លី​គ​កំពូល​កម្ពុជា ​៖ ​ណាហ្គា​វើ​ល​,​អង្គ​រថា​យ​ហ្គឺ​រ​និង​វិសាខា រកបាន​៣​ពិន្ទុ​ដូចគ្នា​នៅ​សប្ដាហ៍​ទី​១៨​នេះ

ក្រុមបាល់ទាត់​ណាហ្គា​វើ​ល​,​អង្គ​រថា​យ​ហ្គឺ​រ​និង​វិសាខា សុទ្ធតែ​ប្រកួត​ឈ្នះ​និង​រកបាន​៣​ពិន្ទុ​ដូចគ្នា​នៅ​សប្ដាហ៍​ទី​១៨​នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018) នៅ​ល្ងាច​ថ្ងៃ​សៅរ៍ ទី​១៨ ខែសីហា ឆ្នាំ​២០១៨​។

ចំពោះ​ក្រុម​ណាហ្គា​វើ​ល បាន​យកឈ្នះ​លើ​ក្រុម​កំពូល​តារាង​បឹងកេត ដោយ​លទ្ធផល​២​ទល់​០ លើ​ទីលាន​កីឡដ្ឋាន​ស្តា​ត​ចាស់ ហើយ​ជ័យជម្នះ​នេះ​បានធ្វើ​ឲ្យ​ណាហ្គា​វើ​ល ឡើងឈរ​កំពូល​តារាង​លី​គ​កំពូល​កម្ពុជា បណ្តោះអាសន្ន​វិញ​ម្តង​។ កីឡាករ​នី​ហ្សេ​រី​យ៉ា Mathew Osa និង​កីឡាករ​កូរ៉េខាងត្បូង Sung Chihoon បា​នរក​គ្រាប់​បាល់​ម្នាក់​១​គ្រាប់​ក្នុង​ប្រកួត​នេះ​។



ចំពោះ​ក្រុម​អង្គ​រថា​យ​ហ្គឺ​រ បាន​ប្រកួត​ឈ្នះ​លើ​ក្រុម​ម្ចាស់ផ្ទះ​ភ្នំពេញ​ក្រោ​ន ៤​ទល់​០ លើ​ទីលាន​កីឡដ្ឋាន RSN Stadium​។ កីឡាករ​ជប៉ុន Joichiro Sugiyama បា​នរក​គ្រាប់​បាល់​២​គ្រាប់​ម្នាក់ឯង​ក្នុង​ប្រកួត​នេះ​ឲ្យ​អង្គ​រថា​យ​ហ្គឺ​រ ខណៈ​កីឡាករ ថន សីហា និង តាំង សុ​ភ័​ក្រ បា​នរក​គ្រាប់​ម្នាក់​១​គ្រាប់​តាម​ពីក្រោយ​។



ចំណែក​ក្រុម​វិសាខា វិញ​បាន​ប្រកួត​ឈ្នះ​លើ​ក្រុម​សូល​ទី​ឡូ​អង្គរ ដោយ​លទ្ធផល​២​ទល់​១ លើ​ទីលាន​កីឡដ្ឋាន​ស្តា​ត​ចាស់​។ កីឡាករ​នី​ហ្សេ​រី​យ៉ា Bata បា​នរក​គ្រាប់​បាល់​ឱ្យ​សូល​ទី​ឡូ​អង្គរ មុន​តែ​ត្រូវ​កីឡាករ Kim Kyong Hun និង កែវ សុខ​ផេង បា​នរក​គ្រាប់​បាល់​វាយបក​វិញ​ឱ្យ​វិសាខា យកជ័យ​ជម្នះ​វិញ​ម្តង​។

ពានរង្វាន់​លី​គ​កំពូល​កម្ពុជា រដូវ​កាល​នេះ​ប្រើប្រាស់​រូបមន្ត​ប្រកួត​សន្សំ​ពិន្ទុ​វិលជុំ​ចំនួន​២​ជើងមាន​២២​សប្ដាហ៍ ដើម្បី​ស្វែងរក​ក្រុម​ខ្លាំង​ដែល​មាន​ពិន្ទុ​ច្រើនជាង​គេ​ដណ្តើម​ជើងឯក​ប្រចាំឆ្នាំ​។ ការប្រកួត​ចាប់ផ្តើម​ពីថ្ងៃ​ទី​៣​ខែមីនា ដល់​ថ្ងៃទី​៣០​ខែកញ្ញា ឆ្នាំ​២០១៨ ដែលមាន​សមាជិក​ចំនួន​១២​ក្រុម​។ ក្រុម​ជើងឯក​នឹង​ទទួលបាន​កៅអី​ទៅ​ចូលរួម​ប្រកួត​ក្នុង​ពានរង្វាន់ AFC Cup 2019, ពានរង្វាន់ Mekong Club Championship ជាដើម​។



ចំណែក​ប្រកួត​សប្ដាហ៍​ទី​១៨​នេះ​ដូចគ្នា​នឹង​បន្ត​ប្រកួត​នៅ​ថ្ងៃអាទិត្យ ទី​១៩ ខែសីហា ឆ្នាំ​២០១៨​នេះ​ដោយ​ក្រុម​អាស៊ី​អឺរ៉ុប ប៉ះ​អគ្គីសនី​កម្ពុជា នៅ​ម៉ោង​៣​រសៀល​លើ​ទីលាន​ពហុ​កីឡដ្ឋាន​ជាតិ មាន​ផ្សាយ​ផ្ទាល់​តាម​ប៉ុស្តិ៍ BTV News​ហើយ​ក្រុម​វេ​ស្ទើ​ន​ភ្នំពេញ ត្រូវ​ប៉ះ​ក្រុមព្រះ​ខ័ន​រាជ​ស្វាយរៀង នៅវេលា​ម៉ោង​៣​រសៀល​លើ​ទីលាន​កីឡដ្ឋាន​វេ​ស្ទើ​ន មាន​ផ្សាយ​ផ្ទាល់​តាម​ហ្វេ​ស​ប៊ុ​ក CNCC និង​ក្រុម​ក្រសួងការពារជាតិ ប៉ះ​ក្រុម​អគ្គស្នងការដ្ឋាន​នគរ​បាល​ជាតិ នៅវេលា​ម៉ោង​៦​ល្ងាច​លើ​ទីលាន​កីឡដ្ឋាន​ស្តា​ត​ចាស់ មាន​ផ្សាយ​ផ្ទាល់​តាម​ប៉ុស្តិ៍ BTV News៕

Source: Kampuchea Thmey Daily