ត្បូងឃ្មុំ ៖ លោកវេង សាខុន ប្រធាន ក្រុមការងារថ្នាក់ជាតិចុះជួយស្រុកតំបែរនិងស្រុកកំពង់សៀម រួមជាមួយ អាជ្ញាធរ មានសមត្ថកិច្ច កងកម្លាំងប្រដាប់អាវុធរួមនឹងប្រជាពលរដ្ឋ ប្តេជ្ញាចិត្ត គាំទ្រ យ៉ាងពេញទំហឹង ចំពោះ សម្តេចតេជោ ហ៊ុន សែន ដែលត្រូវបាន ព្រះមហាក្សត្រ តែងតាំងជានាយករដ្ឋមន្ត្រីនៃព្រះរាជាណាចក្រកម្ពុជាសម្រាប់អាណត្តី៦នៃរដ្ឋសភាជាតិ។
ការប្រកាសប្តេជ្ញាចិត្ត គាំទ្រសម្តេចតេជោហ៊ុន សែនយ៉ាងពេញទំហឹងជានាយករដ្ឋមន្ត្រីអាណត្តិទី៦ បានធ្វើឡើង ក្នុងបរិវេណវត្តវណ្ណគិរីសេដ្ឋា នាព្រឹកថ្ងៃសៅរ៍ ៧កើត ខែស្រាពរណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៨ ខែសីហា ឆ្នាំ២០១៨ ខណៈដែល លោក វេង សាខុន និងសហការីបានអញ្ជើញចូលរួមជាមួយ សមាជិក សមាជិកាបក្សឃុំត្រពាំងព្រីង ស្រុកតំបែរចំនួន ២១៥៨នាក់ ដើម្បីអបអរសារទរជ័យជំនះរបស់គណបក្សប្រជាជនកម្ពុជា។ តាមរយៈ លទ្ធផលនៃការរាប់សន្លឹកឆ្នោតកន្លងមក ឃុំត្រពាំងព្រីងទទួលបានសំឡេងគាំទ្រចំនួន ៤១៧៦ ក្នុងចំណោមសន្លឹកឆ្នោតបានការ ៥៤៦៧សន្លឹក ស្មើ៧៧%។
មានប្រសាសន៍នៅក្នុងឱកាសនោះ លោកវេង សាខុន ប្រធាន ក្រុមការងារថ្នាក់ជាតិចុះជួយស្រុកតំបែរ និង ស្រុកកំពង់សៀម រួមជាមួយ អាជ្ញាធរ មានសមត្ថកិច្ច កងកម្លាំងប្រដាប់អាវុធរួមនឹងប្រជាពលរដ្ឋ ប្រកាសចូលរួមអបអរសាទរយ៉ាងជ្រាលជ្រៅបំផុតជូនចំពោះសម្តេចអគ្គមហាសេនាបតីតេជោហ៊ុន សែន ដែលត្រូវបានព្រះមហាក្សត្រ ព្រះបរមនាថ នរោត្តម សីហមុនី ត្រាស់បង្គាប់ចាត់តាំងសម្តេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជាសម្រាប់អាណត្តី៦នៃរដ្ឋសភាជាតិ។ យើងទាំង អស់គ្នាជាប្រជាពលរដ្ឋសូមប្តេជ្ញាគាំទ្រសម្តេចតេជោហ៊ុន សែនយ៉ាងពេញទំហឹងជានាយករដ្ឋមន្ត្រីដើម្បីដឹកនាំនាវាកម្ពុជាបន្តទទួលបាន សុខសន្តិភាព ស្ថិរភាព និងការអភិវឌ្ឍថ្មីៗថែមទៀតនាពេលអនាគត។
ដើម្បីចូលរួមចំណែកកសាង ការពារ និងអភិវឌ្ឍប្រទេស ជាតិ លោកបានណែនាំឲ្យគ្រប់មន្ត្រីជំនាញ និងអាជ្ញាធរ មានសមត្ថកិច្ចពាក់ព័ន្ធគ្រប់លំដាប់ថ្នាក់ត្រូវ ១-បង្កើនការយកចិត្តទុកដាក់អនុវត្តអនុសាសន៍ដ៏ខ្ពង់ខ្ពស់របស់សម្តេចតេជោហ៊ុន សែនឲ្យបានល្អប្រសើរបនិងប្រសិទ្ធភាពបំផុត។២-ត្រូវពង្រឹងប្រសិទ្ធភាពការផ្តល់សេវា សាធារណៈជូនប្រជា ពលរដ្ឋ ឲ្យអស់លទ្ធភាព និងប្រសិទ្ធភាពបំផុត។
៣-ជៀសវាង លុបបំបាត់ល្បែងស៊ីសងគ្រប់ប្រភេទ គ្រឿងញៀន អំពើហិង្សាក្នុងគ្រួសារ និងបងធំបងតូច។ ៤-យកចិត្តទុកដាក់ការងារបង្កបង្កើនផល និងចិញ្ចឹមសត្វដោយត្រូវអនុវត្តតាមគោលការណ៍បច្ចេកទេសត្រឹមត្រូវដើម្បីបង្កើនបរិមាណលើផ្ទៃដដែល ធានាគុណភាព និងសុវត្ថិភាព រក្សាបានសន្តិសុខស្បៀង និងអាហារូបត្ថម្ភ និងឈានទៅប្រែខ្លួនពីកសិករទៅជាកសិពាណិជ្ជករ។
ក្នុងឱកាសនេះ លោកបានជួយដោះស្រាយសំណើជូនប្រជាពលរដ្ឋមាន ឧបត្ថម្ភវត្តបង្ហើរខ្លែង ១លាន វត្តត្រពាំង ព្រីង ៤លាន ទិញដីចាក់វិហា ១លាន ចាក់ដីក្នុងអនុវិទ្យាល័យ ៩សែន និងសាលាបឋមសិក្សាបង្ហើរខ្លែង ២លានរៀល សរុប ៨,៩ លានរៀល៕
Source: Kampuchea Thmey Daily
0 Comments