អតីត​បព្វជិត​អូស្ដ្រាលី​គេច​ផុស​ពី​ការជាប់​ពន្ធនាគារ​ពីបទ​លាក់បាំង​ការរំលោភបំពាន​លើ​កុមារ

អតីត​បព្វជិត​ជនជាតិ​អូស្ត្រាលី​ម្នាក់​ដែល​ត្រូវបាន​កាត់ទោស​ពីបទ​លាក់បាំង​ការរំលោភបំពាន​ដោយ​អាចារ្យ​រំលោភ​កុមារ​ដ៏​ល្បីល្បាញ​ម្នាក់​ក្នុង​ទសវត្សរ៍​ឆ្នាំ​១៩៧០ ​គឺ​បានគេច​ផុតពី​ការជាប់​ពន្ធនាគារ​នៅ​ថ្ងៃ​អង្គារ​ដោយ​តុលាការ​បានសម្រេច​ថា គាត់​អាច​ទទួលទោស​ជាប់ឃុំ​ក្នុងផ្ទះ​។​
​
លោក Philip Wilson បាន​ក្លាយជា​មន្ត្រី​សាសនា​ឋានៈ​ខ្ពង់​ខ្ពស់បំផុត​ដែល​ត្រូវបាន​កាត់ទោស​ពីបទ​បិទបាំង​ការរំលោភបំពាន​ផ្លូវភេទ​លើ​កុមារ​នៅពេល​គាត់​ត្រូវបាន​គេ​រកឃើញថា​មាន​កំហុស​ក្នុង​ខែឧសភា​ពីបទ​លាក់បាំង​ឧក្រិដ្ឋកម្ម​ដោយ​អាចារ្យ Jim Fletcher នៅ​រដ្ឋ New South Wales ។​
​
តុលាការ​មូលដ្ឋាន Newcastle បាន​កាត់ទោស​បុរស​អា​យុ​៦៧​ឆ្នាំ​រូបនេះ​ឲ្យ​ជាប់ពន្ធនាគារ​រយៈ​១២​ខែ​ប៉ុន្តែ​ក៏បាន​បង្គាប់​ផងដែរ​ថា គាត់​ត្រូវបាន​គេ​វាយតម្លៃ​ឲ្យ​អនុវត្ត​ទោស​នេះ​នៅក្នុង​ផ្ទះ​។​
​
ចាប់តាំងពី​ពេលនោះ​មក គាត់​ត្រូវបាន​ដោះលែង​ឲ្យ​នៅក្រៅ​ឃុំ​ហើយ​នៅ​ថ្ងៃ​អង្គារ ចៅក្រម Robert Stone បាន​សម្រេចចិត្តថា គាត់​នឹងមិន​ជាប់ពន្ធនាគារ​ទេ​ស្របពេល​ប្រព័ន្ធ​ផ្សព្វផ្សាយ​ក្នុងស្រុក​បាន​រាយការណ៍​ពី​តុលាការ​ថា អាយុ ស្ថានភាព​ផ្លូវចិត្ត​និង​រាងកាយ​របស់គាត់​ត្រូវបាន​គេ​យកមក​ពិចារណា​។​
​
កាសែត Newcastle Herald បាន​ចុះផ្សាយ​ថា ជា​ផ្នែក​មួយ​នៃ​ការ​ឃុំឃាំង​នៅ​ទីតាំង​ដែល​មិន​ត្រូវបាន​គេ​បង្ហាញ​, លោក Wilson នឹងត្រូវ​ពាក់​ឧបករណ៍​តាមដាន​។​
​
លោក Wilson បាន​លាលែង​ពី​តំណែង​ជា​មហា​សង្ឃនាយក​ក្រុង Adelaide កាលពី​ខែ​មុន​បន្ទាប់ពី​លោកនាយក​រដ្ឋមន្ត្រី Malcolm Turnbull បាន​អំពាវនាវ​ឲ្យ​បុរី​វ៉ា​ទី​កង់​បណ្តេញ​គាត់​។​
​
គាត់​បាន​បដិសេធ​ការចោទប្រកាន់​នេះ​ជា​យូរ​មកហើយ​ហើយ​កាលពី​ដំបូង​គាត់​បាន​រឹងរូស​នឹង​ការអំពាវនាវ​ឲ្យ​លាឈប់​ដើម្បី​រង់ចាំ​បណ្តឹងឧទ្ធរណ៍​មួយ​ប្រឆាំងនឹង​ការកាត់ទោស​របស់គាត់​។​
​
លោក Stone បាន​រកឃើញថា គាត់​មាន​ពិរុទ្ធ​ពីបទ​លាក់កំបាំង​បទល្មើស​ដ៏​ឃោរឃៅ​របស់​បុគ្គល​ម្នាក់ទៀត​ដើម្បី​បញ្ចប់​បំណង​ចម្បង​របស់គាត់​គឺ​ដើម្បី​ការពារ​មន្ត្រី​ព្រះវិហារ​។​
​
គួរ​បញ្ជាក់ថា ការផ្តន្ទាទោស​របស់លោក Wilson បាន​កើតឡើង​ចំពេល​មានការ​ចោទប្រកាន់​ជាច្រើន​ដែលថា ព្រះវិហារ​កាតូលិក​មិន​អើពើ​និង​បិទបាំង​ការរំលោភបំពាន​លើ​កុមារ​នៅក្នុង​ប្រទេស​អូស្ត្រាលី​ដែល​ការចោទប្រកាន់​នេះ​ក៏បាន​ញាំញី​ប្រទេស​ដទៃទៀត​ផងដែរ​៕ AFP



​

Source: Kampuchea Thmey Daily