បង្ក្រាបបទល្មើសគ្រឿងញៀន ឃាត់ជនសង្ស័យម្នាក់ រឹបអូសថ្នាំជាង១៦គីឡូក្រាម

Cambodia News July 03, 2018

ភ្នំពេញ ៖ កម្លាំងជំនាញ នៃមន្ទីរប្រឆាំងគ្រឿងញៀន (ក៦) ក្រសួង មហាផ្ទៃ ដោយមានការសម្របសម្រួលពីស្ថាប័នតុលាការ បានបើកប្រតិបត្តិការ បង្ក្រាបបទល្មើសជួញដូរគ្រឿងញៀន ឃាត់ជនសង្ស័យម្នាក់ និងរឹបអូសគ្រឿងញៀនជាង១៦គីឡូក្រាម។

សមត្ថកិច្ចប្រាប់អោយដឹងថា ដោយមានការបញ្ជាដឹកនាំផ្ទាល់ពី ឯកឧត្តម ម៉ក់ ជីតូ អគ្គស្នងការរងនគរបាលជាតិ និងឯកឧត្តម ឡឹក វណ្ណៈ នាយកមន្ទីរប្រឆាំងគ្រឿងញៀន កាលពីថ្ងៃទី០១ ខែកក្កដា ឆ្នាំ២០១៨ វេលាម៉ោង ១៥ និង៣០នាទី កម្លាំងជំនាញ នៃមន្ទីរប្រឆាំងគ្រឿងញៀន (ក៦) ដឹកនាំដោយឧត្តមសេនីយ៍ត្រី ហម គន្ធី នាយករងមន្ទីរ ប្រឆាំងគ្រឿងញៀន ដោយមានការសម្របសម្រួល ពីលោក សៀង សុខ ព្រះរាជអាជ្ញារង អមសាលាដំបូង រាជធានីភ្នំពេញ បានបើកប្រតិបត្តិការបង្ក្រាបករណីជួញដូរគ្រឿងញៀនខុសច្បាប់ នៅចំណុចដងផ្លូវ ក្បែរស្ថានទូតចិន ស្ថិតក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ។

ជាលទ្ធផល ឃាត់ខ្លួនជនសង្ស័យ ១នាក់ ឈ្មោះ ម៉េង រតនា ( ហៅ ) ខ្វៃ ភេទប្រុស អាយុ៤១ឆ្នាំ ជនជាតិខ្មែរ វត្ថុតាងចាប់យកគ្រឿងញៀនសរុបចំនួន 16kg 514.43g ក្នុងនោះ ៖ ថ្នាំញៀនប្រភេទ មេតំហ្វេតាមីន (ICE ) ទម្ងន់ 15kg 812.69g និងថ្នាំញៀន ប្រភេទ ហេរ៉ូអ៊ីន (Heroine) 701.74g។

បច្ចុប្បន្ន ជនសង្ស័យ រួមទាំង វត្ថុតាងថ្នាំញៀន សមត្ថកិច្ចកំពុងកសាងសំណុំរឿង បញ្ជូនទៅកាន់សាលាដំបូង រាជធានីភ្នំពេញ ដើម្បីផ្ដន្ទាទោសតាមនីតិវិធី៕