ទឹកជំនន់ទន្លេសេកុង បានជន់លិចស្រែស្រូវប្រជាពលរដ្ឋនៅស្រុកសៀមប៉ាងជាច្រើនរយហិកតា

Cambodia News July 28, 2018

ស្ទឹងត្រែង ៖ ក្នុងពេលទឹកទន្លេសេកុងចូលដល់កម្រិតកម្ពស់១២,៥០ម៉ែត្រហួសកម្រិតប្រកាសអាសន្នស្រែស្រូវបងប្អូនប្រជាពលរដ្ឋផ្ទះសម្បែងអ្នករស់នៅជិតតាមដងទន្លេ សេកុង នៅស្រុកសៀមប៉ាង ខេត្តស្ទឹងត្រែង បានលិចអស់ជាច្រើនរយហិកតា អាជ្ញាធរឃុំនិយាយថា នេះវាមានផលប៉ះពាល់ពីការបាក់ទំនប់វារីអគ្គិសនីសេពាន សេណាមណយផង កាលពីថ្ងៃទី២៣កក្កដាកន្លងមកនេះ។

លោកស៊ឹមដានមេឃុំថ្មកែវបានអះអាងនៅថ្ងៃទី២៧ ខែកក្កដានេះថា ទឹកជំនន់ទន្លេសេកុងកំពុងបន្តឡើងបន្ថែមទៀតនៅថ្ងៃទី២៧ ខែកក្កដា ឆ្នាំ២០១៨នេះ ហើយប្រជាពលរដ្ឋយើងបានបង្កើនការប្រុងប្រយ័ត្នទ្វេដង ព្រោះស្ថានការណ៍នេះ វាទទួលឥទ្ធិពលពីប្រទេសឡាវមកផង។

លោកបន្ថែមថា ៖ ស្ថានភាពទឹកនេះបានឡើងលិចស្រូវប្រជាពលរដ្ឋនៅក្នុងឃុំថ្មកែវនេះជិតទៅ១០០ហិកតាហើយនឹងដំណាំឈើហូបផ្លែផ្សេងៗមួយចំនួនទៀតនេះមិនទាន់គិតដល់ឃុំផ្សេងៗទៀតនៅក្នុងស្រុកទាំងមូលនោះទេ។

លោកបាសុណង កសិករនៅភូមិញាំងស៊ុំ ឃុំថ្មកែវ ស្រុកសៀមប៉ាង បានសំដែងការព្រួយបារម្ភថា ៖នៅចំពោះមុខនេះ កសិករមួយចំនួនត្រូវរងការខ្វះខាតស្បៀងនៅចុងឆ្នាំ ប្រសិនបើទឹកជំនន់នេះនៅត្រាំត្រែងយូរអាចធ្វើឱ្យស្រូវ និងដំណាំខូចខាត ដែលជាទីរំពឹងរបស់កសិករ។

លោកថា នៅថ្ងៃទី២៧ ខែកក្កដានេះ ប្រជាពលរដ្ឋមួយចំនួនបានជម្លៀសសត្វពាហនៈ ទ្រព្យសម្បត្តិទៅកាន់ទីទួលសុវត្ថិភាពបានមួយចំនួនរួចហើយ ដើម្បីបញ្ចៀសការគ្រោះថ្នាក់។

សូមបញ្ជាក់ថា ៖ គិតមកដល់ថ្ងៃទី២៧កក្កដានេះ ទឹកទន្លេមេគង្គនៅខេត្តស្ទឹងត្រែងមានកម្ពស់១០.១១ម៉ែត្រជិតដល់កម្រិតប្រកាសអាសន្ន(១០.៧០ម៉ែត្រ) ចំណែកនៅទន្លេសេកុងមកដល់ម៉ោង១៦និង៤០ខែកក្កដានេះទឹកមានកម្ពស់១២,៥០ម៉ែត្រហួសកម្រិតប្រកាសអាសន្នហើយ តែអាជ្ញាធរខេត្តបានចេញសេចក្តីជូនដំណឹងទាន់ហេតុការណ៍ស្តីពីករណីគ្រោះទឹកជំនន់-ការត្រៀមបង្ការ-និងការអន្តរាគមន៍នេះព្រមទាំងបានចាត់កម្លាំងចុះអន្តរាគមន៍ចំពោះគ្រោះទឹកជំនន់នេះផងដែរ៕