បារមី ចូលរូប វាយអោយខ្មោចចេញរហូតដល់អ្នកជំងឺដាច់ខ្យល់ស្លាប់

ស្ទឹងត្រែង ៖ ស្ត្រីជាគ្រូចូលរូបម្នាក់ថាមានបារមីខ្លាំងពូកែអះអាងថា ខ្លួនជាអ្នកល្បីខាងដេញខ្មោចបានជាន់កវាយអ្នកជំងឺនឹងមោងឫស្សីអោយខ្មោចចេញរហូតដល់អ្នកជំងឺដាច់ខ្យល់ស្លាប់។

ហេតុការណ៍នេះ បានកើតឡើងនៅម៉ោង 16 ល្ងាច ថ្ងៃទី 21 ខែសីហា ស្ថិតនៅក្នុងភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។

កូនស្រីរបស់ជនរងគ្រោះឈ្មោះស៊ឹម អូនបាននិយាយថា ម្ដាយរបស់នាង ដែលត្រូវបានគ្រូដេញខ្មោចចូល វាយរហូតដល់ស្លាប់នោះ មានឈ្មោះឡុង សែម ភេទស្រី អាយុ៦៤ឆ្នាំ មានទីលំនៅភូមិស្រម៉ ឃុំទឹកជ្រៅ ស្រុកតំបែរ ខេត្តត្បូងឃ្មុំ។ ចំណែកគ្រូចូលរូបមានឈ្មោះ ឈន់ ភេទស្រី(ជាគ្រូចូលរូប) ប្តីឈ្មោះ ស៊ុ ស្រុង មានទីលំនៅក្នុងភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។

កូនស្រីរបស់ជនរងគ្រោះបានបន្តឲ្យដឹងទៀតថា មុនពេលកើតហេតុរូបខ្លួនបានយកម្តាយមកព្យាបាលជំងឺនឹងគ្រូចូលរូបនេះ ដោយម្តាយខ្លួនមានជំងឺក្តៅរោលរាល និងឈឺសន្លាក់ជើង។ បន្ទាប់ពីគ្រូមានបារមីចូលហើយ បានយកមោងឬស្សី ប្រហែលប៉ុនកដៃប្រវែងប្រហែល១ម៉ែត្រ មកវាយជនរងគ្រោះដោយគ្រូសួរថាឯងជាអ្នកណាឆ្លើយប្រាប់អញមក បើមិនឆ្លើយប្រាប់អញទេ និងមិនព្រមចេញពីអ្នកជំងឺទេ អញនឹងវាឯងរហូតដល់ស្លាប់។

កូនស្រីជនរងគ្រោះបានបន្តថា ពេលនោះម្ដាយរបស់នាងបានស្រែកថាអញឈឺណាស់ឈឺណាស់អញមិនដឹងទេ។ ដោយជនរងគ្រោះឆ្លើយថាអញមិនដឹងទេនោះ គ្រូចូលខ្មោច បានបន្តវាយខ្លាំងទៅៗថែមទាំងឲ្យប្តីឈ្មោះស៊ុំ ស្រុង ជួយចាប់និងអូសជនរងគ្រោះមកមាត់បង្អួចជាន់.ក ឲ្យប្រពន្ធវាយបន្តរហូតដល់បាត់មាត់បាត់ក។

ដោយឃើញសភាពជនរងគ្រោះបាត់មាត់ គ្រូនិងប្តីបានចុះមកដី ហើយប្រាប់ទៅកូនជនរងគ្រោះថាខ្លួនទៅបត់ជើងសិន ម៉ោង៨គាត់ដឹងខ្លួនហើយ តែតាមការពិតគ្រូចូលខ្មោចដ៏ល្បីនោះ រំដោះខ្លួនរត់គេចពីការវាយជនរងគ្រោះរហូតដល់ស្លាប់សោះ។

កូនស្រីបន្តថា ដោយបាត់គ្រូយូរពេក កូនបានមកមើលម្តាយស្រាប់តែម្ដាយរបស់ខ្លួនបានដាច់ខ្យល់ស្លាប់បាត់ទៅហើយ។ បន្ទាប់ពីមានហេតុការណ៍កើតឡើងត្រូវបានក្រុមគ្រួសារជនរងគ្រោះ ប្រាប់ដល់សមត្ថកិច្ចចុះមកដល់កន្លែងកើតហេតុធ្វើកោសល្យវិច័យពិនិត្យទៅលើជនរងគ្រោះឃើញថាជនរងគ្រោះបានស្លាប់ដោយសារមានជំងឺនិងការវាយជាន់កបន្ថែមទើបជនរងគ្រោះដាច់ខ្យល់ស្លាប់។

បច្ចុប្បន្នសពជនរងគ្រោះត្រូវបានប្រគល់ឲ្យក្រុមគ្រួសារជនរងគ្រោះយកទៅធ្វើបុណ្យតាមប្រពៃណី។ចំណែកជនសង្ស័យទាំងពីរនាក់ប្ដីប្រពន្ធជាគ្រូចូលខ្មោចដែលបានរត់គេចខ្លួនសមត្ថកិច្ចកំពុងតែធ្វើការស្រាវជ្រាវដើម្បីតាមចាប់ខ្លួនយកមកផ្តន្ទាទោសទៅតាមផ្លូវច្បាប់៕