ភ្នំពេញ ៖ មន្ទីរធនធានទឹក និងឧតុនិយមខេត្តបន្ទាយមានជ័យ បានរៀបចំដំឡើង ម៉ាស៊ីនបូមទឹកចល័តខ្នាតមធ្យម ចំនួន ០២ គ្រឿង សម្រាប់ ដំណើរការបូមរំដោះជំនន់ទឹកភ្លៀងចេញពីដីស្រែកសិករក្នុងស្រុកមង្គលបូរី ដើម្បីជួយកសិករ ធ្វើយ៉ាងណាធានានូវការប្រមូលផលរបស់កសិករបានទាន់ពេលវេលា ខណៈជំនន់ទឹកភ្លៀងបន្តជន់លិច។
ការដំឡើង ម៉ាស៊ីនបូមទឹកចល័តខ្នាតមធ្យម ចំនួន ០២ គ្រឿង សម្រាប់បូមទឹកចេញពីស្រែ ដើម្បីសម្រួលឲ្យកសិករ ប្រមូលផល ឲ្យបានទាន់ពេលវេលា របស់ក្រសួង ធនធានទឹកបាន ធ្វើឡើងបន្ទាប់ពី មានភ្លៀងធ្លាក់ច្រើនជាប់ៗគ្នានៅក្នុងភូមិសាស្ត្រស្រុកមង្គលបូរី ខេត្តបន្ទាយមានជ័យ បានធ្វើឱ្យផ្ទៃដីដំណាំស្រូវវស្សារបស់កសិករជាង ២ ពាន់ហិកតា រងការលិចលង់ដោយជំនន់ទឹកភ្លៀង។
ក្រសួងធនធានទឹក និងឧតុនិយមបានឲ្យដឹងថា ដើម្បីជួយកសិករ ធ្វើយ៉ាងណាធានានូវការប្រមូលផលរបស់កសិករបានទាន់ពេលវេលា ខណៈជំនន់ទឹកភ្លៀងបន្តជន់លិច កាលពីថ្ងៃទី៣១ ខែកក្កដា លោក លឹម គានហោ រដ្ឋមន្ត្រីក្រសួងធនធានទឹកនិង ឧតុនិយម បានបញ្ជាឲ្យ មន្ទីរធនធានទឹកខេត្ត បន្ទាយមានជ័យ ដំឡើង ដាក់ ម៉ាស៊ីនបូមទឹកចល័តខ្នាតមធ្យម ចំនួន ០២ គ្រឿង កំពុងដំណើរការបូមរំដោះជំនន់ទឹកភ្លៀងចេញពីដីស្រែកសិករ ក្នុងស្រុកមង្គលបូរី។
ក្រសួងបញ្ជាក់ថា ដោយសារមានភ្លៀងធ្លាក់ច្រើនជាប់ៗគ្នានៅក្នុងភូមិសាស្ត្រស្រុកមង្គលបូរី ខេត្តបន្ទាយមានជ័យ បានធ្វើឲ្យផ្ទៃដីដំណាំស្រូវវស្សារបស់កសិករជាង ២ ពាន់ហិកតា រងការលិចលង់ដោយជំនន់ទឹកភ្លៀង។ ជាដំណោះស្រាយចំពោះមុខ មន្ទីរធនធានទឹក និងឧតុនិយមខេត្ត បានអន្តរាគមន៍បើកទ្វារទឹកហេដ្ឋារចនាសម្ព័ន្ធធារាសាស្ត្រពាក់ព័ន្ធមួយចំនួន ដើម្បីជួយសម្រួលដល់ការដោះទឹកជំនន់ចេញពីក្នុងស្រែ។ ជាមួយគ្នានេះ មន្ទីរក៏កំពុងរៀបចំដំឡើងម៉ាស៊ីនបូមទឹកចល័តខ្នាតមធ្យម ចំនួន ០២ គ្រឿង ដើម្បីជួយដល់ការងារអន្តរាគមន៍ខាងលើនេះផងដែរ ធ្វើយ៉ាងណាធានានូវការប្រមូលផលរបស់កសិករបានទាន់ពេលវេលា។
សូមរំលឹកថា កាលពីពេលថ្មីៗកន្លងមកនេះ ក្រសួងធនធានទឹកនិង ឧតុនិយមបាន ចេញសេចក្តីជូនដំណឹង ពីការធ្លាក់ភ្លៀង ជាបន្តបន្ទាប់នៅតាម បណ្តាខេត្តក្រុងមួយ ចំនួនជាមួយគ្នានេះក្រសួង ក៏បានធ្វើការអំពាវនាវឲ្យបងប្អូនប្រជាពលរដ្ឋ ដែលរស់នៅតាមតំបន់ដែលប្រឈម មានការ ប្រុងប្រយ័ត្នខ្ពស់ ទៀតផង៕
Source: Kampuchea Thmey Daily
0 Comments