ភ្នំពេញ ៖ អ្នកនាំពាក្យក្រសួងពាណិជ្ជកម្មបានអះអាងថា កម្ពុជាមិនព្រួយបារម្ភពីការនាំចេញផលិតផលវិស័យកាត់ដេរទៅកាន់ទីផ្សារអន្តរជាតិឡើយពិសេសសហគមន៍អឺរ៉ុប និងសហរដ្ឋអាមេរិកបើទោះបីជាប្រទេសកាន់លទ្ធិប្រជាធិបតេយ្យទាំងនេះ មិនទទួលស្គាល់ការបោះឆ្នោតនៅកម្ពុជាយ៉ាងណាក្តី។
លោក សៀង ថៃ អ្នកនាំពាក្យក្រសួងពាណិជ្ជកម្ម បានឲ្យដឹងថា ការបញ្ជាទិញផលិតផលវាយនភណ្ឌសម្លៀកបំពាក់ និងស្បែកជើងពីសំណាក់ក្រុមហ៊ុនធំៗជាច្រើននៅតែមានដំណើរការដដែលព្រោះថា ក្រុមហ៊ុនទាំងនោះបានចុះកុងត្រារួចហើយជាមួយភាគីរោងចក្រនៅកម្ពុជា កាលពីឆ្នាំ២០១៧កន្លងទៅ និង១ឆ្នាំតទៅមុខទៀត ខណៈក្នុងឆមាសទី១នេះ ការបញ្ជាទិញពីសហគមន៍អឺរ៉ុប និងសហរដ្ឋអាមេរិកនាំមានការកើនឡើងជាបន្តបន្ទាប់។
លោកបានបញ្ជាក់ទៀតថា «រហូតមកដល់ពេលនេះនៅ មិនទាន់មានសញ្ញាណណាមួយ ដែលនាំឲ្យប្រទេសទាំងនោះបញ្ចប់ការធ្វើពាណិជ្ជកម្មជាមួយកម្ពុជានោះឡើយ ដោយលំហូរនៃពាណិជ្ជកម្មនៅតែប្រព្រឹត្តជាធម្មតាក្នុងភាពជាដៃគូ»។
ការលើកឡើងពីក្រសួងពាណិជ្ជកម្មនេះបាន ធ្វើឡើងបន្ទាប់ពីក្រុមអ្នកនាំចេញ និងក្រុមសហជីពសំខាន់ៗ បានសម្តែងនូវក្តីបារម្ភពីការបញ្ចប់ភាពអនុគ្រោះពន្ធលើការនាំចេញផលិតផលកាត់ដេរ និងទំនិញផ្សេងទៀតទៅសហគមន៍អឺរ៉ុប ក្រោយពីក្រុមប្រទេសកាន់លទ្ធិប្រជាធិបតេយ្យមួយចំនួន ប្រកាសមិនទទួលស្គាល់ការបោះឆ្នោតនៅកម្ពុជា កាលពីថ្ងៃទី២៩ ខែកក្កដាកន្លងទៅនេះ។
ក្នុងឆមាសទី១ ឆ្នាំ២០១៨នេះ ការនាំចេញផលិតផលកាត់ដេរសម្លៀកបំពាក់ និងស្បែកជើងរបស់កម្ពុជា ទៅកាន់ទីផ្សារអន្តរជាតិ បានបន្តហក់ឡើងដល់៩.៣% បើធៀបនឹងរយៈពេលដូចគ្នាកាលពីឆ្នាំមុន។ ការនាំចេញផលិត ផលកាត់ដេររបស់កម្ពុជា ទៅកាន់ទីផ្សារបរទេស មានតម្លៃជិត៤ ពាន់ លានដុល្លារ ក្នុងរយៈពេល៦ខែ ដើមឆ្នាំ២០១៨នេះ កើនឡើង៩.៣% បើធៀបនឹងរយៈពេលដូចគ្នាកាលពីឆ្នាំមុន។
បើតាមក្រសួងពាណិជ្ជកម្ម កំណើននៃការនាំចេញរបស់កម្ពុជា ទៅកាន់ទីផ្សារអឺរ៉ុប មានការកើនឡើងដល់ ១០.៦៦% ដែលមានតម្លៃសរុបជាង១.៦ ពាន់លានដុល្លារ។ ចំណែកទីផ្សារអាមេរិក មានកំណើន ១០.៧៣% និងមានតម្លៃ៨៥៨ លានដុល្លារ។
បើតាមក្រសួងពាណិជ្ជកម្មដដែល ការនាំចេញរបស់កម្ពុជា ទៅកាន់ទីផ្សារទាំងពីរ បានគ្របដណ្តប់រហូតដល់ទៅ ៧២ភាគរយនៃការនាំចេញសរុបរបស់កម្ពុជា ខណៈដែលការនាំចេញទៅកាន់ប្រទេសកាណាដា បានកើនឡើងជាង៩ភាគរយ ដែលមានតម្លៃ ៣២៤ លានដុល្លារ។
លោកសៀង ថៃ បានបន្តថា ក្រៅពីទីផ្សារសហគមន៍អឺរ៉ុប និងសហរដ្ឋអាម៉េរិកកម្ពុជាក៏អាចនាំចេញទៅកាន់ប្រទេសផ្សេងទៀតបានដែរ ពិសេសប្រទេសនៅក្នុងតំបន់។
ចំណែកលោកកាំងម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) បានប្រាប់វិទ្យុអន្តរជាតិឲ្យដឹងថា សហភាពអឺរ៉ុបនិងសហរដ្ឋអាមេរិកនឹងបន្តក្លាយជាទីផ្សារដ៏សំខាន់បំផុតរបស់កម្ពុជា។
យោងតាមរបាយការណ៍ពីក្រសួងពាណិជ្ជកម្ម បានបង្ហាញថា ការនាំចេញផលិតផលកាត់ដេរសម្លៀកបំពាក់ និងស្បែកជើងរបស់កម្ពុជា ទៅកាន់ទីផ្សារអន្តរជាតិ ក្នុងឆមាសទី១ ឆ្នាំ២០១៨នេះ មានទឹកប្រាក់ជិត៤ពាន់លានដុល្លារអាមេរិក ដោយកើនឡើងជាង៩ភាគរយ បើធៀបនឹងរយៈពេលដូចគ្នាកាលពីឆ្នាំមុន ក្នុងនោះការនាំចេញទៅកាន់ទីផ្សារអឺរ៉ុប មានតម្លៃសរុបជាង១.៦០០លានដុល្លារ ចំណែកទីផ្សារអាមេរិក តម្លៃជាង៨៥០លានដុល្លារ៕
Source: Kampuchea Thmey Daily
0 Comments