ពោធិ៍សាត់ ៖ តាចាស់ឃើញឱកាសស្ងាត់ល្អ ចាប់រំលោភចៅបង្កើតខ្លួនឯងដល់ទៅ២នាក់បងប្អូន ដែលមានអាយុ១៣ឆ្នាំ និង អាយុ១០ឆ្នាំ សម្រេចទាំង២នាក់ ទើបបែកការដល់ម្ដាយប្ដឹងសមត្ថកិច្ចឲ្យចាប់ខ្លួន។
ហេតុការណ៍បែកធ្លាយពាក្យបណ្ដឹងដល់សមត្ថកិច្ចពីគ្រួសារក្មេងរងគ្រោះរហូតចាប់ខ្លួនសង្ស័យបាននេះ គឺកើតឡើងកាលពីវេលាម៉ោង ១០និង១៥នាទី ថ្ងៃទូ១៧ ខែសីហា ឆ្នាំ២០១៨ ត្រង់ចំណុចផ្ទះលោកតាសង្ស័យ ស្ថិតក្នុងភូមិអង្គ្រង ឃុំសំរោង ស្រុកភ្នំក្រវាញ ខេត្តពោធិ៍សាត់។
ជនសង្ស័យឈ្មោះ កែវ នន់ ភេទប្រុស អាយុ៦៣ឆ្នាំ រស់ក្នុងភូមិកើតហេតុនិងចាប់ខ្លួនខាងលើ។ ក្មេងស្រីរងគ្រោះទី១ឈ្មោះក.ស.ណ អាយុ១០ឆ្នាំ និងទី២ឈ្មោះ ក.ន អាយុ១៣ឆ្នាំ ត្រូវជាបងប្អូនបង្កើតនឹងគ្នា ដោយអ្នកទាំង២រស់នៅផ្ទះក្បែរគ្នានឹងជនសង្ស័យខាងលើ។
បើតាមនគរបាលជំនាញស្រុកភ្នំក្រវាញប្រាប់ថា កាលពីព្រឹកម្សិលមិញនោះ គឺក្មេងស្រីរងគ្រោះទាំង២និងស្ត្រីដែលជាម្ដាយក្មេងនោះ បានមកដាក់ពាក្យនៅប៉ុស្តិ៍រដ្ឋបាល ដោយនាងប្អូនអាយុ១០ឆ្នាំថា កាលពីព្រឹកថ្ងៃទី១៦ ខែសីហា ឆ្នាំ២០១៨ ជនសង្ស័យឈ្មោះកែវ នន់ ដែលត្រូវជាតារបស់នាង បានឡើងលើផ្ទះនាងក្នុងបន្ទប់ដេកម្នាក់ឯង រួចហើយចាប់នាងរំលោភរហូតសម្រេច។
ដោយឡែកនាងជាបងស្រីក្មេងរងគ្រោះម្នាក់ទៀតអាយុ១៣ឆ្នាំ ក៏បានប្ដឹងសមត្ថកិច្ចដំណាលគ្នាថា ជនសង្ស័យខាងលើនោះ ក៏ធ្លាប់ចាប់នាងរំលោភ ក្បែរគុម្ពឫស្សីក្បែរផ្ទះ កាលអំឡុងឆ្នាំ២០១៧ រហូតបានសម្រេច ដោយគំរាមប្រាប់នាងមិនឲ្យនិយាយប្រាប់នរណាទាំងអស់។ នាងខ្លាចផងណាមួយឪពុកពួកនាងដែលត្រូវជាកូនបង្កើតលោកតានោះគាត់ទៅរកស៊ីឈ្នួលកម្មករនៅថៃទៀត ទើបនាងមិនហ៊ាននិយាយប្រាប់ម្ដាយ តែពេលប្អូនស្រីនាងនិយាយរឿងលោកតា នន់ ចាប់រំលោភនាងក៏ប្រាប់ម្ដាយនិងប្ដឹងនគរបាលតែម្ដង។
លោក តាន់ គារិទ្ធិ អធិការរដ្ឋាននគរបាលស្រុកភ្នំក្រវាញឲ្យដឹងថា ក្រោយពេលទទួលបណ្ដឹងក្មេងរងគ្រោះភ្លាម លោកបានចាត់តាំងកម្លាំងអធិការសហការ និង កម្លាំងរដ្ឋបាលប៉ុស្តិ៍ ក៏ចូលដល់ផ្ទះជនសង្ស័យ ឃាត់ខ្លួនមកកាន់អធិការរដ្ឋាននគរបាលស្រុកភ្នំក្រវាញ រួចសួរជនសង្ស័យនោះភ្លាម។ ជនសង្ស័យឈ្មោះ កែវ នន់ អាយុ៦៣ឆ្នាំ នៅភូមិកើតហេតុជាមួយក្មេងស្រីរងគ្រោះខាងលើហើយត្រូវជាជីតាបង្កើតទៀត បានឆ្លើយសារភាពថា ពិតជាគាត់បានចាប់ចៅស្រីបង្កើតខ្លួនឯង រំលោភបានសម្រេចទាំង២នាក់ ដូចអ្វីដែលនាងនិយាយក្នុងបណ្ដឹងពិតប្រាកដមែន។
លោកអធិការបញ្ជាក់ថា ក្រោយពេលទទួលបានចម្លើយសារភាពរបស់ជនសង្ស័យហើយ លោកក៏បានឲ្យជំនាញបំពេញសំណុំរឿងចាត់ការតាមនីតិវិធី បញ្ជូនទៅតុលាការតែម្ដង៕
Source: Kampuchea Thmey Daily
0 Comments