បាត់ដំបង ៖ សពក្មេងប្រុសម្នាក់ ដែលបន្សល់តែគ្រោងឆ្អឹងនិងសម្លៀកបំពាក់ ត្រូវបានគេប្រទះឃើញនៅក្នុងដីចំការមួយកន្លែង ក្បែរជើងភ្នំ ដោយមិនទាន់មានប្រភពណាមួយអះអាងថា យ៉ាងណានោះទេ ដោយសារតែគ្រោងឆ្អឹងនេះ ស្ថិតនៅពាសវាលពាសកាល ដែលទំនងជាមានសត្វសាហាវខាំស៊ីជាអាហារ។
ការភ្ញាក់ផ្អើលនេះ គឺបានកើតឡើងនៅល្ងាចថ្ងៃទី១៧ ខែសីហា ឆ្នាំ២០១៨ ត្រង់ចំណុច ចំការដំឡូងមួយកន្លែង ក្នុងភូមិព្រះពុទ្ធ ឃុំបឹងរាំង ស្រុកកំរៀង ខេត្តបាត់ដំបង ដែលកន្លងមកតំបន់ជើងភ្នំនេះ ប្រជាពលរដ្ឋមានការខ្លាចរអាផងដែរ ដោយសារតែមានសត្វសាហាវនៅសេសសល់ ដូចជាសត្វឆ្កែចចក ជាដើម។
បើតាមការរៀបរាប់ពីម្ចាស់ចំការឈ្មោះ ឃន បឿន ភេទប្រុស អាយុ៣៤ឆ្នាំ រស់នៅភូមិព្រះពុទ្ធ ឃុំបឹងរាំង ស្រុកកំរៀង ខេត្តបាត់ដំបង បាននិយាយថា នៅថ្ងៃនោះ លោកបានជួលកម្មករឲ្យទៅបាញ់ថ្នាំស្មៅនៅក្នុងចំការដំឡូងរបស់ខ្លួន ក៏ស្រាប់តែបានប្រទះឃើញ គ្រោងឆ្អឹងមនុស្សម្នាក់ ស្ថិតនៅរាយប៉ាយលើដីចំការ រួមជាមួយនឹងសម្លៀកបំពាក់ផង ហើយនៅក្បែរសព ក៏មានចម្ពាមកៅស៊ូ និងកញ្ចប់បារីផងដែរ ទើបម្ចាស់ចំការរាយការណ៍ទៅសមត្ថកិច្ចឲ្យចុះទៅត្រួតពិនិត្យ។
នៅពេលនោះដែរ បន្ទាប់ពីមានការភ្ញាក់ផ្អើលរួចមក លោក ផង់ ភឿន អាយុ ៤២ឆ្នាំ រួមជាមួយនឹងប្រពន្ធឈ្មោះ លី ស្រីនាង អាយុ៤៧ឆ្នាំ ទាំងពីរនាក់ ធ្វើការជាកម្មករបានអះអាងថា ដោយយោងតាមសម្លៀកបំពាក់ និងសម្ភារៈដែលនៅជុំវិញ គឺសពនេះពិតជាកូនប្រុសរបស់គាត់ យ៉ាងពិតប្រាកដ។
លោកទាំងពីរបានបន្តថា កូនរបស់គាត់ឈ្មោះ ភឿន ភក្តី អាយុ ១២ឆ្នាំ ជាកូនទី ៦ក្នុងចំណោមកូនរបស់គាត់ទាំង១០នាក់ ប៉ុន្តែគាត់ក៏មានការសោកស្តាយដែរ ចំពោះកូនប្រុសរបស់គាត់ដែលកន្លងមក ក៏ធ្លាប់បាត់ខ្លួន២យប់ ទៅ៣យប់ ដែរ ទើបគេចូលផ្ទះព្រោះគេជាក្មេងដែលចេះប្រើប្រាស់ថ្នាំញៀនផង និងជក់បារីផង ហើយការបាត់ខ្លួនលើកនេះ មានរយៈពេល ១២ ថ្ងៃមកហើយ ដោយមិនដឹងជាទៅទីណា ទើបតែពេលនេះក៏ស្រាប់តែមានការភ្ញាក់ផ្អើលតែម្តង។
ដោយបច្ចុប្បន្នឆ្អឹងកូនប្រុសរបស់គាត់ ត្រូវបានកម្លាំងសមត្ថកិច្ចជំនាញ នាំយកទៅធ្វើកោសល្យវិច័យ នៅឯខេត្តបាត់ដំបង ដើម្បីចង់ដឹងការពិត៕
Source: Kampuchea Thmey Daily
0 Comments