គណៈកម្មការវិន័យរបស់ស.ប.ក ពិន័យដល់កីឡាករនិងមន្ត្រីនៅក្លិបទ័ព,ភ្នំពេញក្រោន និងអង្គរថាយហ្គឺរ ទ្រង់ទ្រាយធំ

សេចក្តីសម្រេចរបស់គណៈកម្មការវិន័យ របស់សហព័ន្ធកីឡាបាល់ទាត់កម្ពុជា ដែលបានចេញជាផ្លូវការក្នុងថ្ងៃទី១៧ ខែសីហា ឆ្នាំ២០១៨ សម្រេចពិន័យចំពោះថ្នាក់ដឹកនាំក្លិបក្រសួងការពារជាតិ រួមមានអគ្គលេខាធិការ និងគ្រូបង្គោល,មន្ត្រី គ្រូបង្វឹក កីឡាករក្លិប ភ្នំពេញក្រោន និងអង្គរថាយហ្គឺរ ក្រោយបង្កកំហុសក្នុងប្រកួតពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន កាលពីពេលថ្មីៗនេះ។

ក្នុងសេចក្តីសម្រេចនោះគឺត្រូវពិន័យ លោក ខូវ ឆាយ អគ្គលេខាធិការនៃក្លិបក្រសួងការពារជាតិ មិនឲ្យចូលរួមក្នុងពានរង្វាន់លីគកំពូលកម្ពុជា រយៈពេល ប្រាំមួយ (៦)ប្រកួត រួមទាំងស្វ័យប្រវត្តិ និងពិន័យជាប្រាក់ ៥០០,០០០រៀល (ហាសិបម៉ឺនរៀល)។ ក្នុងសេចក្តីសម្រេចមួយទៀតផងដែរ ក៏ត្រូវពិន័យ លោក ភា សុភ័ត្រា្ត គ្រូបង្គោលនៃក្លិបក្រសួងការពារជាតិ មិនឲ្យដឹកនាំប្រកួតក្នុងពានរង្វាន់លីគកំពូលកម្ពុជា រយៈពេល ប្រាំមួយ (៦) ប្រកួត រួមទាំងស្វ័យប្រវត្តិ និងពិន័យជាប្រាក់ ១,០០០,០០០រៀល (មួយលានរៀល)។

បើតាមវីដេអូផ្សាយពីការប្រកួតបានបញ្ជាក់ពីមូលហេតុដែលនាំឲ្យកើតមានរឿងនេះឡើង ក៏ព្រោះតែកាលពីថ្ងៃទី១២ ខែសីហា ឆ្នាំ ២០១៨ កន្លងទៅ ក្រសួងការពារជាតិ ប្រកួតស្មើជាមួយនឹង សូលទីឡូអង្គរ លើទីលានកីឡដ្ឋានខេត្តសៀមរាប ក្នុងសប្ដាហ៍ទី១ កន្លងទៅដោយក្នុងនោះគ្រាប់បាល់ទីពីរ ដែលផ្តល់ទៅឲ្យសូលទីឡូ ត្រូវមន្ត្រីខ្សែបន្ទាត់ លើកទង់ជំហរក្រៅល្បែង ប៉ុន្តែមន្ត្រីកាត់សេចក្តីសម្រេច ឲ្យបាល់នោះចូលទី ទើបមានការប្រកែកគ្នា ដោយភាគីខាងក្រសួងការពារជាតិ។

គណៈកម្មការវិន័យក៏ពិន័យ កីឡាករ ហែម ស៊ីម៉ៃ របស់ក្លិបអង្គរថាយហ្គឺរ មិនឲ្យចូលរួមក្នុងការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន រយៈពេល ពីរ (២) ប្រកួត រួមទាំងស្វ័យប្រវត្តិ។ យោងតាមមាត្រា ៤៩ ក្រមវិន័យសហព័ន្ធកីឡាបាល់ទាត់កម្ពុជា ពីបទប្រើឥរិយាបថមិនសមរម្យចំពោះមន្ត្រីការប្រកួត។

ចំណែកលោក SEAN SAINBURY គ្រូបង្គោលរបស់ក្លិបភ្នំពេញក្រោនក៏រងពិន័យ មិនឲ្យដឹកនាំការប្រកួតក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន រយៈពេល បួន (៤) ប្រកួត រួមទាំងស្វ័យប្រវត្តិ។ យោងតាមមាត្រា ៤៩ ក្រមវិន័យសហព័ន្ធកីឡាបាល់ទាត់កម្ពុជា ពីបទ ប្រើឥរិយាបថមិនសមរម្យចំពោះមន្ត្រីការប្រកួត។

កីឡាករ ជួន ចាន់ចាវ របស់ក្លិបភ្នំពេញក្រោន ក៏ពិន័យ មិនឲ្យចូលរួមក្នុងការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន រយៈពេល មួយ (១) ប្រកួត រួមទាំងស្វ័យប្រវត្តិ។ យោងតាមមាត្រា៤៨ ក្រមវិន័យសហព័ន្ធកីឡាបាល់ទាត់កម្ពុជា ពីបទ ប្រើឥរិយាបថមិនសមរម្យចំពោះមន្ត្រីការប្រកួត។

ចំណែកលោក SAMUEL MANNINGS មន្ត្រីពេទ្យរបស់ក្លិបភ្នំពេញក្រោន ត្រូវពិន័យមិនឲ្យចូលរួមក្នុងការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន រយៈពេល បួន (៤) ប្រកួត រួមទាំងស្វ័យប្រវត្តិ។ យោងតាមមាត្រា ៤៩ ក្រមវិន័យសហព័ន្ធកីឡាបាល់ទាត់កម្ពុជា ពីបទ ប្រើឥរិយាបថមិនសមរម្យចំពោះមន្ត្រីការប្រកួត។

ក្រៅពីការពិន័យនេះ គណៈកម្មការ ក៏បានធ្វើការព្រមានទៅដល់ក្លិបអង្គរថាយហ្គឺរ ដោយពិនិត្យឃើញថា ពួកគេប្រព្រឹត្តមិនត្រឹមត្រូវផ្ទុយស្រឡះ ពីក្រមវិន័យសហព័ន្ធកីឡាបាល់ទាត់កម្ពុជា ត្រង់មាត្រា៤៩ ឥរិយាបថមិនសមរម្យចំពោះមន្ត្រីការប្រកួត៕