សៀមរាប ៖ មិត្តចិន អស់ពីប្លន់ ឥឡូវឆក់កាបូបអាជីវក ទៀតហើយ តែមិនបានសម្រេច ត្រូវជនរងគ្រោះកន្ត្រាក់យកមកវិញនិងស្រែកឆោឡោផ្អើលដល់សមត្ថកិច្ចដាក់កម្លាំងព័ទ្ធតាមចាប់បាន។ ហេតុការណ៍នេះកើតឡើងនៅវេលាម៉ោង៧និង៣០ថ្ងៃទី១៨ ខែសីហា ឆ្នាំ២០១៨ នៅក្នុងផ្សារដំដែក ក្នុងភូមិដំដែកផ្សារ ឃុំដំដែក ស្រុកសូទ្រនិគម ខេត្តសៀមរាប។
សមត្ថកិច្ចបានឲ្យដឹងថា ជនរងគ្រោះមានឈ្មោះ យឹម ចន្ថា ហៅស្រី ភេទស្រី អាយុ៥៦ឆ្នាំទីលំនៅភូមិដំដែកផ្សារ ឃុំដំដែក ស្រុកសូទ្រនិគម ខេត្តសៀមរាប មុខរបរ លក់ត្រី។
ក្រោយពេលទទួលបានព័ត៌មានភ្លាមសមត្ថកិច្ចបានដាក់កម្លាំងស្ទាក់ចាប់បានពេលកំពុងជិះម៉ូតូរត់គេចខ្លួនតាមផ្លូវជាតិលេខ៦ឃុំកៀនសង្កែ ស្រុកសូទ្រនិគម។ សមត្ថកិច្ចបន្តថា តាមការសួរចម្លើយបានឲ្យដឹងថា បុរសជនជាតិទាំង២នាក់នោះ មានឈ្មោះទី១ លូ បីន អាយុ៤៤ឆ្នាំ គ្មានទីលំនៅពិតប្រាកដ។ ទី២ឈ្មោះ លូ គង់ជីង អាយុ៥១ឆ្នាំ គ្មានទីលំនៅពិតប្រាកដដូចគ្នា។ បច្ចុប្បន្នកម្លាំងនគរបាលជំនាញកំពុងសួរនាំ ដើម្បីរៀបចំសំណុំរឿងបញ្ជូនទៅតុលាការ៕
Source: Kampuchea Thmey Daily
0 Comments