ភ្នំពេញ ៖ ក្រោយធ្លាក់ខ្លួនឈឺជំងឺក្រលៀនមានរយៈពេលជាច្រើនខែ ដោយមានស្ថានភាពស្គមស្លេកស្លាំង និងខ្វះខាតថវិកាព្យាបាលនោះ តារាសម្ដែងប្រុសលោកយូ ឌីស្កូ ក្រោមការជួយជ្រោមជ្រែងពីសំណាក់សប្បុរសជនរួមទាំងសមាគមសិល្បករខ្មែរក្នុងការអំពាវនាវស្វែងរកជំនួយជួយសង្គ្រោះជីវិតនោះ ពេលនេះតារាប្រុសរូបនេះអាច មានលទ្ធភាពចេញទៅព្យាបាលនៅក្រៅប្រទេសរួចហើយ។
ការចាកចេញពីប្រទេសកំណើតដើម្បីស្វែងរកសេវាព្យាបាលវះកាត់ផ្លាស់ប្ដូរក្រលៀននៅប្រទេសឥណ្ឌា ពីសំណាក់តារាប្រុសលោក យូ ឌីស្កូ នេះ គឺបន្ទាប់លោកពីទទួលបានថវិកាឧបត្ថម្ភពីសប្បុរសជនទាំងក្នុង និងក្រៅស្រុកមានរហូតខ្ទង់ជាង៥ម៉ឺនដុល្លារ។ មិនតែប៉ុណ្ណោះជីវិតរបស់លោក យូ ឌីស្កូ ក៏ត្រូវមានសង្ឃឹមឡើងវិញ ស្របពេល ដែលមានជំនួយសង្គ្រោះពីទស្សនិកជន។
ទន្ទឹមពេល ដែលបច្ចុប្បន្នលោកយូ ឌីស្កូកំពុងស្នាក់នៅព្យាបាល និងធ្វើការវះកាត់ប្តូរក្រលៀននៅប្រទេសឥណ្ឌានេះ ក៏មានមហាជនជាច្រើនទន្ទឹងរង់ចាំមើលលទ្ធផលអំពីនៃការចេញទៅវះកាត់នេះផងដែរ។ ខណៈគិតមកទល់ពេលនេះមានរយៈពេលប្រមាណជិតមួយខែ ហើយ ដែលលោក យូ ឌីស្កូ ព្យាបាលនៅឯក្រៅប្រទេស។
ឆ្លើយតបនឹងសំនួរក៏ដូចជាក្តីបារម្ភរបស់មហាជន និងមិត្តភក្តិរួមអាជីពសិល្បៈជាមួយលោក យូ ឌីស្កូ ប្រធានសមាគមសិល្បករខ្មែរអ្នកនាងចន ច័ន្ទលក្ខិណា មុននេះ ស្រាប់តែប្រកាសឲ្យមហាជនបានដឹងជាសាធារណៈអំពីស្ថានភាពជំងឺ និងលទ្ធផលនៃការវះកាត់ប្តូរក្រលៀនលោក យូ ឌីស្កូ ថាពេលនេះអស់មានអ្វីត្រូវបារម្ភទៀតហើយព្រោះ យូ ឌីស្កូ ត្រូវបានបញ្ជូនចេញពីបន្ទប់ICUហើយបន្ទាប់ពីធ្វើការវះកាត់។
អ្នកនាង ចន ច័ន្ទលក្ខិណា បានបញ្ជាក់ថា អរចង់ហោះលោកអើយ បានចេញពីបន្ទប់ICU អាចកាន់ទូរស័ព្ទឆាតមកភ្លែត ឆាប់ជាណាប្អូនប្រុស យូ ឌីស្កូ។ សុំទោសខ្ញុំមិនទាន់ដាក់រូបថត ព្រោះត្រូវរក្សាសិទ្ធិបុគ្គល។ តាមរយៈនេះគេសង្កេតឃើញមានទស្សនិកជនអ្នកគាំទ្រជាច្រើនសម្ដែងអារម្មណ៍ត្រេកអរ និងជូនពរឲ្យលោក យូ ឌីស្កូ ឆាប់បានជាសះស្បើយត្រឡប់មកស្រុកកំណើតចូលបម្រើវិស័យសិល្បៈវិញ៕
Source: Kampuchea Thmey Daily
0 Comments