បាត់ដំបង ៖ ជនសង្ស័យចំនួន ៣ នាក់ ដែលពាក់ព័ន្ធនឹងករណីចោរកម្ម ( កាច់សោម៉ូតូ )ត្រូវបានកម្លាំងសមត្ថកិច្ច នៃអធិការដ្ឋាន នគរបាលស្រុកមោងឫស្សី ធ្វើការស្រាវជ្រាវរហូតឈានដល់ការឃាត់ខ្លួនបានជាបន្តបន្ទាប់ ដើម្បីបញ្ជូនតាមនីតិវិធី ទៅកាន់តុលាការក្រោយពីជនសង្ស័យទាំង៣នាក់នេះ បានផ្សំគំនិតគ្នាធ្វើសកម្មភាព លួចកាច់សោម៉ូតូបានសម្រេចមួយគ្រឿង កាលពីថ្ងៃទី១៥ កន្លងទៅថ្មីៗនេះ។
តាមការអះអាងពីលោក វរសេនីយ៍ត្រី ស គឹមឡុង អធិការ នគរបាលស្រុក មោងឫស្សីបានបញ្ជាក់ថា កាលពីថ្ងៃទី១៥ ខែសីហា ចន្លោះពីម៉ោង ១២ ទៅម៉ោង ១ រសៀល មានករណីលួចកាច់សោម៉ូតូមួយគ្រឿងរបស់ឈ្មោះ ស៊ុន ទីន ភេទប្រុស អាយុ៥៣ឆ្នាំរស់នៅភូមិអន្លង់កូប ឃុំរបស់មង្គល ស្រុកមោងឫស្សី ដែលម៉ូតូនេះម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ បាត់ដំបង1AC-7206 ដែលជនរងគ្រោះបានទុកនៅវាលស្រែ។
លោកអធិការបានបន្តថា ក្រោយពីបានទទួលពាក្យបណ្តឹងរួចមក កម្លាំងបានធ្វើការស្រាវជ្រាវ រហូតនៅ ថ្ងៃទី១៦ ខែសីហា ឆ្នាំ២០១៨ វេលាម៉ោង១៧និង០៥នាទី កម្លាំងផ្នែកជំនាញនៃអធិការដ្ឋាន បានសហការជាមួយកម្លាំង អធិការនគរបាល ស្រុកបាកាន ខេត្តពោធិ៍សាត់ បានធ្វើការឃាត់ខ្លួនជនសង្ស័យម្នាក់ ឈ្មោះ ផេង លន់ ភេទប្រុស អាយុ២៣ឆ្នាំ រស់នៅភូមិគួយជីកដី ឃុំរបស់មង្គល នេះដោយមានការឯកភាពពីលោកព្រះរាជអាជ្ញា នួន សាន ផងដែរ ដើម្បីនាំយកមកសាកសួរ។
ក្រោយពីទទួលបានចម្លើយសារភាពរួចមក នៅថ្ងៃទី១៧ ខែ ឆ្នាំដដែល វេលាម៉ោង៤និង៥៥នាទី ល្ងាចកម្លាំងផ្នែកជំនាញនៃអធិការស្រុកមោងឫស្សី បានធ្វើការឃាត់ខ្លួន ជនសង្ស័យ២នាក់ បន្ថែមទៀត គឺឈ្មោះ នឿន ធឿន ហៅចូច ភេទប្រុស អាយុ១៩ឆ្នាំ រស់នៅភូមិគួយជីកដី ឃុំរបស់មង្គល និងឈ្មោះ មម បូរ៉ា ព្រមទាំងបានដកហូតម៉ូតូរបស់ជនរងគ្រោះមកវិញផងដែរ។ បច្ចុប្បន្នសមត្ថកិច្ចស្រុក បានកសាងសំណុំរឿង ដើម្បីបញ្ជូនខ្លួនជនសង្ស័យទាំង៣នាក់ ទៅកាន់ស្នងការដ្ឋាននគរបាលខេត្ត ក្នុងការចាត់វិធានការតាមផ្លូវច្បាប់៕
Source: Kampuchea Thmey Daily
0 Comments