រលាញ់ថ្នាក់ដឹកនាំបច្ចុប្បន្ន ទើបគាត់តាំងចិត្តត្រូវទៅបោះឆ្នោតឱ្យបាន។ សម្រាប់ការបោះឆ្នោតជ្រើសតំណាងរាស្ត្រ នៃរដ្ឋសភានីតិកាលទី៥ នេះគេសង្កេតឃើញប្រជាពលរដ្ឋខ្មែរគ្រប់អាយុ បោះឆ្នោតទាំងអស់ បានស្វែងយល់ និងដឹងពីគុណតម្លៃ នៃសន្លឹកឆ្នោតរបស់ខ្លួន ហើយម្នាក់ៗសុទ្ធតែ បានត្រៀមលក្ខណៈ រៀងៗខ្លួន ដើម្បីចូលរួមការបោះឆ្នោត។ ទាំងក្មេងចាស់ សុទ្ធតែបានដឹងថា សន្លឹកឆ្នោតរបស់ពួកគាត់ គឺជាការសម្រេចនូវ ជោគវាសនាប្រទេសជាតិ និងជ្រើសយកមេដឹកនាំ ដែលពួកគាត់ជឿទុកចិត្តអាចជួយឲ្យជីវភាពរបស់គាត់ប្រសើរ និងរស់នៅប្រកបដោយភាពសប្បាយរីករាយ ដោយមិនជឿតាមនូវការញុះញង់ពីពួកអគតិមួយចំនួនតូចនោះឡើយ៕
Source: Kampuchea Thmey Daily
0 Comments