សាលា​ពេទ្យ​ក្រុង​តូក្យូ​ កែប្រែ​ពិន្ទុ​ធ្វើតេស្ត​ដើម្បី​កាត់បន្ថយ​ស្ត្រី​ពី​ការ​ចូល​រៀន

កាសែត​ជប៉ុន​មួយ​ បាន​រាយការណ៍​នៅ​ថ្ងៃ​ព្រហស្បតិ៍​ថា អស់​រយៈពេល​ជាច្រើន​ឆ្នាំ​មក​ហើយ សាលា​ពេទ្យ​ក្រុង​តូក្យូ​បាន​កែប្រែ​លទ្ធផល​នៃ​ការ​ធ្វើ​តេស្ដ​ចូលរៀន​របស់​ស្ត្រី​ដើម្បី​រក្សា​ចំនួន​ស្ត្រី​នៅក្នុង​ស្ថាប័ន​សិក្សា​មួយ​នេះ​ឲ្យ​មាន​កម្រិត​ទាប។

កាសែត Yomiuri Shimbun បាន​ចុះផ្សាយ​ថា ការរៀបចំ​នេះ​បាន​លេចឡើង​ខណៈពេល​ព្រះរាជអាជ្ញា​កំពុង​ស៊ើបអង្កេត​រឿងអាស្រូវ​ដាច់ដោយឡែក​មួយ​ដែល​សាកលវិទ្យាល័យ​វេជ្ជសាស្ត្រ​ក្រុង​តូ​ក្យូ​ត្រូវបាន​គេ​ចោទប្រកាន់ថា​បានអនុញ្ញាត​ដោយ​ខុសច្បាប់​ឲ្យ​កូនប្រុស​របស់​មន្ត្រី​ក្រសួង​អប់រំ​ម្នាក់​ចូលរៀន​។​

លោក Fumio Azuma អ្នកនាំពាក្យ​សាកលវិទ្យាល័យ​មួយ​នេះ​បាន​ប្រាប់ AFP ថា “​បន្ទាប់ពី​មាន​សេចក្តីរាយការណ៍​នៅ​ព្រឹក​នេះ យើង​បាន​ស្នើសុំ​ឲ្យ​ក្រុមហ៊ុន​ច្បាប់​មួយ​បើក​ការស៊ើបអង្កេត​ផ្ទៃក្នុង​មួយ​ទៅលើ​បញ្ហា​ដែល​បាន​រាយការណ៍​នេះ​”​។ លោក​បន្ថែមថា ខ្លួន​សង្ឃឹមថានឹង​ប្រកាស​លទ្ធផល​នៃ​ការស៊ើបអង្កេត​នៅ​ចុងខែ​នេះ។

កាសែត Yomiuri ដែល​ដកស្រង់​ប្រភព​មិន​បញ្ចេញ​ឈ្មោះ​បាន​លើក​ឡើង​ថា សាកលវិទ្យាល័យ​បានចាប់ផ្តើម​បន្ទាប​ពិន្ទុ​ធ្វើតេស្ត​ចូលរៀន​សាលា​ពេទ្យ​របស់​អ្នកដាក់ពាក្យ​ស្ត្រី​នៅក្នុង​ឆ្នាំ​២០១១​បន្ទាប់ពី​លទ្ធផល​ឆ្នាំ​២០១០​បាន​បង្ហាញថា ចំនួន​របស់​ស្ត្រី​ដែល​កើនឡើង​ខ្លាំង​គឺ​បានឈ្នះ​។​

ក្នុង​ឆ្នាំ​២០១០ បេក្ខជន​ដែល​ទទួល​បាន​ជោគជ័យ​ប្រហែល​៤០​ភាគរយ​គឺជា​ស្ត្រី​ដែល​នោះ​ជាការ​កើនឡើង​ទ្វេដង​បើ​ធៀប​នឹង​ឆ្នាំ​២០០៩​។ បន្ទាប់មក សាកលវិទ្យាល័យ​បានចាប់ផ្តើម​ព្យាយាម​រក្សា​ភាគរយ​នៃ​ស្ត្រី​ដែល​ចូលរៀន​ជា​រៀងរាល់ឆ្នាំ​មក​ត្រឹម​ប្រហែល​៣០​ភាគរយ​។​

គួរ​បញ្ជាក់ថា ជាទូទៅ ស្ត្រី​ជប៉ុន​មានការ​អប់រំ​ខ្ពស់​ប៉ុន្តែ​ម៉ោង​ធ្វើការ​ដ៏​យូរ​របស់​ប្រទេស​នេះ​បាន​បង្ខំ​ឲ្យ​ស្ត្រី​ជាច្រើន​ចាកចេញ​ពី​កន្លែងធ្វើការ​នៅពេល​ពួកគេ​ចាប់ផ្តើម​មានគ្រួសារ។

លោកនាយក​រដ្ឋមន្ត្រី ស៊ីន​ហ្សូ អា​បេ បាន​ដាក់​គោលការណ៍ “womenomics” (​បង្កើន​ការចូលរួម​របស់​ស្ត្រី​នៅ​កន្លែងធ្វើការ​និង​លើកកម្ពស់​ស្ត្រី​ឲ្យ​មានមុខ​តំណែង​ជាន់ខ្ពស់​) ធ្វើជា​អាទិភាព​មួយ​ប៉ុន្តែ​ល្បឿន​នៃ​ការ​រីកចម្រើន​មាន​ភាព​យឺតយ៉ាវ៕ AFP

​

Source: Kampuchea Thmey Daily