ភាពតានតឹងកំពុងតែកើនឡើងរវាងលោក Donald Trump និងប្រទេសអ៊ីរ៉ង់ដោយការបង្ហោះ Twitter របស់លោកប្រធានាធិបតីសហរដ្ឋអាមេរិក ដែលគំរាមកំហែងទីក្រុងតេរ៉ង់ត្រូវជួបប្រទះនឹងការឆ្លើយតបដ៏សាហាវស្រដៀងគ្នាកាលពីថ្ងៃចន្ទ។
ការបង្ហោះ Twitter ព្រមានរបស់លោក Trump នៅល្ងាចថ្ងៃអាទិត្យទៅកាន់លោកប្រធានាធិបតីអ៊ីរ៉ង់ Hassan Rouhani បានបង្កឲ្យមានសំណួរជាច្រើនអំពីយុទ្ធសាស្ត្ររបស់ក្រុងវ៉ាស៊ីនតោនចំពោះសាធារណរដ្ឋឥស្លាមមួយនេះ។
សហរដ្ឋអាមេរិកត្រូវបានគេសង្ស័យថាបានគាំទ្រគំនិតនៃការផ្លាស់ប្តូររបបនេះប៉ុន្តែអ្នកវិភាគបាននិយាយថា គោលជំហរនាពេលបច្ចុប្បន្នរបស់អាមេរិកអាចជាការប៉ុនប៉ងបង្វែការយកចិត្តទុកដាក់ក្រោយពីមានព័ត៌មានសំខាន់មួយសប្តាហ៍ជុំវិញកិច្ចប្រជុំកំពូលរបស់លោក Trump ជាមួយលោក Vladimir Putin នៃប្រទេសរុស្ស៊ីនិងកង្វះនៃការវិវត្តលើប្រទេសកូរ៉េខាងជើង។
ការប៉ះទង្គិចគ្នានេះបានចាប់ផ្តើមនៅពេលប្រធានាធិបតីអ៊ីរ៉ង់លោក Hassan Rouhani បានព្រមានថា លោក Trump “មិនត្រូវលេងជាមួយកន្ទុយតោទេ” ដោយនិយាយថា ជម្លោះជាមួយអ៊ីរ៉ង់នឹងបង្កឲ្យមាន “ម៉ែសង្គ្រាម” ដែលជាហេតុជំរុញឲ្យមានការខឹងសម្បាយ៉ាងខ្លាំងពីសំណាក់មេដឹកនាំអាមេរិក។
ការឆ្លើយតបរបស់មេដឹកនាំគណបក្សសាធារណរដ្ឋរូបនេះបានធ្វើឲ្យគេនឹកឃើញដល់ការដែលគាត់ធ្វើដាក់ប្រទេសកូរ៉េខាងជើងកាលពីឆ្នាំមុន។
លោក Trump បានព្រមានលោក Rouhani នៅលើ Twitter ថា “កុំគំរាមកំហែងសហរដ្ឋអាមេរិកម្ដងទៀតឲ្យសោះបើមិនដូច្នេះទេអ្នកនឹងទទួលរងផលវិបាកដូចដែលមនុស្សមួយចំនួនធ្លាប់បានទទួលរួចមកហើយនៅក្នុងប្រវត្តិសាស្ត្រ។ យើងមិនមែនជាប្រទេសដែលទ្រាំជាមួយនឹងពាក្យសម្ដីឆ្កួតលីលារបស់អ្នកដែលចង់បង្កហិង្សាឲ្យមានការស្លាប់នោះទេ។ សូមប្រុងប្រយ័ត្ន!”។
ទោះបីជាយ៉ាងណាក៏ដោយ ពីរបីម៉ោងក្រោយមក រដ្ឋមន្ត្រីការបរទេសអ៊ីរ៉ង់លោក Mohammad Javad Zarif បានវាយបកមកវិញ។ លោក Zarif បានសរសេរជាភាសាអង់គ្លេសថា “យើងបាននៅអស់រយៈពេលមួយសហស្សវត្សរ៍និងបានឃើញការដួលរលំនៃចក្រភពនានារួមទាំងរបស់យើងផងដែរដែលមានរយៈពេលច្រើនជាងជីវិតនៃបណ្តាប្រទេសមួយចំនួនទៀត”។
ខណៈពេលដែល “ជំហរដ៏ស្វិតស្វាញ” របស់លោក Trump ត្រូវបានសាទរដោយនាយករដ្ឋមន្ត្រីអ៊ីស្រាអែលលោក Benjamin Netanyahu នោះ, វាក៏បានបង្កឲ្យមានចម្ងល់ជាច្រើនអំពីអត្ថន័យនិងផលប៉ះពាល់ពិតប្រាកដរបស់វាផងដែរ។
នៅពេលសាកសួរអំពីហេតុផលជំរុញរបស់លោកប្រធានាធិបតី, អ្នកនាំពាក្យសេតវិមានលោកស្រី Sarah Sanders បាននិយាយថា លោកប្រធានាធិបតីបានផ្តោតលើសុវត្ថិភាពនិងសន្តិសុខរបស់ប្រជាជនអាមេរិកហើយធានាថា ប្រទេសអ៊ីរ៉ង់មិនទទួលបានអាវុធនុយក្លេអ៊ែរទេ៕ AFP
Source: Kampuchea Thmey Daily
0 Comments