ក្រុមបាល់ទាត់ជម្រើសជាតិយុវជនក្រោមអាយុ១៦ឆ្នាំ(U16) របស់កម្ពុជា បានប្រកួតមិត្តភាពកម្តៅសាច់ដុំចំនួន២ប្រកួតហើយ អំឡុងពេលកំពុងហ្វឹកហាត់នៅប្រទេសម៉ាឡេស៊ី រយៈពេល១០ថ្ងៃមុនចេញដំណើរទៅប្រកួតក្នុងពានរង្វាន់ជើងឯកប្រចាំតំបន់អាស៊ាន 2018 AFF U16 Championship នៅចុងខែកក្កដា ឆ្នាំ២០១៨ នេះដែលគ្រោងធ្វើឡើងនៅទីក្រុង Solo ក្នុងប្រទេសឥណ្ឌូណេស៊ី។
ក្រុមU16កម្ពុជា ដឹកនាំដោយលោកLee Tae Hoon គ្រូបង្វឹករបស់ក្រុមយុវជនសាលាបាល់ទាត់ជាតិបាទី បានប្រកួតមិត្តភាពអន្តរជាតិចាញ់ក្រុមម្ចាស់ផ្ទះម៉ាឡេស៊ីដោយលទ្ធផល៤ទល់០ កាលពីល្ងាចថ្ងៃសុក្រ ទី២០ ខែកក្កដា ឆ្នាំ២០១៨ សប្ដាហ៍មុន ខណៈនៅល្ងាចថ្ងៃចន្ទ ដើមសប្ដាហ៍នេះក្រុម U16កម្ពុជា បានប្រកួតស្មើគ្នាជាមួយក្រុម UiTM-U19 ០ទល់០ លើទីលានកីឡដ្ឋាន Bukit Jalil។
បុរសកូរ៉េខាងត្បូងខាងលើដឹកនាំក្រុមឈុតស៊ីហ្គេមឆ្នាំ២០២៣ របស់កម្ពុជាមួយនេះទៅហ្វឹកហាត់នៅប្រទេសម៉ាឡេស៊ី គិតចាប់ពីថ្ងៃទី១៧ ខែកក្កដា ហើយនៅថ្ងៃទី២៧ ខែកក្កដា នឹងចាកចេញពីប្រទេសម៉ាឡេស៊ី បន្តទៅកាន់ប្រទេសឥណ្ឌូណេស៊ី វិញម្តង។ និយាយពីពានរង្វាន់ 2018 AFF U16 Championship វិញមានក្រុមត្រៀមចូលរួមចំនួន១១ ចាប់ដំណើរការប្រកួតពីថ្ងៃទី២៩ ខែកក្កដា ដល់ថ្ងៃទី១១ ខែសីហា ឆ្នាំ២០១៨ ដោយប្រើប្រាស់ទីលានចំនួន២គឺកីឡដ្ឋាន Gelora Joko Samudro Stadium និងកីឡដ្ឋានGelora Delta Stadium។
យោងតាមការចាប់ឆ្នោតបែងចែកពូលរបស់សហព័ន្ធកីឡាបាល់ទាត់អាស៊ាន (AFF) មានពូល A ក្រុមម្ចាស់ផ្ទះឥណ្ឌូណេស៊ី, វៀតណាម, មីយ៉ាន់ម៉ា, កម្ពុជា, ទីម័រខាងកើត និងហ្វីលីពីន ខណៈពូល B មានថៃ, ម៉ាឡេស៊ី, សិង្ហបុរី, ឡាវ និងប្រ៊ុយណេ។ សម្រាប់កាលវិភាគប្រកួតក្នុងពូលឃើញថាកម្ពុជា ត្រូវប៉ះក្រុមវៀតណាម ក្នុងជំនួបបើកពូលក្នុងថ្ងៃទី២៩ ខែកក្កដា ហើយនៅថ្ងៃទី៣១ កក្កដា បន្តប៉ះក្រុមហ្វីលីពីន ខណៈនៅថ្ងៃទី២ ខែសីហា កម្ពុជា ជួបក្រុមទីម័រខាងកើត នៅថ្ងៃទី៤ ខែសីហា កម្ពុជាត្រូវប៉ះក្រុមមីយ៉ាន់ម៉ា និងនៅថ្ងៃទី៦ ខែសីហា កម្ពុជា ប្រកួតបិទពូលជាមួយម្ចាស់ផ្ទះឥណ្ឌូណេស៊ី៕
Source: Kampuchea Thmey Daily
0 Comments