បាត់ដំបង ៖ ជនសង្ស័យចំនួន២នាក់ រួមជាមួយនឹងវត្ថុតាងមួយចំនួន ត្រូវបានកម្លាំងមូលដ្ឋានកងរាជអាវុធហត្ថក្រុង ធ្វើការឃាត់ខ្លួនទាំងកណ្តាលយប់ ខណៈដែលមុខសញ្ញានេះ កំពុងធ្វើដំណើរតាមដងផ្លូវ ក្នុងគោលបំណងធ្វើសកម្មភាពចែកចាយគ្រឿងញៀននៅក្នុងមូលដ្ឋាន។
កិច្ចប្រតិបត្តិការនេះ គឺបានធ្វើឡើងកាលពីវេលាម៉ោង ៩ និង ៣០ នាទី យប់ ថ្ងៃទី១៣ ខែសីហា ឆ្នាំ២០១៨ ត្រង់ចំណុចខាងក្រោយ សាកលវិទ្យាល័យ ខេមរៈ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដោយកំលាំង មូលដ្ឋាន កងរាជអាវុធហត្ថ ក្រុងបាត់ដំបង។
នៅក្នុងកិច្ចប្រតិបត្តិការនេះ កម្លាំងបានឃាត់ខ្លួនជនសង្ស័យចំនួន ២ នាក់ គឺ ឈ្មោះ ពេញ សម្បត្តិ ភេទប្រុស អាយុ ២៤ ឆ្នាំ មុខរបរ មិនពិតប្រាកដ មានទីលំនៅភូមិសំរោងតាកុក ឃុំសំរោងក្នុង ស្រុកឯកភ្នំ និង ឈ្មោះ អ៊ឹម ថាថាត ហៅ ង៉ា ភេទប្រុស អាយុ ១៨ ឆ្នាំ ដោយមានមុខរបរ ធ្វើចំការ រស់នៅ ភូមិផ្សារត្បែង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
វត្ថុតាងដែលសមត្ថកិច្ចដកហូតបានរួមមាន ៖ ថ្នាំញៀនប្រភេទម៉ាទឹកកក ចំនួន ៦ កញ្ចប់ ទម្ងន់ ២,២១ ក្រាម ម៉ូតូ ១ គ្រឿង ម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ គ្មានស្លាកលេខ ទូរស័ព្ទ ៣ គ្រឿង និង សម្ភារៈសម្រាប់វេចខ្ចប់គ្រឿងញៀនមួយចំនួន ទៀត។
បច្ចុប្បន្នជនសង្ស័យ រួមនឹងវត្ថុតាង កំពុងកសាងសំណុំរឿងបន្តតាមនីតិវិធី៕
Source: Kampuchea Thmey Daily
0 Comments