កូរ៉េខាងត្បូង ​ប្រារព្ធ​ទិវា “​ទាសករ​ផ្លូវភេទ​” ជា​លើកដំបូង

រដ្ឋាភិបាល​កូរ៉េខាងត្បូង​ គ្រោង​នឹង​ដាក់​បង្ហាញ​បូជនីយដ្ឋាន​ថ្មី​មួយ​នៅ​ថ្ងៃ​អង្គារ​ ដែល​ជា​ផ្នែក​មួយ​នៃ​ទិវា​ផ្លូវការ​ជា​លើកដំបូង​ដែល​កត់សម្គាល់​អំពី​ការប្រើប្រាស់ “​ទាសករ​ផ្លូវភេទ​” សម័យ​សង្គ្រាម​របស់​ជ​ប៉ុន​។​
​
ពិធី​នានា​ដែល​ជាការ​រំលឹក​ខួប​លើក​ទី​១​នៃ “​ទិវា​រំលឹក​ខួប​សម្រាប់​ជនរងគ្រោះ​នៃ​ទាសករ​ផ្លូវភេទ​របស់​កងកម្លាំង​ប្រដាប់អាវុធ​ជប៉ុន​” បាន​គំរាមកំហែង​ធ្វើ​ឲ្យ​កាន់តែ​មាន​ភាព​ធ្ងន់ធ្ងរ​ទៅលើ​បញ្ហា​ការទូត​ជាមួយ​ប្រទេស​ជប៉ុន​ដែលជា​អ្នកជិតខាង​របស់​កូរ៉េខាងត្បូង​និង​ជា​សម្ព័ន្ធមិត្ត​សំខាន់​របស់​សហរដ្ឋអាមេរិក​ក្នុង​កិច្ចខិតខំ​ប្រឹងប្រែង​ទប់ស្កាត់​កូរ៉េខាងជើង​។​
​
ប្រទេស​ជប៉ុន​បាន​និយាយថា បញ្ហា​នេះ​ត្រូវបាន​ដោះស្រាយ​ដោយ​កិច្ចព្រមព្រៀង​ឆ្នាំ​២០១៥​ដែល​ត្រូវបាន​យល់ព្រម​ដោយ​រដ្ឋអំណាច​មុន​របស់​កូរ៉េខាងត្បូង​ហើយ​ក្នុងនោះ ជប៉ុន​បានធ្វើការ​សុំទោស​ដល់​ជនរងគ្រោះ​និង​ផ្តល់​ទឹកប្រាក់​១​ពាន់​លាន​យ៉េន (៩.០៣​ដុល្លារ​អាមេរិក​) ដើម្បី​ផ្តល់​មូលនិធិ​ឧបត្ថម្ភ​ដល់​ពួកគេ​។​
​
ប៉ុន្តែ​រដ្ឋបាល​របស់លោក​ប្រធានាធិបតី​កូរ៉េខាងត្បូង Moon Jae-in បាន​ពិនិត្យមើល​បញ្ហា​នេះ​ឡើងវិញ​ហើយ​បាន​អំពាវនាវ​ឲ្យ​ជប៉ុន​ធ្វើ​បន្ថែមទៀត​ថ្វីបើ​មានការ​គាំទ្រ​កាលពី​ខែមករា​អំពី​ការចរចា​ឡើងវិញ​ជា​ផ្លូវការ​ក៏ដោយ​។​
​
ក្រុង​តូ​ក្យូ​បានធ្វើ​ការតវ៉ា​ប្រឆាំងនឹង​បូជនីយដ្ឋាន​ដែលមាន​ស្រាប់​ផ្សេងទៀត​នៅក្នុង​ប្រទេស​កូរ៉េខាងត្បូង​ដែល​បាន​ឧទ្ទិស​ដល់​ទាសករ​ផ្លូវភេទ​រាប់ទាំង​បូជនីយដ្ឋាន​មួយ​នៅមុខ​ស្ថានទូត​ជប៉ុន​ក្នុង​ទីក្រុង​សេ​អ៊ូ​ល​ក៏ដូចជា​សកម្មភាព​មួយ​កាលពី​ឆ្នាំមុន​ក្នុងការ​បង្កើត​ថ្ងៃមួយ​ដើម្បី​រំលឹក​ដល់​ទាសករ​ផ្លូវភេទ​ផងដែរ​។​
​
វិទ្យាស្ថាន​មួយ​ដែល​ផ្តល់​មូលនិធិ​ដោយ​រដ្ឋាភិបាល​កូរ៉េខាងត្បូង​ដើម្បី​ស្រាវជ្រាវ​បញ្ហា​នេះ​ក៏បាន​បើក​ដំណើរការ​កាលពី​ដើមខែ​នេះ​ផងដែរ​។​
​
បញ្ហា​ទាសករ​ផ្លូវភេទ​គឺជា​មូលហេតុ​ធម្មតា​សម្រាប់​ជម្លោះ​រវាង​ប្រទេស​ជប៉ុន​និង​ប្រទេសជិតខាង​ដូចជា​ចិន កូរ៉េខាងជើង​និង​កូរ៉េខាងត្បូង​ជាដើម​ចាប់តាំងពី​សង្គ្រាម​មក​។​
​
ជប៉ុន​បានធ្វើ​អាណានិគម​លើ​ឧបទ្វីប​កូរ៉េ​ចន្លោះ​ឆ្នាំ​១៩១០​ដល់​ឆ្នាំ​១៩៤៥​និង​បាន​កាន់កាប់​ផ្នែក​ខ្លះ​នៃ​ប្រទេស​ចិន​មុន​និង​ក្រោយ​សង្គ្រាម៕ REUTERS

​

[caption id="attachment_962113" align="alignnone" width="700"] Protesters hold pictures of "comfort women" and of Japan's Prime Minister Shinzo Abe with Chinese characters reading "apologise", outside Japan’s de facto embassy in Taipei, Taiwan August 14, 2018. REUTERS/Tyrone Siu[/caption]

Source: Kampuchea Thmey Daily