បន្ទាយមានជ័យ ៖ សាខាកាកបាទកម្ពុជាខេត្តបន្ទាយមានជ័យ នៅព្រឹកថ្ងៃទី០២ ខែសីហា ឆ្នាំ២០១៨ នេះ បាននាំយកអំណោយ ចែកជូនប្រជាពលរដ្ឋស្រុកម៉ាឡៃចំនួន១៣គ្រួសារ ដែលជួបបញ្ហាគ្រោះធម្មជាតិ។
លោកលី សារី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ បានឲ្យដឹងថា ដោយមានការយកចិត្តទុកដាក់ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា លើសុខទុក្ខបងប្អូនប្រជាពលរដ្ឋ ទីទាល់ក្រ គ្មានទីពឹង និងជួបការលំបាក តាមរយៈសាខាកាកបាទក្រហមកម្ពុជាខេត្តបន្ទាយមានជ័យ បាននាំយកអំណោយ របស់សាខាខេត្ត ចែកជូនបងប្អូនប្រជាពលរដ្ឋ រងគ្រោះដោយសារខ្យល់កន្ត្រាក់ដួលរលំផ្ទះ និងគ្រួសាររងគ្រោះដោយរន្ទះបាញ់ សរុបចំនួន១៣គ្រួសារ ដោយក្នុងមួយគ្រួសារ ទទួលបាន ៖ អង្ករ២៥គីឡូ ត្រីខ១០កំប៉ុង ប្លាស្ទិក១ផ្ទាំង (សម្រាប់គ្រួសាររងគ្រោះធ្ងន់ធ្ងរ) ទឹកត្រី០៣ដប ទឹកស៊ីអ៊ីវ០៣ដប ប្រេងឆា១លីត្រ ម្សៅសាប៊ូ១គីឡូ ភួយ១ មុង១ សារុង១ ក្រមា១ រួមនឹងថវិកាមួយចំនួន។
ក្នុងនោះលោក បានផ្តាំផ្ញើដល់បងប្អូនប្រជាពលរដ្ឋ ត្រូវមានការប្រុងប្រយ័ត្នខ្ពស់ ព្រោះនេះជារដូវវស្សាមានភ្លៀងធ្លាក់ច្រើន អាចកើតមានហេតុការខ្យល់កន្ត្រាក់គ្រប់ពេលមួយវិញទៀតត្រូវរស់នៅប្រកបដោយអនាម័យ ហូបស្អាត ផឹកស្អាត ជៀសឆ្ងាយពីគ្រឿងញៀន ជាពិសេសចូលរួមគោរពច្បាប់ចរាចរណ៍ឲ្យបានគ្រប់ៗគ្នា៕
Source: Kampuchea Thmey Daily
0 Comments