ឃាត់​ខ្លួន​ស្ត្រី​ខ្មែរ​ម្នាក់ ​រួម​ជាមួយ​គូកន ចាប់​បង្ខាំង​ជនបរទេស​ម្នាក់​ជំរិត​យក​លុយ

ភ្នំពេញ​ ៖​ មាន​ការ​ភ្ញាក់ផ្អើល​មួយ​បាន​កើត​ឡើង ដោយសារ​វត្តមាន​បុរស​ជន​បរទេស​ម្នាក់ រត់ចេញ​ពី​ក្នុង​ផ្ទះ​មួយ​ ដោយ​មាន​ស្នាមរបួស ហើយ​ក្រោយមក​ទើប​ដឹង​ថា ជា​អំពើ​ចាប់​បង្ខាំង​មនុស្ស​ធ្វើ​ទារុណកម្ម​ដើម្បី​ជំរិត​យក​លុយ កាលពី​ល្ងាច​ថ្ងៃ​ទី​១៨ ខែ​សីហា ឆ្នាំ​២០១៨ ក្នុង​បុរី​មហា​សែន​សុខ នៅ​ភូមិ​វិមាន​ទ្រង់ សង្កាត់​ក្រាំងធ្នង់ ខណ្ឌ​សែន​សុខ។

ប៉ូលិស​និយាយថា នៅក្នុង​ហេតុការណ៍​នេះ ​សមត្ថកិច្ច​បាន​ឃាត់ខ្លួន​ស្ត្រី​ម្នាក់​ជា​បក្ខពួក​ជនសង្ស័យ​ដែល​បាន​ចូលរួម​ធ្វើ​សកម្មភាព​ក្នុងការ​ចាប់ជំរិត​យក​លុយ​នេះ គឺ​ឈ្មោះ សូ​នី​តា អាយុ​២៣​ឆ្នាំ មុខរបរ​បំរើ​ការងារ​នៅក្នុង​ហាង បារាំង​មួយ និង​ស្នាក់​នៅ​ផ្ទះជួល​ក្នុងភូមិ កើតហេតុ​នេះ។

បើតាម​ចម្លើយ​សារភាព​របស់​ជន​សង្ស័យ សូ​នី​តា បាន​បញ្ជាក់​​​ថា បក្ខពួក​របស់​គេ ​ដែល​បាន​រត់​គេចខ្លួន​មាន​ចំនួន​៤​នាក់​មានឈ្មោះ ១. ម៉ា ឈី​ង ភេទ​ប្រុស អាយុ​៣៤​ឆ្នាំ ជន​ជាតិ​នី​សេរីយ៉ា​។ ២. សាំ កុង ភេទ​ប្រុស​អាយុ​៣៣​ឆ្នាំ ជនជាតិ​នី​សេរីយ៉ា។ ៣. ឈ្មោះ ប៊ូ​ស ភេទ​ប្រុស អាយុ​៣៥​ឆ្នាំ ជនជាតិ​នី​សេរីយ៉ា មិន​ស្គាល់​ទីកន្លែង​ស្នាក់នៅ​។ ៤. មិន​ស្គាល់ឈ្មោះ ភេទ​ប្រុស អាយុ​ប្រហែល​៣២​ឆ្នាំ មិន​ស្គាល់​ទី​លំនៅ​។​

ជនរងគ្រោះ​ឈ្មោះ Iroegbu Uche Andrew ភេទ​ប្រុស អាយុ​៤៦​ឆ្នាំ ជនជាតិ នីហ្សេរីយ៉ា មាន​ទីលំនៅ ក្នុង​បុរី​ពិភព​ថ្មី​២ នៅ​ចំការ​ដូង ខណ្ឌដង្កោ​។​

ប៉ូលិស​បាន​និយាយ​ថា ៖ នៅ​មុន​ពេល​កើតហេតុ កាលពី​ថ្ងៃទី​១១ ខែសីហា ឆ្នាំ​២០១៨ ​វេលា​ម៉ោង​៦​ល្ងាច ជនសង្ស័យ​ឈ្មោះ ម៉ា ឈី​ង បាន​ប្រើ​ល្បិច​អោយ​នាង​សូ​នី​តា ជា​សង្សារ​របស់​ខ្លួន ទូរស័ព្ទ​ទៅទាក់ទង​ជនរងគ្រោះ​ឈ្មោះ Iroegbu Eche Andrew ល្បួង​គេ​ឲ្យ​ធ្វើដំណើរ​មកលេង​នៅផ្ទះ​របស់ខ្លួន​(​ផ្ទះកើតហេតុ​) ដោយ​ជិះ​រ៉ឺម៉ក​ម៉ូតូ (​តុ​ក​តុ​ក​) នៅពេល​ជនរងគ្រោះ​មកដល់​ក្នុងផ្ទះ​នោះ​ក៏​ស្រាប់តែ​បុរស​ជនជាតិ​​​នីហ្សេរីយ៉ា​ទាំង​៤​នាក់​ខាងលើ បាន​បង្គាប់​និង​គំរាម​អោយ​ជន​រង​គ្រោះ​យកលុយ​ចំនួន​៥០០០​ដុល្លារ មកអោយ​ពួកគេ បើ​មិនបាន​៥០០០​ដុល្លារ​យ៉ាងហោច​ក៏បាន​៣០០០​ដុល្លារ​ដែរ​។​

នៅ​ពេល​នោះ​ជនរងគ្រោះ​ប្រាប់​ថា​ គ្មាន​លុយ ក៏​ត្រូវ​ពួកគេ​នាំគ្នា​យក​ឆ្នាំងអ៊ុត​មក​អ៊ុត​លើ​ថ្ពាល់​ខាងឆ្វេង និង​ដៃ​ខាងឆ្វេង ស្មា​ខាងឆ្វេង របស់​ជនរងគ្រោះ អោយ​រង​របួស រលាក​។​

ប្រភព​ដដែល​បន្តថា លុះដល់​ថ្ងៃទី​១៨ ខែសីហា ឆ្នាំ​២០១៨ វេលា​ម៉ោង​ប្រហែល​៦​ល្ងាច ខណៈ​ក្រុម​ជនល្មើស​ប្រុសៗ​នាំគ្នា​ចេញ​មក​ក្រៅ​ផ្ទះ​រកទិញ​អាហារ​បរិភោគ​ ដោយ​មិនបាន​​​ចាក់សោ​ទ្វារ​បន្ទប់ នៅ​សល់តែ​នាង សូ​នី​តា ដេក​យាម ជន​រង​គ្រោះ​ក៏បាន​ស្ទុះ​រត់គេចខ្លួន​ចេញពី​ទីនោះ​តែម្តង​ដោយ​ស្រែក អោយគេ​ជួយ​ក្នុង​សភាព​ភ័យខ្លាច​។​

​ហេតុការណ៍​នេះ​ក៏​ត្រូវបាន​សន្តិសុខ​ជួយ​អន្តរា​គម​ន៍​ ប្ដឹង​ប៉ូលិស​មូលដ្ឋាន​មកជួយ​អន្តរាគមន៍​បន្ត ដោយ​ឃាត់ខ្លួន​ជនសង្ស័យ​បាន​ម្នាក់​គឺ​នាង សូ​នី​តា ឯ​បក្ខ​ពួកគេ​ប្រុសៗ​៤​នាក់​ទៀត​ដឹងខ្លួន​ក៏​រត់​គេច​អស់​៕

Source: Kampuchea Thmey Daily