ក្រុមបាល់ទាត់ Down Town Sport FC បានក្លាយជាម្ចាស់ជើងឯកពានរង្វាន់បាល់ទាត់លីគហ្វូតសាលឆ្នាំ២០១៨ (National Futsal League 2018) ដែលរៀបចំដោយសហព័ន្ធកីឡាបាល់ទាត់កម្ពុជា ក្រោយបញ្ចប់ការប្រកួតនៅល្ងាចថ្ងៃសៅរ៍ ទី១៨ ខែសីហា ឆ្នាំ២០១៨លើទីលាន ដឹប្លូស្ព័ត (The Blue Sport) ម្តុំទួលគោក។
សូមជម្រាបជូនពីលទ្ធផលសរុបនៅថ្ងៃប្រកួតផ្តាច់ព្រ័ត្រ គឺវគ្គដណ្តើមចំណាត់ថ្នាក់ទី៣ បានទៅក្រុមឱម៉ាល់ ក្រោយយកឈ្នះក្រុម Home Sport ៨ទល់២ ខណៈជើងឯកបានទៅក្រុមDown Town Sportក្រោយឈ្នះលើក្រុមស.ស.យ.ក កំចាយមារ ៥ទល់៣។
ចំណែកពានរង្វាន់ឯកត្តជន មានដូចជា ញឹក ថាលីដា ល្អជាងគេប្រចាំព្រឹត្តិការណ៍ អមដោយទឹកប្រាក់លើកទឹកចិត្ត១លានរៀល ហើយអ្នកចាំទី គឹម លីហៀង របស់ Down Town Sport ឈ្នះបានពានរង្វាន់អ្នកចាំទីល្អជាងគេ ខណៈអ្នកទាត់បញ្ចូលទីបានច្រើនជាងគេគឺកីឡាករ អ៊ឹង ស្លូត របស់ក្រុម Fan Sport FT ឈ្នះបានស្បែកជើងមាសនិងទឹកប្រាក់១លានរៀល។ កីឡាករមានម៉ូដសក់ស្អាតជាងគេគឺកីឡាករ អោក ចាន់សេរីវង្ស របស់ក្រុមស.ស.យ.ក កំចាយមារ។ គ្រូល្អជាងគេបានទៅលោក ជ័យ ចាន់រតនា របស់ក្រុម Down Town Sport FC បានពានរង្វាន់១អមដោយទឹកប្រាក់១លានរៀល។
ចំណែកក្រុម Fair Play បានទៅក្រុមឱម៉ាល់ ទទួលបានពានរង្វាន់១អមដោយប្រាក់រង្វាន់៣លានរៀល ហើយក្រុម Home Sport ឈ្នះលេខ៣បានមេដាយកិត្តយសអមដោយទឹកប្រាក់៥លានរៀល ហើយក្រុមឱម៉ាល់ ឈ្នះចំណាត់ថ្នាក់លេខ៣ ទទួលបានមេដាយសំរឹទ្ធម្នាក់១ អមដោយទឹកប្រាក់១០លានរៀល។ ក្រុមលេខ២គឺស.ស.យ.ក កំចាយមារ ទទួលបានមេដាយប្រាក់ម្នាក់១និងទឹកប្រាក់លើកទឹកចិត្តចំនួន១៥លានរៀល។ ក្រុមជើងឯកDown Town Sport ទទួលបានមេដាយមាសម្នាក់១ ពានរង្វាន់១ និងទឹកប្រាក់៣០លានរៀល។
សូមរំលឹកថា ការប្រកួតលីគហ្វូតសាលជាលើកដំបូងនៅក្នុងស្រុកនេះធ្វើឡើងពីថ្ងៃទី០៣ ខែ មិនា រហូតដល់ថ្ងៃទី២៨ ខែ កក្កដា ឆ្នាំ ២០១៨ ខណៈភាគច្រើនប្រកួតនៅថ្ងៃចុងសប្ដាហ៍ ដែលមានក្រុមជាសមាជិកចំនួន១០ក្រុមលើទីលាន ដឹប្លូស្ព័ត (The Blue Sport) ម្តុំទួលគោក។ ការប្រកួតមានរូបមន្តជាលក្ខណៈប្រកួតបែបលីគ តាមប្រព័ន្ធលីគ២ជុំ (វិលជុំសន្សំពិន្ទុ) ហើយក្រុមដែលមានពិន្ទុច្រើនជាងគេចំនួន៤ក្រុម (Top4) ត្រូវឡើងទៅប្រកួតគ្នាដណ្តើមជើងឯកប្រចាំរដូវកាល៕
Source: Kampuchea Thmey Daily
0 Comments