ភ្នំពេញ ៖ ជនជាតិចិនម្នាក់ស្រវឹងស្រាបើករថយន្តបុកឃឿន ពុះចែកទ្រូងផ្លូវខូចខាតអស់មួយផ្ទាំង រថយន្តដាច់កាឡេ បើកទៅមុខមិនរួច តៃកុងចុះពីលើរថយន្តឡើងជិះកង់បីទៅបាត់កាលវេលាម៉ោង១១យប់ ថ្ងៃទី១ ខែសីហា ឆ្នាំ២០១៨ តាមបណ្ដោយផ្លូវសហព័ន្ធរុស្សីទល់មុខ ព្រលានយន្តហោះអន្តរជាតិភ្នំពេញពោធិ៍ ស្ថិតនៅភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ។
រថយន្តបង្កម៉ាកស្តារិច ពណ៌ទឹកប្រាក់ ពាក់ស្លាកលេខ កំពង់ស្ពឺ2B-1260 បើកបរដោយជនជាតិចិនម្នាក់ មិនប្រាប់ឈ្មោះ ក្នុងស្ថានភាពស្រវឹងបើកក្នុងល្បឿនលឿនទិសដៅពីកើតទៅលិច។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តជនជាតិចិនខាងលើបើកបរក្នុងទិសដៅពីកើតទៅលិច ក្នុងស្ថានភាពស្រវឹងហើយបើកយ៉ាងលឿន លុះបើកមកដល់ចំណុចកើតហេតុ ស្រាប់តែរថយន្តបានរេចង្កូតទៅផ្នែកខាងឆ្វេង ហើយបានបុកឃឿនពុះចែកទ្រូងផ្លូវខ្ទាតចេញពីកន្លែងចាស់ អស់ចំនួនពីរផ្ទាំង ចំណែករថយន្តបង្កខាងលើបានបែកពោងការពារសុវត្ថិភាព ហើយជនជាតិដែលជាអ្នកបើករថយន្តមិនពាក់ខ្សែក្រវាត់បណ្តាលឲ្យបោកក្បាលនឹងកញ្ចក់ខាងមុខបណ្តាលឲ្យបែក កញ្ចក់សំណាងល្អរងរបួសស្រាល។
ប្រភពព័ត៌មានបានបន្តទៀតថា ខណៈពេលភ្លាមៗនោះ ជនជាតិចិន បំរុងបើកចេញពីកន្លែងកើតហេតុតែរថយន្ត បានដាច់កាឡេបើកទៅមុខមិនរួច ក៏ចុះពីលើរថយន្តហើយឡើងរ៉ឺម៉កកង់បីគេចខ្លួនបាត់ដោយទុករថយន្តនៅកន្លែងកើតហេតុ។
ក្រោយពេលកើតហេតុបានប្រមាណជិតមួយម៉ោង ទើបមាននគរបាលប៉ុស្តិ៍ម្នាក់ហើយបានរាយការណ៍ទៅជំនាញផ្នែកសណ្តាប់ធ្នាប់ចរាចរណ៍ ខណ្ឌពោធិ៍សែនជ័យ ដើម្បីវាស់វែងនិងស្ទូចរថយន្ដយកទៅរក្សាទុករង់ចាំការដោះស្រាយនៅពេលក្រោយ៕
Source: Kampuchea Thmey Daily
0 Comments