ឡុង សុភី អ្នកប្រដាល់ជើងខ្លាំងនៃក្លិបសាលវ័ន្តកីឡា បានវាយឈ្នះអ្នកប្រដាល់ថៃPheach Aroun ដែលមកសុំសងសឹកវិញ កាលពីល្ងាចថ្ងៃទី៣០ ខែមិថុនា ឆ្នាំ២០១៨ នៅលើសង្វៀនCarabao របស់ SEA-TV។
ឡុង សុភី និង Pheach Aroun នឹងប្រកួតគ្នាក្នុងទម្ងន់៦៩គីឡូក្រាម ។ សុភីលើកនេះ ប៉ះចំជើងខ្លាំងហើយ ព្រោះអ្នកប្រដាល់ថៃរូបនេះ ថ្វីដ្បិតតែធ្លាប់ចាញ់ក្តី តែគេវាយខ្លាំងហើយ មានបច្ចេកទេស ប្រកួតល្អថែមទៀត ។
នេះជាការបរាជ័យលើកទី៣ហើយរបស់ Pheach Aroun ដែលជួបប្រកួតជាមួយឡុង សុភីនោះ ។ ក្នុងជំនួប៥លើកជាមួយឡុង សុភី ទាំងលើកចុងក្រោយនេះផង អ្នកប្រដាល់ថៃរូបនេះ វាយចាញ់ឡុងសុភី ៣លើក ឈ្នះ១ ស្មើ១លើក។
ចំពោះខាំ ខ្លានាង អ្នកប្រដាល់ក្លិបរ៉ាហាប់ស្វាយប៉ាក ដែលជួបប្រកួតជាមួយអ្នកប្រដាល់ថៃ Nok Krachieb វិញនោះ ត្រូវ Nok Krachieb វាយអោយសន្លប់ក្នុងទឹកទី២ ។ តាមពិតខាំ ខ្លានាង ត្រូវចាញ់តាំងពីក្នុងចុងទឹកទី១ម្ល៉េះ ក្រោយពេលដែល Nok Krachieb ដាល់ត្រូវកណ្តាលមុខឡើងវង្វេងទិស ហើយត្រូវអាជ្ញាកណ្តាលរាប់៨ដល់ទៅពីរដងនោះ បើកុំតែស្នូរជួងបញ្ចប់ទឹក១បន្លឺឡើងទាន់ ម្ល៉េះសន្លប់បាត់ទៅហើយ។ ពីរនាក់នេះ ប្រកួតគ្នាក្នុងប្រភេទទម្ងន់៥១គ.ក្រ។
ដោយឡែក ការប្រកួតរវាងអ្នកប្រដាល់រួមជាតិវិញ សេក គឹមសាន្ត អ្នកប្រដាល់ក្លិបអង្គរមានជ័យខេត្តសៀមរាប ដែលឡើងមកសងសឹក ង៉ែត វុធ អ្នកប្រដាល់ក្លិបកងពលតូចទ័ពឆ័ត្រយោង៩១១នោះ បានចាញ់ង៉ែត វុធ ក្នុងទឹកទី២។
សេក គឹមសាន្ត ចាញ់ដោយសារតែគេវាយថែមទៅលើង៉ែត វុធ (ទាត់ត្រូវមុខង៉ែត វុធ) ពេលដែលង៉ែត វុធ ដួលលើរេញហើយនោះ។ដោយសារយ៉ាងនេះហើយ ទើបអាជ្ញាកណ្តាលអោយគេចាញ់តែម្តង ។ ពួកគេពីរនាក់នេះ ជួបប្រកួតគ្នាក្នុងទម្ងន់៥៧គីឡូក្រាម ។សេក គឹមសាន្ត ធ្លាប់ចាញ់ង៉ែត វុធ ពីរដងហើយកន្លងមក ។ រីឯ សុខ វិរៈ អ្នកប្រដាល់ក្លិបសំរោងកោងខេត្តបាត់ដំបង ដែលឡើងមកសងសឹក ផាន រះ អ្នកប្រដាល់ក្លិបតាព្រហ្មមានជ័យដែរនោះ ក៏បរាជ័យដែរ ដោយវាយចាញ់ផាន រះក្នុងទឹកទី២ ដែរ៕
លី ភា ចាញ់ Yorth Ranong , ឯម ឡេងលី ឈ្នះ Hosein
អ្នកប្រដាល់ជើងខ្លាំងស្រករក្រោយ លី ភា ក្លិបសំរោងកោងខេត្តបាត់ដំបង បានវាយចាញ់ អ្នកប្រដាល់ថៃ Yorth Ranong ហើយឯម ឡេងលី ក្លិបថ្មគោលពោធិសែនជ័យ បានវាយឈ្នះអ្នកប្រដាល់អ៊ីរ៉ង់ Hosein ក្នុងការជួបប្រកួតគ្នា កាលពីយប់ថ្ងៃទី៣០មិថុនា២០១៨ នៅលើសង្វៀនGanzberg Top Fighter របស់ទូរទស្សន៍អាស៊ីអាគ្នេយ៍។
លី ភា ដែលជាអ្នកប្រដាល់ចិត្តធំនោះ វាយចាញ់ Yorth Ranong ដាច់តែម្តង ប៉ុន្តែសកម្មភាពប្រកួតរបស់គេប្រាំទឹកនោះ គឺដើរចូលវាយថៃរហូត តែដើរចូលទៅអោយគេវាយប៉ុណ្ណោះ ។ជាលើកទី២ ដែលលី ភា ប្រកួតជាមួយថៃហើយចាញ់ថៃនេះ ខុសពីការប្រកួតជាមួយថៃលើកទី១នោះ គេបានផ្តួលKiev Ba អោយសន្លប់ក្នុងទឹកទី១ប៉ុណ្ណោះ ។
ចំពោះ អ្នកប្រដាល់ជើងខ្លាំងស្រករក្រោយកម្ពុជា ឯម ឡេងលី ក្លិបថ្មគោលពោធិសែនជ័យ បានផ្តួលអ្នកប្រដាល់Iranឈ្មោះ Hosein អោយសន្លប់ក្នុងទឹកទី១ ។ ពួកគេទាំងពីរនាក់នេះ ប្រកួតគ្នាក្នុងទម្ងន់៧១គីឡូក្រាម។
Hosein ត្រូវឯម ឡេងលី វាយកែងពុះបែកក្បាល ត្រូវអាជ្ញាកណ្តាលរាប់៨ម្តង និងដួលលើកទី២ ដោយត្រូវកណ្តាប់ដៃវាយសន្ធាប់របស់ឡេងលី ធ្វើអោយអ្នកប្រដាល់អ៊ីរ៉ង់រូបនេះ ដួលលែងក្រោកតែម្តង ។
ឡេងលី ថ្វីត្បិតតែមានប្រវត្តិប្រកួតត្រឹមតែ៣៦លើកក៏ដោយ តែគេមានស្នៀតប្រដាល់ល្អ និងទើបតែស្គាល់ចាញ់៥លើកប៉ុណ្ណោះ ។ កាលពីប្រកួតលើកមុន ជាមួយអ្នកប្រដាល់ថៃ Laypayak គេវាយឈ្នះដោយពិន្ទុដាច់តែម្តង ហើយពេលជួបប្រកួតជាមួយអ្នកប្រដាល់រុស្សីArthur Shushinsky ឡេងលីបានផ្តួលអោយបោះបង់ចោលការប្រកួតក្នុងទឹកទី៣ ទៀត។
អ្នកប្រដាល់មិនសូវល្បីឈ្មោះ ហុង ជីវ៉ុង ក្លិបសំរោងកោងខេត្តបាត់ដំបង បានវាយចាញ់ ម៉ុត ខ្លឹមខ្មៅ អ្នកប្រដាល់ល្បីឈ្មោះក្លិបមកុដរាជសីហ៍ ដោយពិន្ទុ បន្ទាប់ពីវាយគ្នា៥ទឹកពេញនោះ ។ពីរនាក់នេះ ជួបគ្នាក្នុងប្រភេទទម្ងន់៦៥គីឡូក្រាម។
មាស សុជាតិ ជាអ្នកប្រដាល់ស្រករក្រោយ ឯម៉ុត ខ្លឹមខ្មៅ គេជាអ្នកប្រដាល់ជើងខ្លាំងនិងមានឈ្មោះបោះសម្លេងជាងមាស សុជាតិ។ ប៉ុន្តែយ៉ាងណា អ្នកប្រដាល់ទាំងពីរនាក់នេះ ពុំធ្លាប់ដែលជួបគ្នានោះឡើយកន្លងមក ។ចំណែក វ៉ន វ៉ុន អ្នកប្រដាល់ក្លិបឃ្លាំងមឿងកីឡា បានប្រកួតស្មើពិន្ទុជាមួយ រឿន សុខលី អ្នកប្រដាល់ក្លិបការិយាល័យទី៥ កងទ័ពជើងគោក ។ពួកគេ ជួបគ្នាក្នុង ទម្ងន់៥៤ គីឡូក្រាម៕
Source: Kampuchea Thmey Daily
0 Comments