បន្ទាយមានជ័យ ៖ ព្រឹកថ្ងៃទី២៣ ខែសីហា ឆ្នាំ២០១៨នេះលោក មាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលា ដំបូងខេត្តបន្ទាយមានជ័យ បានសហការណ៍ជាមួយសមត្ថកិច្ចពាក់ព័ន្ធ គយក្រសួងប្រចាំខេត្តបន្ទាយមានជ័យ និងមន្ត្រីការិយាល័យស្រាវជ្រាវ បង្ក្រាបអំពើរត់ពន្ធតំបន់៥មន្ត្រីការិយាល័យស្រាវជ្រាវ និង បង្ក្រាបអំពើរត់ពន្ធតំបន់៥ បានចុះបង្ក្រាបនៅទីតាំងស្តុកម៉ូតូ១កន្លែងនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែតបានរកឃើញ ម៉ូតូស៊េរីទំនើប១០គ្រឿងគេចពន្ធរួមមាន PCX៤គ្រឿង ZoomerX១គ្រឿង Clic៤គ្រឿង Scoopy១គ្រឿងរបស់ម្ចាស់មានឈ្មោះផន ថាវរៈ ភេទប្រុស អាយុ៣៣ឆ្នាំ ជាអ្នកទិញលក់ម៉ូតូនៅក្នុងភូមិក្បាលស្ពាន១ សង្កាត់ប៉ោយ ក្រុងប៉ោយប៉ែត ខេត្តបន្ទាយមានជ័យ។
បើតាមការអះអាងរបស់សមត្ថកិច្ចបានប្រាប់អ្នកយកព័ត៌មានឲ្យដឹងថា ម៉ូតូទាំងនេះទិញពីគេគឺយកឲ្យដល់ផ្ទះ ករណីនេះលោក អាត អឿន អនុប្រធានការិយាល័យស្រាវជ្រាវបង្ក្រាបអំពើរត់ពន្ធតំបន់៥ គយក្រសួងប្រចាំខេត្តបន្ទាយមានជ័យប្រាប់ថា ម៉ូតូបង្ក្រាបទាំងនេះជារបស់គេចពន្ធលោកថាក្រោយពីបង្ក្រាប និងយកទៅរក្សាទុកនៅការិយាល័យរបស់លោកដើម្បីធ្វើកំណត់ហេតុបញ្ជូនទៅអគ្គនាយកដ្ឋានគយ និងរដ្ឋាករចាត់ការតាមផ្លូវច្បាប់ ឲ្យម្ចាស់ចូលទៅបំពេញកាតព្វកិច្ចពន្ធ និងទទួលការផាកពិន័យតាមផ្លូវរដ្ឋដាក់ពិន័យផាកជាដើម។
ដោយឡែកលោក មាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្ត ប្រាប់ថា លោកគ្រាន់តែសហការដើម្បីឲ្យមន្ត្រីជំនាញឆែកឆេរទីតាំងស្តុកម៉ូតូអត់ពន្ធតែប៉ុណ្ណោះ៕
Source: Kampuchea Thmey Daily
0 Comments