សៀមរាប ៖ កម្លាំងនគរបាលប៉ុស្តិ៍ចំនួន៧ នៃក្រុងសៀមរាប សរុបមានកម្លាំងចំនួន២៣នាក់បានសហការជាមួយសហគមន៍នេសាទ ឆ្មក់បង្ក្រាបបទល្មើសនេសាទខុសច្បាប់ ក្នុងភូមិសាស្ត្រ តំបន់ជាប់មាត់បឹងទន្លេសាប កាលពីព្រឹកថ្ងៃទី១៧ខែសីហានេះ ដោយប្រើប្រាស់មធ្យោបាយ កាណូតចំនួន៦គ្រឿង។
ការឆ្មក់បង្ក្រាបនេះ ក្រោយពីមានពលរដ្ឋរាយការណ៍ថា មានបទល្មើសនេសាទជាច្រើនកន្លែងបានដាក់ពង្រាយជាច្រើនកន្លែង ខណៈជំនាញជលផល ហាក់ស្ងៀមស្ងាត់ ហើយបទល្មើសនេះ កំពុងស្ទុះឡើងយ៉ាងផុសផុល។
មន្ត្រីនគរបាលបានឲ្យដឹងថា ប្រតិបត្តិការនេះ ជាលទ្ធផលដកហូត និង កាប់បំផ្លាញស្បៃមុងនិងស្បៃបរ ចំនួន២៩០០ម៉ែត្រ។ ដកហូតក្បាលបរ បានចំនួន០៤ក្បាល។ ដកហូតក្បាលអ៊ុយស្បៃមុងបានចំនួន២០ក្បាល។ ដកហូតនិងកាប់ឈើចំរឹងចំនួន១៩០០ដើម។ ប្រលែងកូនត្រី ចូលបឹងធម្មជាតិវិញ បានចំនួន៦៥គីឡូក្រាម។
ប្រភពបញ្ជាក់ថា ក្នុងរដូវត្រីពងកូននេះ បទល្មើសនេសាទហាក់មានសន្ទុះខ្លាំង ចឹងទេសមត្ថកិច្ចចាំបាច់រួមសហការគ្នាទប់ស្កាត់ ដើម្បីរក្សាការពារធនធានធម្មជាតិ ទោះមិនបានមួយរយភាគរយ តែក៏អាចកាត់បន្ថយចំពោះបទល្មើសនេះបាន។ ប៉ុន្តែអ្វីដែលគួរឲ្យសោកស្តាយនោះ គឺកម្លាំងជំនាញរដ្ឋបាលជលផលខេត្តសៀមរាប មិនដែលបានចុះបង្ក្រាបបទល្មើសនេសាទនៅក្នុងដែនគ្រប់គ្រងសោះឡើយ។
ទាក់ទិនករណីបទល្មើសនេសាទកើតមានពាសពេញផ្ទៃបឹងទន្លេសាបនៃខេត្តសៀមរាប នេះ អ្នកព័ត៌មាន បានព្យាយាមទាក់ទងទៅលោកទា គឹមសុទ្ធ ប្រធានមន្ទីរកសិកម្មរុក្ខា ប្រមាញ់និងនេសាទ ដែរតែទូរស័ព្ទរបស់លោកនៅក្រៅតំបន់សេវា។ ទោះបីជាបែបនេះក្តីគេសង្ឃឹមថា លោកឃឹម ប៊ុនសុង អភិបាលខេត្តសៀមរាប អាចមានវិធានការដុះក្អែលមន្ត្រីជំនាញអសកម្មទាំងនេះផង៕
Source: Kampuchea Thmey Daily
0 Comments