ភ្នំពេញ ៖ អនុប្រធានគណបក្សសំបុកឃ្មុំសង្គមប្រជាធិបតេយ្យ និងជាអនុប្រធានគណៈកម្មាធិការអចិន្ត្រៃយ៍ លោក ហ៊ាង គឹមស្រឿន បានសម្រេចសុំលាលែងពីតំណែងរបស់ខ្លួន ដោយសំអាងថា មេដឹកនាំគណបក្សនេះ មិនគោរពប្រជាធិបតេយ្យផ្ទៃក្នុងបក្សឲ្យបានត្រឹមត្រូវ នេះបើយោងតាមលិខិតលាលែងចុះថ្ងៃទី២៣ ខែសីហា ឆ្នាំ២០១៨។
លិខិតលោក ហ៊ាង គឹមស្រឿន ដែលបានផ្ញើជូនប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ បានលើកឡើងថា មូលហេតុដែលលាលែងនោះ ដោយសារលោកមើលឃើញពីគោលជំហររបស់គណបក្សសំបុកឃ្មុំសង្គមប្រជាធិបតេយ្យ មិនបានគោរពប្រជាធិបតេយ្យផ្ទៃក្នុងបក្ស ក្នុងការសម្រេចចិត្ត។ លិខិតបញ្ជាក់យ៉ាងនេះថា “សូមលោកប្រធានជ្រាបថា មូលហេតុនៃការសុំលាលែងពីសមាជិកភាពអនុប្រធានគណបក្ស និងសមាជិកភាពអនុប្រធានគណៈកម្មាធិការអចិន្ត្រៃយ៏ នៃគណបក្សសំបុកឃ្មុំសង្គមប្រជាធិបតេយ្យ ដោយខ្ញុំមើលឃើញពីគោលជំហររបស់គណបក្សសំបុកឃ្មុំសង្គមប្រជាធិបតេយ្យ ដែលជាអ្នកប្រជាធិបតេយ្យ ហើយមិនបានគោរពប្រជាធិបតេយ្យផ្ទៃក្នុងបក្ស ក្នុងការសម្រេចចិត្តចូលរួមបង្កើត “ឧត្ដមក្រុមប្រឹក្សាពិគ្រោះ និងផ្ដល់យោបល់” ដោយអត្តនោម័ត ដែលខ្ញុំមិនអាចបន្តសកម្មភាពនយោបាយនៅក្នុងគណបក្សតទៅទៀតបាន”។
ទាក់ទងបញ្ហានេះ ការិយាល័យមិបអាចស្វែងរកការបញ្ជាក់ពីលោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យបានទេ ប៉ុន្តែលោកធ្លាប់បាននិយាយប្រាប់អ្នកសារព័ត៌មានថា លោក ហ៊ាង គឹមស្រឿន គឺជាបុគ្គលមួយល្អ ដែលបានចូលរួមធ្វើការជាមួយគណបក្ស មុនយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ប៉ុន្តែលោកថា ចុងក្រោយនេះ ប្រហែលជាគាត់មានបញ្ហាអ្វីមួយ។ លោកបន្តថា ការពិតមុននឹងចូលរួមបង្កើត “ឧត្ដមក្រុមប្រឹក្សាពិគ្រោះ និងផ្ដល់យោបល់” គឺលោកបានបើកប្រជុំ ដោយក្នុងនោះ ក៏មានវត្តមានលោក ហ៊ាង គឹមស្រឿន ដែរ។ តែយើងមិនបាច់និយាយបន្ទោសគ្នាទៅវិញទៅមកនោះទេ ហើយថា បើមានគំនិតខុសគ្នា យើងមិនបាច់ធ្វើការជាមួយគ្នាទេ ចៀសជាងនៅជាមួយគ្នា ប្រទូស្តរាយគ្នា៕
Source: Kampuchea Thmey Daily
0 Comments