ភ្នំពេញ ៖ នារីវ័យក្មេងម្នាក់ បានអះអាងថា ខ្លួនត្រូវបានក្រុមដៃស្អិតឆក់កាបូបចំនួន២លើកមកហើយ បានសម្រេចទាំងពីរលើក ហើយលើកនេះគឺខ្លួនកំពុងធ្វើដំណើរតាមផ្លូវសហព័ន្ធរុស្ស៊ី មុខអាកាសយានដ្ឋានអន្តជាតិភ្នំពេញ ហើយលើកនេះគាត់បានបាត់បង់ទ្រព្យសម្បត្តិអស់១កាបូបទៀតហើយ ដោយក្រុមជនសង្ស័យមានគ្នាពី៤ទៅ៥នាក់ ជិះម៉ូតូ៣គ្រឿងមកព្រួតគ្នាធ្វើសកម្មភាពឆក់កាបូបស្ពាយរបស់នាងខណៈកំពុងជិះម្នាក់ឯង ដែលហេតុការណ៍នេះបានកើតឡើងកាលពីវេលាម៉ោង១០និង២០នាទីព្រឹក ថ្ងៃទី០១ ខែសីហា ឆ្នាំ២០១៨ ស្ថិតនៅលើផ្លូវសហព័ន្ធរូស្ស៊ីមុខភូមិក្បាលដំរី សង្កាត់កាកាប២ ខណ្ឌពោធិ៍សែនជ័យ។
នារីរងគ្រោះមិនបានប្រាប់ឈ្មោះទេ ដោយបានប្រាប់ថា កន្លងមកនាងធ្លាប់ជួបរឿងដែលជនសង្ស័យ ឆក់កាបូបចំនួន២លើកមកហើយ ទាំងលើកនេ។ សម្រាប់លើកនេះ ខណៈដែលនាងកំពុងជិះម៉ូតូម៉ាកស៊ុយហ្សុយគីលេត ធ្វើដំណើរលើផ្លូវសហព័ន្ធរុស្ស៊ីពីលិចទៅកើត លុះជិះជិតដល់ស្តុបព្រលានថ្មី បន្ថយល្បឿន ស្រាប់តែមានម៉ូតូរបស់ជនសង្ស័យចំនួន៣គ្រឿងក្នុងនោះ មួយគ្រឿងបើកខាងមុខ មួយគ្រឿងនៅចំហៀងខាងឆ្វេងដៃ ហើយធ្វើសកម្មភាពឆក់យកកាបូបស្ពាយ ដែលដាក់ទុកនៅម៉ូតូក្រោមជើងយកទៅបាត់ ភ្លាមៗនាងខំដេញតាមផង ស្រែកផង តែមានម៉ូតូមួយគ្រឿងមិនចាំម៉ាក សង្ស័យជាម៉ូតូបក្ខពួកក្រុមជនសង្ស័យបានជិះមកកៀរឲ្យឈប់រួចដកសោម៉ូតូនាងដើម្បី រារាំងមិនឲ្យនាងដេញតាមទាន់ជាឱកាស ទុកលទ្ធភាពឲ្យជនសង្ស័យបើករត់គេចទៅបាត់ដោយសុវត្ថិភាព ហើយបន្ដិចក្រោយមកក្រុមម៉ូតូទាំងនោះបានបើករត់គេចតាមក្រោយម៉ូតូជនសង្ស័យបាត់អស់ដែរ។
តាមនារីរងគ្រោះបានបន្ដឲ្យដឹងថា ក្នុងកាបូបនោះ មានលេបថប មួយគ្រឿង ទូរស័ព្ទ Iphone៦ មួយគ្រឿង ឯកសារមួយចំនួន លុយមួយចំនួនផងដែរ។ ក្រោយកើតហេតុ ជនរងគ្រោះ បានត្រឹមរត់ទៅប្តឹងនគរបាលប៉ុស្តិ៍កាកាប១ ឲ្យសមត្ថកិច្ចជួយស្រាវជ្រាវរកជនសង្ស័យតែប៉ុណ្ណោះ ប៉ុន្ដែមិនដឹងថា អាចតាមរកឃើញដែរឬទេ៕
Source: Kampuchea Thmey Daily
0 Comments