ហ្ស៊ី​ម​បា​វ៉េ​ ព្រមាន​អំពី​ការ​បង្ក្រាប​ ក្រោយពេល​គណបក្សប្រឆាំង​តវ៉ា​ការបោះឆ្នោត

កាលពី​ថ្ងៃ​ពុធ រដ្ឋាភិបាល​ហ្ស៊ី​ម​បា​វ៉េ​ បាន​ប្ដេជ្ញា​បង្ក្រាប​លើ​អ្នកប្រឆាំង​ បន្ទាប់ពី​មនុស្ស​៣​នាក់ ​ត្រូវ​បាន​សម្លាប់​នៅពេល​បាតុកម្ម​ប្រឆាំង​ការបោះឆ្នោត​ត្រូវ​ជួបប្រទះ​ដោយ​ការ​បាញ់​គ្រាប់​ពិត។

ភ្នាក់ងារ AFP បាន​ឃើញថា ទាហាន​បាន​បាញ់​លើ​បាតុករ​អំឡុង​បាតុកម្ម​របស់​គណបក្ស​ប្រឆាំង MDC នៅក្នុង​ទីក្រុង Harare ដោយមាន​បុរស​ម្នាក់​ត្រូវបាន​បាញ់សម្លាប់​ចំ​ត្រង់​ពោះ។

ការបោះឆ្នោត​កាលពី​ថ្ងៃ​ចន្ទ​គឺជា​ការបោះឆ្នោត​លើកដំបូង​ចាប់តាំងពី​លោក​ប្រធានាធិបតី Robert Mugabe ត្រូវបាន​បង្ខំ​ឲ្យ​ចុះ​ចេញពី​តំណែង​ដោយ​ការ​កាន់កាប់​របស់​យោធា​រយៈពេល​ខ្លី​នៅក្នុង​ខែវិច្ឆិកា​។ វា​គឺជា​ការបើក​ទំព័រ​នៃ​ការបោះឆ្នោត​ដែលមាន​អំពើហិង្សា​និង​ការបង្ក្រាប​យ៉ាង​ឃោរឃៅ​ទៅលើ​ក្រុមប្រឆាំង។

ប៉ុន្តែ​មាន​កំហឹង​និង​ភាពវឹកវរ​យ៉ាង​ឆាប់រហ័ស​នៅពេលដែល​អ្នកគាំទ្រ​គណបក្ស​ចលនា​ដើម្បី​ការផ្លាស់ប្តូរ​ប្រជាធិបតេយ្យ (MDC) បានប្រកាសថា ពួកគេ​ត្រូវបាន​គេ​បោកប្រាស់​ក្នុងការ​រាប់​សន្លឹកឆ្នោត។

លទ្ធផល​ជា​ផ្លូវការ​បានបង្ហាញ​ថា គណបក្ស ZANU-PF ដែល​កំពុងកាន់​អំណាច​គឺ​ទទួលបាន​អាសនៈ​ច្រើនជាងគេ​នៅក្នុង​ការបោះឆ្នោត​សភា​ដែលជា​ហេតុ​ពង្រឹង​ការរំពឹងទុក​ថា​លោក​ប្រធានាធិបតី Emmerson Mnangagwa នឹង​កាន់អំណាច​ក្នុងការ​ប្រកួតប្រជែង​តំណែង​ប្រធានាធិបតី​ដ៏​សំខាន់​។​

ក្រុម​អ្នកគាំទ្រ MDC ដែល​និយាយថា​មេដឹកនាំ​របស់​ពួកគេ​លោក Nelson Chamisa គឺជា​អ្នកឈ្នះឆ្នោត​នោះ​គឺ​បាន​ដុត​កង់ឡាន​និង​បំផ្លាញ​សញ្ញា​នៅតាម​ដងផ្លូវ​ខណៈដែល​ការតវ៉ា​បាន​រីក​រាលដាល​ចេញពី​ទីស្នាក់ការ​កណ្តាល​របស់​គណបក្ស​នេះ​នៅក្នុង​ទីក្រុង Harare​។​

ប៉ូលិស​បាន​បញ្ជាក់ថា អ្នកស្លាប់​មាន​ចំនួន​៣​នាក់​ហើយ​លោក Mnangagwa បានចេញ​សេចក្តីថ្លែងការណ៍​មួយ​ដោយ​ស្តីបន្ទោស​គណបក្សប្រឆាំង​ចំពោះ​ភាពចលាចល​និង​ការស្លាប់​នេះ​។​

លោក​បាន​និយាយថា “​យើង​សូម​ឲ្យ​គណបក្សប្រឆាំង MDC និង​មេដឹកនាំ​ទាំងមូល​របស់ខ្លួន​ទទួលខុសត្រូវ​ចំពោះ​ការរំខាន​ដល់​សន្តិភាព​ជាតិ​”​។​

នៅក្នុង​សន្និសីទកាសែត​យប់​ជ្រៅ​មួយ រដ្ឋមន្ត្រី​ក្រសួងមហាផ្ទៃ​លោក Obert Mpofu បាន​ព្រមាន​ថា រដ្ឋាភិបាល​នឹងមិន​អត់ឱន​ចំពោះ​សកម្មភាព​ណាមួយ​ដែល​បានធ្វើ​នៅថ្ងៃនេះ​ទេ៕ AFP

​

Source: Kampuchea Thmey Daily